LUKA 21 - Biblia Ilagho Jiboie Kwa Wandu Wose

Ifunyo ja muka mkiwa

¹ Nao Jesu ukizighana ukawona wandu wiko na mali wikikumba mafunyo ghawo isandukunyi ja mali ra Hekalu;

² ukammbona muka mkiwa ukikumba pesa iwi ra shaba.

³ Nao ukaghamba, “Namghoria loli, uhu muka mkiwa wakumba nyingi kuchumba wose;

⁴ angu awo waakumba kufumanya na wungi ghwa mali rawo, ela uo, kwa wukiwa ghwake, wakumba rose uko naro.”

Jesu kughora aighu ya kunoneka kwa Hekalu

⁵ Nao wanughi wamu wikawoka kuja malagho aighu ya Hekalu, seji ipambilo na magho ghiboie, na manosi ghifunyiro kwa Mlungu. Jesu ukaghamba,

⁶ “Agha ghose mughiwonagha, ngelo ichacha msechaawona igho jingi aighu ya mmbao, jisechaaghushwa andoenyi anduangi.”

Wasi na matiriro

⁷ Nao wikamkotia, “Mwalimu, maza iri richakaia lii? Na alama yaro ewonyera maza iro kucha ni iao?”

⁸ Jesu ukawitumbulia, “Mkulindie msechelaghashwa, angu wandu wengi wichacha wikitumia irina japo na kughamba, ‘Ini nuo moni!’ na ‘Ngelo yavika!’ Msakewinugha.

⁹ Msakeobua iji mwasikira malagho gha wuda na nganyi angu maza iro suti rizoe riche, ela kuja kutua ndekulighisire kande anduangi.”

¹⁰ Nao ukachuria kughora, “Masanga ghichalwa gheni na gheni, na mawuzuri gheni na gheni;

¹¹ kuchakaia na misughusiko mibaa ndoenyi, njala na saka rizamie andu kuzima kuzima, kuchakaia na maza mbaa reobosha riwonekagha mawingunyi.

¹² Ela imbiri ya maza iri rose kuwoneka, wichammbwada inyo na kumtirira, wichamghenja mandunyi ya sunagogi, wipate kumngira kifungonyi, mchaghenjwa imbiri ya wazuri na awo wibonyagha nguma, kwa wundu ghwa irina japo.

¹³ Ihi ichakaia ni ngelo enyu efunya wushuhuda.

¹⁴ Kaienyi mmange ngolonyi konyu msecheja wasi, wei mchatumbulia wada;

¹⁵ angu ini nichamneka malagho na hikima, hata mndungi usechaadima kumtangala anduangi.

¹⁶ Mchafunywa hata ni wavi wenyu, wanyinyu, wandu wa kichuku, na waghenyi wenyu, na wamu wenyu mchabwaghwa.

¹⁷ Wandu wose wichazamilwa ni inyo kwa wundu ghwa irina japo.

¹⁸ Ela hata iridia jimweri ja chongonyi konyu, ndejichaatota anduangi.

¹⁹ Kwa kurumaghia konyu, mchakira marangi ghenyu.

Jesu kughora aighu ya kunonwa kwa Jerusalemu

²⁰ “Iji mwawona Jerusalemu yamarwa ni majeshi, aho mmanye angu kunoneka kwaro kwalighisa.

²¹ Aho, awo wiko Judea ndewikimbirie mighondinyi, na awo wiko andenyi ya muzi wifume, na awo wiko shighadi ya muzi wisakengia.

²² Angu agho ghichakaia ni ‘Matuku Ghekabwa,’ kukatisha agho ghose ghiandikilo.

²³ Si wasi ugho kwa awo wiko na vifu na awo wiongoshagha matuku agho! Angu kuchakaia na matiriro mabaa isangenyi, na machu gha Mlungu ghichakaia aighu ya wandu awa.

²⁴ Wandu wamu wichabwaghwa kwa lufu, na wazima wichadwalwa wunyika kwa masanga ghose; na Jerusalemu ichawadilwa-wadilwa ni wandu wa mbari zima hata ngelo ya wandu wa mbari zima yakatia.

Kucha kwake Mwana wa Mdamu

²⁵ “Kuchakaia na alama andenyi ya iruwa, mori na nyerinyeri, na ndoenyi mbari richakaia na wasi na kukambwa ni chongo, kwa wundu ghwa mirurumo ya bahari na mivo-mivo yaro.

²⁶ Wandu wichazimia kwa wowa, wikiweseria icho chichaaghupata wurumwengu, kwa kukaia ndighi ra mlungunyi richasukwa-sukwa.

²⁷ Niko aho wichaammbona Mwana wa Mdamu ukicha andenyi ya iwingu uko nandighi na wubaa mungi.

²⁸ Maza iri rikazoya kuwoneka, mkaie kimusi na kuwusira vongo venyu noko ighu, angu kukombolwa konyu kwavika kaavui.”

Ifundisho kwa mtini

²⁹ Nao ukawighoria mfwano; “Zighanenyi mtini, na midi mizima wori.

³⁰ Iji mwawona longe lwaro lukifunya malemba makoo, mwadamanya angu sumesu yalighisa.

³¹ Woruwo koni, iji mwawona maza iri rikikaia, manyenyi angu Wuzuri ghwa Mlungu ghoko kaavui.

³² Namghoria loli, kivalwa ichi ndechichaaida anduangi, maza iri rose risebonyekie.

³³ Mlungunyi na ndoenyi kuchaida, ela madedo ghapo ndeghichaaida anduangi.

Kucheresha

³⁴ “Mkulindie, ngolo renyu risechechulwa ni lwafuo, kuwongia, na maza ra irangi iji; Ituku ijo jichemchea ghafla msemanyagha.

³⁵ Angu jichawichea wandu wose wiko ndoenyi sa mdegho.

³⁶ Ela chereshenyi ngelo rose mkilomba, mpate kukaia nandighi rekia maza iri rose richagha, sena mdime kukaia kimusi imbiri ya Mwana wa Mdamu.”

³⁷ Na kula ituku, Jesu orekoghe ukifundisha Hekalunyi, ela nakio orekoghe ukifuma kwendalala aighu ya Mghondi ghwa Mizeituni.

³⁸ Nakesho kio wandu wose werekoghe wikicha kumsikiria.