LUMBO 2 - Biblia Ilagho Jiboie Kwa Wandu Wose

¹ Ini ne mboi ya isakenyi ya Sharoni, ne mboi ya lili a vololonyi.

Mndwawomi

² Mkundwa wapo ukakaia aghadi ya wai, ni sa mboi ya lili iko aghadi ya minjwa.

Muka

³ Mkundwa wapo ukakaia aghadi ya wambenyu, ni sa mudi ghwa matunda ghadi na ghadi ya msidu. Naboilwa ni kusea kidombo kijunyi kwake; itunda jake jasingie nandighi.

⁴ Ukanidwa nyumbenyi karamunyi; ukawonyera kiweto cha lukundo aighu yapo.

⁵ Nitesienyi kwa zabibu reomera, nihoreshenyi na matunda; nabwaghwa ni lukundo.

⁶ Mkonu ghwake ghwa kiwaka ghoko aisi ya chongo chapo, na mkonu ghwake ghwa kiwomi, ghwanishishidia.

⁷ Inyo waka wa Jerusalemu, namghemesha kwa shaa na weke mwakuli wa mlambenyi kukaia, msengirie lukundo lodu.

Lumbo lwa kawi Muka

⁸ Nasikira lwaka lwa mkundwa wapo. Waawuyacha ukikimbia aighu mighondinyi, waawuyashashira kunichea aighu ya mighondi mitini.

⁹ Mkundwa wapo ooka sa shaa, sa sarigha ngoo ya womi. Ola hoja kimusi lukumbinyi, waawuyasungia idirishenyi, uazighana a nyavunyi.

¹⁰ Mkundwa wapo wadedanya nani, ukighamba; “Wuka mkundwa wapo; choo dighende.

Mndwawomi

¹¹ Kwari yasia, na vua yaela.

¹² Mboi rawusa mlambenyi, ni ngelo ebora, na chwaka ra mbughi rasikirika.

¹³ Mtini ghwakawurwa, na zabibu rakawusa; rafunya irumba jiboie. Wuka mkundwa wapo, choo dighende.

¹⁴ Kooka sa mbughi ikuvisire lukororonyi, leka niwone wushu ghwako ghughokie, nisikire lwaka lwako lusingie.

¹⁵ Wada mizozo, iyo mizozo mitini, inonagha mbuwa ra mizabibu, kwa kukaia zabibu rawusa.”

Muka

¹⁶ Mkundwa ni wapo, na ini ne wake; wadalisha iranu jake aghadi ya mboi.

¹⁷ Wuya mkundwa kukaie hata ndoe iele; na kira kusia kaia sa shaa angu sarigha aighu ya mighondi iwukie na kusea.