LUKA 24 - Biblia Ilagho Jiboie Kwa Wandu Wose

Kuruka kwa Jesu

¹ Ituku ja Njumwa kokio, waja waka wikaghenda kaburinyi wikidwa ghaja marumba wereghiboisireghe.

² Wikajikua igho jabingilishwa kufuma momunyi ghwa kaburi.

³ Ela iji werengirieghe andenyi ndewereghuwonieghe mumbi ghwa Bwana Jesu anduangi.

⁴ Hata iji werekaieghe kimusi wikishinikia ilagho ijo, wikafutukilwa ni wandu wawi, wiko na nguwo ring'ala-ng'ala, wikakaia kimusi kaavui nawo.

⁵ Nao iji werekoghe wikiobua na kughusha mawushu ghawo andonyi, waja wandu wikawizera, “Kwaki mumlolagha kwa wafu uo uko moyo?

⁶ Ndeuko aha anduangi, wameria kuruka. Kumbukenyi seji oremghorieghe iji orekoghe Galilaya;

⁷ angu ‘Suti Mwana wa Mdamu ufunyo mikonunyi kwa wandu wa kaung'a, usulubisho, na ituku ja kadadu urukisho sena.’”

⁸ Nao awo waka wikaghikumbuka malagho ghake,

⁹ wikawuya kufuma kaburinyi wikawighoria awo wanughi ikumi na umweri agho malagho na wazima wori.

¹⁰ Awo werewighorieghe wadumi maza iri werekoghe Maria Magdaleni, na Joana, na Maria mae Jakobo, andwamweri na waka wamu wazima.

¹¹ Ela malagho agho ghikawoneka kwa wadumi sa ghiseko ghewada, hata ndewerewirumirieghe anduangi.

¹² [Ela Petro ukafuma na kughenda na iseghe cha kaburinyi, nao iji oresungieghe andenyi ukawona rija nguwo ra kurika riekeri, ukawuya nyumbenyi ukishinikia ghaja gherebonyekieghe.]

Charo cheghenda Emau

¹³ Ituku jija jeni, wandu wawi wa wanughi wa Jesu werekoghe wikighenda muzi ghuwangwagha Emau sa wukula ghwa kilometa ikumi na imweri kufuma Jerusalemu.

¹⁴ Wikakaia wikija malagho gha rija maza rerebonyekieghe.

¹⁵ Hata iji werekoghe wikija agho malagho, Jesu moni ukasughuda kaavui na kughendanya nawo.

¹⁶ Wikammbona, ela ndeweremmanyireghe anduangi.

¹⁷ Nao Jesu ukawizera, “Ni malaghoki agha mwawuyaja mkighenda?” Wikakaia kimusi wikizighana na mawushu gha wasi.

¹⁸ Umu wawo uwangwagha Kleopa ukamkotia, “Wele oho kooka mghenyi kuekeri Jerusalemu, kuseichi malagho ghibonyekie aho agha matuku?”

¹⁹ Ukawikotia, “Malaghoki?” Wikatumbulia, “Malagho ghimpatire Jesu wa Nazareti. Mundu uhu orekoghe mlodi m'baa uko na kudima kwa kubonya na kufundisha imbiri ya Mlungu na imbiri ya wandu wose;

²⁰ na seji wakohani wabaa wedu weremtanyireghe kufwa, wikamsulubisha.

²¹ Ela isi derekoghe dikimsuwiria, angu nuo moni uchaawikombua Israeli. Chiaimweri na agho, idime ni ituku ja kadadu kufuma agho malagho ghabonyeka.

²² Na waka wamu wa mzedu wadishinua, wighendieghe kaburinyi kokesho kio,

²³ ela wikaghusowa mumbi ghwake, wikawuya wikighora wei wawonie weke malaika wawizera kedi oko moyo!

²⁴ Na wandu wamu wedu waghendieghe kaburinyi kuzighana wikawona wokoni sa iji awo waka wighorieghe, ela uo moni ndewimmbonie anduangi.”

²⁵ Nao Jesu ukawizera, “Kwaki mkelie huwu, muko na ngolo rilemere rerumiria malagho ghose ghighorelo ni walodi?

