LUKA 20 - Biblia Ilagho Jiboie Kwa Wandu Wose

Ikoto aighu ya nguma ya Jesu

¹ Ituku jimu, iji Jesu orekoghe ukifundisha Hekalunyi, na kuchila ijo Ilagho Jiboie, wakohani wabaa, walimu wa Sharia, na waghosi, wikamchea;

² wikamzera, “Dighorie, kwawuyabonya maza iri kwa ngumaki; angu nani orekunekieghe iyo nguma?”

³ Jesu ukawitumbulia, “Na ini wori nichamkotia ikoto munighorie,

⁴ welee, nguma ya Johane ebaputiza edefuma kwa Mlungu angu kwa wadamu?”

⁵ Nao wikatumbuliana weni na weni wikighamba, “Dikaghamba, ‘Edefuma kwa Mlungu,’ uchaghora, ‘Kwaki sena mseremrumiriagha?’

⁶ Sena dikaghamba, ‘Edefuma kwa wadamu,’ wandu wose wichadilasa na magho, angu weremrumirieghe Johane kukaia mlodi.”

⁷ Niko wikatumbulia, “Ndedimanyire andu erefumieghe anduangi.”

⁸ Nao Jesu ukawizera, “Na ini wori simghoriagha ni kwa ngumaki niribonyagha maza iri anduangi.”

Mfwano ghwa mbuwa ya mizabibu na walimi wepangisha

⁹ Niko Jesu ukawighoria wandu mfwano ughu: “Korekoghe na mundu umu orewaeghe mbuwa ya mizabibu, ukaipangisha walimi, ukadamba noko cha isanga ja kula kwa ngelo ndacha.

¹⁰ Ngelo ekuwida zabibu iendavika, ukamduma mdumiki wake umu uneko matunda ghamu gha mbuwa ya mizabibu. Ela waja walimi wipangie, wikamkaba uja mdumiki na kummbunja usedwae kindo chingi.

¹¹ Ukaduma umu sena, nao moni wikamkaba na kum'bonya kiwiwi loli-loli, wikammbunja mikonu miduu.

¹² Nao ukaduma umu wa kadadu, na awo walimi wikamshoghonua na kumkumba shighadi.

¹³ Niko uja bwana wa mbuwa ya mizabibu ukaghamba, ‘Nibonya wada? Nichamduma mwana wapo mkundwa, kewada uo wichamneka ishima.’

¹⁴ Ela iji awo walimi wammbona, wikazerana weni na weni, ‘Uhu nuo mundu wa ifwa; nndokonyi dim'bwaghe ifwa jipate kuwuya jedu.’

¹⁵ Niko wikamkumba shighadi ya mbuwa ya mizabibu wikam'bwagha.” “Idana uja mundu wa mbuwa uchawibonya wada waja walimi?

¹⁶ Uchacha na kuwitotesha, na mbuwa ya mizabibu uchaipangisha walimi wazima.” Nao iji wasikira agho wikaghamba, “Huwo mbai!”

¹⁷ Nao Jesu ukawizighana na kughamba, “Da sena agha maandiko kutambua kwaro ni wada? ‘Igho werejileghieghe waaghi, nijo jeni jawuya ibaa ja mbembenyi.’

¹⁸ Uo ose ughwagha aighu ya igho ijo, uchachika-chika; na uhu jichaamghuya, jichamfasha putu.”

Ikoto aighu ya kulipa kodi

¹⁹ Walimu wa Sharia na wakohani wabaa weremanyireghe angu Jesu oreghorieghe mfwano ugho kwa wundu ghwawo, wikakunda kummbwada ija ngelo cheni, ela werewiobueghe wandu.

²⁰ Kwa huwu wikakaia wikilola ngelo ifwane, wikammbikia washeki wemzighanira, wikubonyagha weni kukaia waloli kwa Jesu, wipate ilagho jingi kwake jemshitakia kwa wabaa wa serikali.

