LUMBO 5 - Biblia Ilagho Jiboie Kwa Wandu Wose

¹ Nangia mbuwenyi kwapo wangolo, bibi arusi wapo niwaye manemane na vilungo vapo; nije wuki na mando ghapo gha choki; ninyo divei na mariwa ghapo. Jenyi wakundwa munyo; Nyonyi hata mmbongero ni lukundo.

Waka Lumbo lwa kana Muka

² Nerekoghe nilale, ela ngolo yapo ikakaia ilave; ngasikira mkundwa wapo ukikaba mnyango. Nirughue wangolo, mkundwa wapo mbughi yapo; nashushurilwa, na iridia japo jawada machi.

Mndwawomi Muka

³ Nameria kurua nguwo, niwuyarwa wada sena? Nameria kuoghosha maghu, niwuyaghilusha wada sena?

⁴ Mkundwa wapo ukawada mnyango; ngolo yapo ikanyavurika kwa wundu ghwake.

⁵ Ngawuka nimrughue mkundwa wapo, mikonu yapo na vala vapo vikadatonya manemane ngimrughuya.

⁶ Ngamrughuya mkundwa wapo mnyango, ela orekoghe waghenda. Ngolo yapo ikasia uendadeda. Ngamlola, ela sicheemmbona; ngammbanga, ela ndecheenidika.

⁷ Walindiri wa muzi wereniwonieghe; wikanikaba na kunishoghonua, wikanisoka ikoti japo, wikaenda najo.

⁸ Inyo waka wa Jerusalemu, namvoya; mkammbona mkundwa wapo, mumzere nabwaghwa ni lukundo.

Waka

⁹ E kudivoyagha huwo oho muka kughokie kuchumba wose, mkundwa wako oko naki chiseko na wambenyu? Niki uko nacho cha mashiniko chichumbie wambao?

Muka

¹⁰ Mkundwa wapo ooghoka sena oko na ndighi; nuo moni uekeri aghadi ya wandu elfu ikumi.

¹¹ Wushu ghwake ghwadendere nandighi, iridia jake ni ja singa, ja chilu pi sa ngorusa.

¹² Meso ghake gheeka sa mbughi, riko mbai na mbai ya ndoria ra machi, rioghoshero na mariwa na kukaia nicha.

¹³ Madumbu ghake gheeka sa matuta gha vilungo, vifunyagha marumba mecha. Memu yake eeka sa mboi ra lili ritonyagha mavuda gha manemane.

¹⁴ Mikonu yake eeumbwa nicha, irwae pete ya lulu; mumbi ghwake ghoodendia sa mbembe ra chovu ghurushiro vito va zoghori.

¹⁵ Maghu ghake gheeka sa nguro ra marimari rimangishiro aighu ya dhahabu, fwana yake eeka sa Mighondi ya Lebanoni, na miereri yaro izoghue ighu.

¹⁶ Oosingwa ni malagho, nao ni mundu ukundikie. Uo nuo mkundwa wapo na mghenyi wapo, ee waka wa Jerusalemu.