LUMBO 3 - Biblia Ilagho Jiboie Kwa Wandu Wose

¹ Nalalemlola mkundwa wapo ndodonyi kio chee wulinyi kwapo; namlolie, ela seredimieghe kummbona anduangi.

² Nawukie ngaendamlola mzinyi kose, na chienyi ra muzi, namlolie mkundwa wapo, neremlolieghe ela seredimieghe kummbona anduangi.

³ Walindiri wa muzi wereniwonieghe; ngawikotia, “Mwaniwonia mkundwa wapo ngera?”

⁴ Niendasighana nawo woruwu, ngammbona; ngammbwada hata sicheemlekeria anduangi. Ngamdwa hata nyumbenyi kwa mao, icho chumba nerevailoghe.

⁵ Inyo waka wa Jerusalemu, namghemesha kwa shaa na weke mwakuli wa mlambenyi kukaia, msengirie lukundo lodu.

Lumbo lwa kadadu Muka

⁶ Nani uhu ujokagha kufuma kireti sa nguro ya mosi, ushingilo marumba gha manemane, na ubani, agho marumba ghiuzwagha ni wandu wa biashara?

⁷ Ni Solomoni uchagha wadukwa aighu ya kifumbi chake cha nguma, wawuyalindilwa ni masikari mirongo irandadu; masikari wiboie kuchumba wa Israeli.

⁸ Awo wose ni mang'oni gha lufu; kula umu wakufunga lufu barenyi kwake, kulindia ilagho jingi jichagha nakio.

⁹ Mzuri Solomoni orekubonyereghe kifumbi cha nguma cha mbau ra Lebanoni.

¹⁰ Midi eduka icho kifumbi ukaishinga feza, Andu kokusaghika cha mghongo, nguwo yaro ukaishinga dhahabu; andu koseria kidombo, nguwo yaro ukaibonya ya zambarau ibonyero ni waka wa Jerusalemu kwa lukundo.

¹¹ Inyo waka wa Sioni, choonyi mmbone Mzuri Solomoni seji warushwa kirumbu ni mae; ituku ja arusi yake, ijo ituku ja kuboilwa kwake.