²¹ Nao awo washeki wikamzera, “Mwalimu, dakumanya kwadaghora na kufundisha kwa hachi, hata ndekutalagha mndungi, ela kwadafundisha chia ya Mlungu kwa loli.

²² Idana dighorie, ni hachi isi dilipe kodi kwa Kaisari anguwada?”

²³ Jesu ukaghutambua mdegho ghwawo ukawizera,

²⁴ “Niwonyerenyi pesa. Welee, maandiko agha na fwana ihi ni vani?” Wikatumbulia, “Ni va Kaisari.”

²⁵ Jesu ukawizera, “Kwa huwu mlipenyi Kaisari vilambo va Kaisari, na Mlungu vilambo va Mlungu.”

²⁶ Hata ndeweredimieghe kummbwada kwa malagho ghake imbiri ya wandu anduangi, ela wikanyama kima wikishinikia agho matumbulio ghake.

Ikoto aighu ya kuruka

²⁷ Nao Masadukayo wamu, awa wighambagha ndekuko kuruka kungi kwa wafu wikamchea Jesu wikighamba,

²⁸ “Mwalimu, Musa orediandikieghe, ‘Mundu ukafuilwa ni mruna, nao wasigha muka usevae nao mwana ungi, suti ummbuse uo muka, umvaie mruna wana.’

²⁹ Nao korekoghe na wandu mfungade, uja wa imbiri ukalowua muka, ukafwa usepatire mwana ungi;

³⁰ huwo koni na wa kawi, ukamlowua uja muka;

³¹ hata wa kadadu wori. Na kutua wose mfungade wikafwa wisepatire mwana ungi.

³² Konyuma uja muka moni ukafwa.

³³ Da kurukenyi-lee, uo muka uchakaia wani, na wose mfungade weremlowueghe?”

³⁴ Nao Jesu ukawizera, “Wandu wa ngelo iri wadalowua na kulowolwa,

³⁵ ela awo witalwagha kukaia wafwana kuruka na kukaia moyo kwa ngelo iro richagha, ndewilowuagha hata ndewilowolwagha,

³⁶ angu ndewiwuyaafwa sena anduangi, kwa kukaia wakaia karakara na weke malaika, nawo ni wana wa Mlungu, angu wameria kuruka kufuma kwa wafu.

³⁷ Na kwa malagho gha kuruka kwa wafu, hata Musa wawonyere kwa malagho gha chija kisachi chereakagha modo, andu ummbangagha Bwana, kukaia Mlungu wa Abrahamu, Mlungu wa Isaaka, na Mlungu wa Jakobo.

³⁸ Uo ndekaiagha Mlungu wa wafu anduangi, ela wa awo wiko moyo; angu kwake, wandu wose weko moyo.”

³⁹ Nao walimu wamu wa Sharia wikaghamba, “Mwalimu, kwatumbulia nicha.”

⁴⁰ Nawo ndeweredimieghe sena kumkotia ilagho jingi anduangi.

Ikoto aighu ya Kristo

⁴¹ Nao Jesu ukawikotia, “Yakaia wada kughora wei Kristo ni mwana wa Daudi?

⁴² Angu Daudi moni waghora kwa chuo cha Zaburi: ‘Bwana oremzerieghe Bwana wapo, sea kidombo chia ya mkonu ghwapo ghwa kiwomi;

⁴³ hata niwibonye wamaiza wako wikaie kifumbi chewikiria maghu ghako.’

⁴⁴ Ikakaia Daudi moni wammbanga Bwana, uwuya ukaie wada mwana wake sena?”

Jesu kuonya aighu ya walimu wa Sharia

⁴⁵ Nao iji wandu werekoghe wikimsikiria, Jesu ukawizera wanughi wake,

⁴⁶ “Mkulindie na walimu wa Sharia, awo wikundagha kusela na nguwo ndacha, na kukunda kurogholwa masokonyi, na kukunda vifumbi viboie andenyi ya sunagogi, na andu kwa ishima karamunyi;

⁴⁷ nawo wawija waka wakiwa, na ichia wialomba malombi mengi gha mikalo. Awo wichapata kutanywa kubaa.”