MAKATANISHO 2 - Biblia Ilagho Jiboie Kwa Wandu Wose

Mafungu gha Hikima

¹ Mwana wapo, wadia mafundisho ghapo, hata kuseliwe malaghiro ghapo.

² Sikira hikima, kulole kutambukilwa.

³ Lomba suku, kulole kumanya.

⁴ Kuilole sa feza na sa mali ivisiro.

⁵ Kukabonya huwo, kuchatambua maana ya kumuobua BWANA, na kuwona nicha andenyi ya kukufundisha kummanya Mlungu.

⁶ BWANA nuo unekagha hikima; kumanya na kutambukilwa kwadafuma kwake.

⁷ Nuo uwikagha hikima kwa wundu ghwa wahachi; wadawilindia wandu wisewadie ikosa.

⁸ Wadawilindia awo wiwibonyeragha wambao hachi, na kuilindia chia ya waeli wake.

⁹ Kukanisikira, kuchatambukilwa ni hachi na loli, na kukumazira, na kula chia ndicha.

¹⁰ Kuchakaia na hikima, na kumanya kwako kuchakuredia maboilo.

¹¹ Suku richakulindia, na kutambukilwa kuchakuwika nicha.

¹² Hikima ichakulindia kusebonye mawiwi, na kukuwika kula na wandu widedagha kisha.

¹³ Ni wandu wiisighie chia ya hachi, na kunugha chia ra kira;

¹⁴ wadaboilwa ni kubonya mawiwi, na kuwona nicha andenyi ya wuwiwi ghwa kulaghaya.

¹⁵ Wandu wisene loli; winughagha chia rikomekie.

¹⁶ Kuchakirwa na muka mseli; ukuseseaa-sesea na malagho ghake ghisingie.

¹⁷ Uo ndeko mloli kwa mumi wake; wadaliwa maghemi ubonyere imbiri ya Mlungu.

¹⁸ Kukaghenda nyumbenyi kwake, kwawuyaghenda cha kifonyi; na kughenda aho ni sa kughenda Andu kwa Wafu.

¹⁹ Mndungi ndeghendagha kwake ima uwuye, na jingi ndeiwuriagha chia ya irangi.

²⁰ Kwa huwo kuwinughe wandu wecha; kuimazire chia ya wahachi.

²¹ Wandu wecha wichakaia isangenyi, na awo wisewadie ikosa wichadua andenyi yaro.

²² Ela wawiwi wichainjwa isangenyi, na wakaung'a wichafunywa noko.