²⁶ Welee, ndeeremfwanieghe Kristo kutirirwa maza iri na kungia kwa wubaa ghwake?”

²⁷ Niko ukawitambuya maza rose riandikilo kwa wundu ghwake ukizoya na vuo va Musa na va walodi wose.

²⁸ Wikavika kaavui na muzi werekoghe wikighughendia, Jesu ukakubonya sa kukunda kuida;

²⁹ ela awo wikamshingira wikighamba, “Kaia andwamweri nesi angu ndoe yaswa na kira chaawuyasea.” Nao ukangia kukaia andwamweri nawo.

³⁰ Hata iji wasea kidombo uje vindo andwamweri nawo, ukawada mkate, ukaghurasimia, ukaghuchikanya ukawineka.

³¹ Nao meso ghawo ghikatambuka wikammanya, ela uo ukalaghaya.

³² Wikazerana weni na weni, “Ado siko koni ngolo redu rikoghe rikiaka andenyi kodu iji ukoghe ukiditambuya Maandiko?”

³³ Wikawuka saa ija cheni, wikawuya Jerusalemu; wikawikua waja wadumi ikumi na umweri wakwanyika chiaimweri na awo werekwanyeghe;

³⁴ wikighamba, “Loli Bwana waruka, nao wamfutukia Simoni.”

³⁵ Nao waja wanughi wawi wikawighoria agho gherebonyekieghe chienyi, na seji weremmanyireghe nyuma ya uo kughuchikanya mkate.

Jesu kuwifutukia wanughi wake

³⁶ Nao iji werekoghe wikighora malagho agho, Jesu moni ukakaia kimusi aghadi kwawo ukawizera, “Sere ndeikaie konyu.”

³⁷ Ela wikaturukia na kuobua wikiririkanya angu uo wimmbonagha ni kisuka.

³⁸ Nao ukawizera, “Kwaki mwakambwa ni chongo, na kukaia na maghesho mengi ngolonyi konyu?

³⁹ Nizighanenyi mikonu yapo, na maghu ghapo, mmbone angu ni ini moni; niwadenyi mmanye, angu kisuka ndechiwadie mumbi na maindi seji muniwonagha niko navo anduangi.”

⁴⁰ Nyuma ya kughora agho, ukawiwonyera mikonu na maghu ghake.

⁴¹ Nao iji werekoghe wiserumiriagha wikiboilwa na kushinika, ukawikotia, “Moko na kindo chingi cheja aha?”

⁴² Nao wikamneka kibelele cha samaki iochelo.

⁴³ Ukachiwada ukachija imbiri kwawo.

⁴⁴ Niko ukawizera, “Agha nigho malagho neremghorieghe iji nerekwanyeghe andwamweri nenyo, kukaia agho ghose ghereandikiloghe aighu yapo andenyi ya Sharia ra Musa, Maandiko gha walodi na Zaburi, suti ghikatisho.”

⁴⁵ Nao ukawifungua akili rawo wipate kutambukilwa ni Maandiko.

⁴⁶ Ukawizera, “Huwo niko iandikilo kukaia yamfwana Kristo utiriro, na ituku ja kadadu uruke kufuma kwa wafu.

⁴⁷ Mbari rose ripate kuchililwa kuhea na kulekwa kaung'a rawo kwa irina jake kuzoya Jerusalemu.

⁴⁸ Inyo moko mashahidi wa maza iri.

⁴⁹ Nani olenyi niamdumia aighu konyu uo orelaghiriloghe ni Aba. Ela kaienyi mzinyi, hata mneko rija ndighi rifumagha aighu.”

Jesu kujoka mlungunyi

⁵⁰ Niko ukawifunya shighadi ya muzi hata Bethania, ukaiwusira mikonu yake ukawirasimia.

⁵¹ Nao iji orekoghe ukiwirasimia, ukatana nawo, ukadwalwa noko aighu mlungunyi.

⁵² Nawo wikamtasa na kuwuya Jerusalemu, kwa kuboilwa kubaa.

⁵³ Wikakaia Hekalunyi ngelo rose wikimkasa Mlungu.