MAKATANISHO 17 - Biblia Ilagho Jiboie Kwa Wandu Wose

¹ Ni baa kuja lukoko lwa mkate ghuomie na sere, kuchumba karamu andenyi ya nyumba ichue marashano.

² Mzumba uwadie hikima ucham'bonyera nguma mwana wa bwana wake ubonyagha maza ra waya, nao uchawagha ifwa nao, sa umu wa waruna.

³ Feza na dhahabu radatimwa kwa modo; ngolo radatimwa ni BWANA.

⁴ M'bonyi mawiwi wadasikiria madedo ghizamie, na mtee wadasikiria tee.

⁵ Mundu umsekagha mkiwa, wadamdukana Muumbi wake; uhu uboilwagha ni mundu wapatwa ni ndengwa, ndechaakaia usepatire ikabo.

⁶ Waghosi wadakukasa na weke wawae, seji wavi wikukasagha na wana wawo.

⁷ Madedo ghededwa kwa wuya ndeghimfwanagha mkelu; da madedo gha tee ghimfwana wada m'baa?

⁸ Kuhonga kooka sa wusawi ghwa uo wawuyafunya; andu kose uidiagha maza rake riakaia nicha.

⁹ Mundu ufuyagha wughoma, wadakundwa ni wandu; kukumbuka makosa kwadanona wughenyi.

¹⁰ Mundu uelelwagha ukakanilwa wadatambukilwa; mkelu hata ukakabwa ngonde ighana ndetambukilwagha.

¹¹ Mundu mmbiwi wadakaia mleghi toe; mdumwa usena wughoma uchadumwa kumtangala.

¹² Ni baa kukwana na kibarabara chisokelo wana wake, kuchumba kukwana na mkelu ubonyagha maza ra wukelu.

¹³ Mundu ukalipa kiwiwi kwa nicha, kiwiwi ndechichaafuma nyumbenyi kwake.

¹⁴ Kuzoya nganyi kooka sa kuvungua machi, kwa huwo sigha malagho imbiri marashano ghisezoye.

¹⁵ Mundu umtalagha mmbiwi kukaia na hachi, na uhu umtanyagha mhachi kukaia mkosi, wedefwanana; wose wadamzamia BWANA.

¹⁶ Eko fwaidaki mkelu kukaia na pesa reghua kishomo, ikakaia usene haja ekufundisha?

¹⁷ Mghenyi mundu wadakaia na lukundo ngelo rose, mruna mundu oovalwa witesiane wasi.

¹⁸ Mundu usowie akili wadawika wufunga, na kukaia mshahidi wa sile ya mmbao.

¹⁹ Mundu uboilwagha ni marashano, ookunda kaung'a; uo ukuwusiragha moni wadakunona moni.

²⁰ Mundu wa maghesho gha wuwiwi ndepatagha mecha ghangi; mundu wa mikalo wadangia wasinyi.

²¹ Mwana mkelu ni wasi kwa ndee; ndee wa mkelu ndewadie kuboilwa kungi.

²² Ngolo ikuchukie yadawika mundu banana, roho ya wasi, yadabwagha mboong'oa.

²³ Mundu mmbiwi wadahongwa kivisonyi, upate kulaghasha hachi.

²⁴ Mundu utambukilwagha wadatumia hikima, ela mkelu ndemanyagha andu kozoia.

²⁵ Mwana mkelu ni wasi kwa ndee, na luwawo kwa mae.

²⁶ Si hachi kumdumbua faini mundu usene ikosa; ni ikosa kumkaba mundu wa ishima.

²⁷ Mundu uko na suku wadawadia malagho; mundu utambukilwagha wadakaia na ngolo ihorie.

²⁸ Mkelu wanyama kima wadawoneka sa mundu wa hikima; ukafunga momu wadawoneka sa mundu uko na suku.