MAKATANISHO 27 - Biblia Ilagho Jiboie Kwa Wandu Wose

¹ Kusakekukasa na maza ra kesho, angu ndekumanyire agho ghichaabonyeka aghadi ya idime na kesho.

² Leka mundu mzima ukukume kusakekukuma kumoni; sigha mghenyi ukukume ela okumoni mbai.

³ Igho jalemere, na msangagha ghwalemere; ela kusumbua kwa mkelu kwalemere kuchumba vose.

⁴ Lubio lwawadie kinyanya, machu nagho ghivavira, ela ghose ghachumbwa ni iriso.

⁵ Baa kukemia worinyi kuchumba lukundo luvisikie.

⁶ Mghenyi wako ukaduakushoghonua, ni mloli kwako; ela m'maiza ni m'maiza hata ukeduakususugha mando mengi.

⁷ Mundu ughudie, uzamilwa ni wuki, ela uo uzughilo, wadasingilwa ni icho chose chibirie.

⁸ Mundu umaraa-mara kula na nyumba yake, ooka sa nyonyi imaraa-mara kula na kijungi chake.

⁹ Mavuda na marumba, ghadaibonya ngolo iboilo; ela roho yadakaia na wasi ikapatwa ni malagho.

¹⁰ Kusakemliwa mghenyi wako, na mghenyi wa ndeyo. Kukakaia na wasi kuselole wutesia kwa mwanyinyu. Mmbenyu wa kaavui ni baa, kuchumba mwanyinyu uko kula.

¹¹ Mwana wapo, kukaie na hikima; kunibonye nikaie na kuboilwa, eri mndungi ukakanimenya nidime kumtumbulia.

¹² Mundu uwadie suku wadawona ndengwa na kukuvisa, ela mundu usene maghesho wadaenda imbiri na kungia wasinyi.

¹³ Mundu ukakufunya kukaia mdhamini wa mundu mghenyi, kuwadie nguwo yake; kummbwade ubonye ighemi iji wakufunya ukaie mdhamini wa waghenyi.

¹⁴ Mundu umroghuagha mmbao kokesho kio na lwaka lubaang'aha, uasikirika sa uwasiragha njowe.

¹⁵ Muka orasha wandu oofwanana na vua isindaanya dii.

¹⁶ Kukatima kumhoresha, kuakaia seji kuatangala mbeo, angu kuwadia mavuda na mkonu ghwa kiwomi.

¹⁷ Chuma chadanoa chuma, na mdamu wadafundishwa ni mdamu mmbao.

¹⁸ Mundu ughulindiagha mtini, uchaja matunda gharo; na uhu umlindiagha bwana wake, uchabonyerwa ishima.

¹⁹ Seji machi ghiwonyeragha wushu ghwa mundu, niko koni akili rake rimmbonyeragha seji uo moni uko.

²⁰ Andu kwa Wafu ndekukatwagha jingi, na wokoni bea ya mdamu ndeikatwagha jingi.

²¹ Feza na dhahabu radatimwa kwa modo, na mdamu wadamanyika kwa sare yake.

²² Kukeduamkaba mkelu uvikie kuwoneka seji kwaamchana na kumfashanya na viro a kidunyi, sena ndelekaa wukelu ghwake.

²³ Kumanye ng'ondi rako seji riko, na mfugho rako kurizighane,

²⁴ angu mali nderiduagha. Wokoni mbari ra wandu nderiduagha matuku ghose anduangi.

²⁵ Kwadatumbanya na kudema nyasi aighu mighondinyi ingelo nyasi zima yawuyabuka.

²⁶ Kwadima kubonya nguwo kufumanya na mafuri gha ng'ondi rako, na sena kughuo mbuwa kukauza mburi rako rimu.

²⁷ Mburi rasigharika richakuneka mariwa; oho na wandu wa nyumbenyi kwako, na wai wako wa kazi wori.