LUMBO 8 - Biblia Ilagho Jiboie Kwa Wandu Wose

¹ Kumangu kodeka mwanidu wa womi, kuongoshero ni mao. Ngakukua chienyi, nadakususugha, na mndungi ndatalagha.

² Nadakudwa cha nyumbenyi kwa mao uo unifundishire; nadakuneka divei iboie kunyo; agho machi ghapo gha makomamanga.

³ Mkonu ghwako ghwa kiwaka ghwadakaia aisi ya chongo chapo, na mkonu ghwako ghwa kiwomi ghwadanishishidia.

⁴ Namghemesha inyo ee waka wa Jerusalemu, msengirie lukundo lodu.

Lumbo lwa karandadu Waka

⁵ Nani uja uchagha kufuma kireti, wawadiana na mkundwa wake? Nedekuwusira kuko aisi ya mudi ghwa matunda, andu mayo orekuamieghe, ukakumba lufu na kukuva.

Muka

⁶ Kusengire mndungi ngolonyi kwako ela ini niekeri; kusewadie ungi mkonunyi kwako ela ini niekeri; kwa kukaia lukundo lwawadie ndighi sa kifwa; iriso jaro jeeng'eta sa kaburi. Jadabusa modo kondenyi, na kukumba lumu lubirie.

⁷ Lukundo ndelurimishwagha ni machi mengi, hata ndeludwalwagha ni machi mengi; mndungi ukatima kulughua na pesa uchamenywa putu.

Waruna wa womi wa uo muka

⁸ Deko na mwanidu wa waka mtini usefunyire nyodo. Mndumu wa irika ukakunda kumlowua dibonya wada?

⁹ Ikakaia ooka wurigha, dichamuaghia mnara ghwa feza, ela ikakaia ooka mbenge, dichamlindia kwa kum'bonyera mbau ra mierezi.

Muka

¹⁰ Ini ne wurigha, na nyodo rapo niro mnara ghwaro; mkundwa wapo waichi neekatwa na kukaia na sere kwa kukanya nao.

¹¹ Solomoni orekoghe na mbuwa ya mizabibu aja Baal-hamoni, ukapangisha walimi. Kula umu orekoghe urede vibelele va feza elfu imweri, kwa wundu ghwa matunda gharo.

¹² Ee Solomoni, wada iro shekeli ra feza elfu, na walimi waro wiwade maghana awi, mbuwa ya mizabibu iyo ni yapo.

¹³ Neekunda kusikira lwaka lwako kufuma mbuwenyi mkundwa; wangara wapo waawuyaweseria wisikire kukideda.

Muka

¹⁴ Choo kwapo mkundwa; shashira kuche sa shaa angu sarigha ngoo, aighu mighondinyi andu vilungo vilimwagha.