LUKA 2 - Biblia Ilagho Jiboie Kwa Wandu Wose

Kuvalwa kwa Jesu

¹ Matuku ghaja, itangazo jerefumieghe kwa Kaisari Augusto, angu wandu wose wa wuzuri ghwake wiandikisho.

² Nako korekoghe kuandikishwa kwa imbiri, iji Kuirinio orekoghe m'baa wa Siria.

³ Wandu wose wikaghenda kuandikishwa, kula umu kwa muzi ghwake.

⁴ Na Josefu wori wa muzi ghwa Nazareti, ukajoka kufuma Galilaya kwenda Judea muzi ghwa Daudi, ghuwangwagha Bethlehemu, angu orekoghe wa kivalwa cha Daudi;

⁵ uandikisho andwamweri na mchumba wake Maria, nao orekoghe na kifu.

⁶ Hata iji werekoghe aho, matuku ghake gheva ghikakatia.

⁷ Ukava mwana wake wa imbiri wa womi, ukamrighiria nguwo ra kiwanake, ukamrarisha andu mfugho rijiagha kiwandenyi, angu ndekorekoghe na wulalo ghungi nyumbenyi kwa waghenyi anduangi.

Walisha na weke malaika

⁸ Andenyi ya isanga jija jeni, korekoghe na walisha mlambenyi, wikilindia mfugho rawo nakio.

⁹ Nao malaika wa Bwana ukawifutukia, na wubaa ghwa Bwana ghukang'ala-ng'ala chia rose kwawo, nawo wikaobua nandighi.

¹⁰ Malaika ukawizera, “Msakeobua, angu namredia inyo malagho mecha gha kuboilwa kubaa kuchaakaia kwa wandu wose;

¹¹ angu idime koni, Mkiri wavalwa kwa wundu ghonyu mzinyi kwa Daudi, na ni Kristo Bwana.

¹² Na ihi niyo alama emmbonyera, mchakiwona kana kakoo karighirilwa nguwo ra kiwanake, kararishwa andu mfugho rijiagha kiwandenyi.”

¹³ Nao shwa jikawoneka izungu ja mlungunyi andwamweri na uja malaika, jikimkasa Mlungu na kughamba,

¹⁴ “Wubaa ghukaie kwa Mlungu aighu na ndighi, na sere andoenyi kwa wandu; awo uboilwagha nawo!”

¹⁵ Nao iji weke malaika wereghendighe noko cha mlungunyi kufuma kwawo, awo walisha wikazerana, “Nndokonyi dighende Bethlehemu, diriwone iro maza rakaia, iro damanyishwa ni Bwana.”

¹⁶ Wikaghenda shwa-shwa, wikammbona Maria, Josefu, na kana kakoo kararishwa andu mfugho rijiagha kiwandenyi.

¹⁷ Nao iji walisha wammbona, wikawighoria malagho ghose wereghoreloghe ni malaika gha uja mwana.

¹⁸ Na wose weresikireghe wikashinika kwa agho wereghoreloghe ni walisha.

¹⁹ Ela Maria ukaghiwika agho malagho ukighiririkanya ngolonyi kwake.

²⁰ Na walisha wikawuya wikimkasa Mlungu kwa agho ghose wereghisikireghe na kughiwona sa iji koni wereghoreloghe.

Jesu kunekwa Irina

²¹ Hata iji ituku ja wunyanya jerevikieghe, wikamshamisha na kummbanga irina jake Jesu, sa iji koni jereghoreloghe ni malaika imbiri ya uo kuamwa kifunyi.

Jesu kughenjwa Hekalunyi

²² Nao iji yavika ngelo ya kueleshwa kwawo, karakara na Sharia ya Musa, wikamreda Jerusalemu, kummbika kwa Bwana.

²³ Sa iji koni iandikilo sharienyi kwa Bwana, “Kula mwana wa womi uzoyagha kuvalwa, uchafunywa kwa wudumiki ghwa Bwana,”

²⁴ na kufunya kizongona cha mbughi iwi, angu vana viwi va maringo, sa iji koni ighorelo sharienyi kwa Bwana.

Lumbo lwa Simeoni

²⁵ Nao ahoeni Jerusalemu, korekoghe na mundu uwangwagha Simeoni. Mundu uhu orekoghe mundu wa hachi umuobuagha Mlungu, nao orekoghe ukighuwesera ghuja wuhoreshi ghwa Israeli, na Roho Mweli orekoghe aighu kwake.

²⁶ Orekoghe wawonyerwa ni Roho Mweli angu ndechaawona kifwa anduangi, hata ummbone Kristo wa Bwana.

²⁷ Nao ukighenjwa ni Roho, Simeoni ukangia Hekalunyi; hata iji wavi wamreda uo mwana Jesu kum'bonyera karakara na Sharia,

²⁸ Simeoni ukamwambaria mikonunyi kwake ukamkasa Mlungu ukighamba,

²⁹ “Idana Bwana msighe mzumba wako ughende kwa sere, kunughana na ijo Ilagho jako;

³⁰ angu meso ghapo ghakuwona kukia kwako,

³¹ uko korekuboisireghe worinyi imbiri ya wandu wose.

³² Mwengere ghowilangalishira wandu wa mbari zima, na kwa wundu ghwa wubaa ghwa wandu wako Israeli.”

³³ Ndee na mae wikashinika kwa wundu ghwa agho ghereghoreloghe aighu yake.

³⁴ Nao Simeoni ukawirasimia ukamzera Maria, mae mwana, “Ola mwana uhu wawikwa kwa wundu ghwa kughwa na kuwuka kwa wengi andenyi ya Israeli, na kwa alama etangalwa ni wandu;

³⁵ na luwawo lubirie sa lufu luchaidunga ngolo yako, eri maririkanyo gha ngolo ra wandu wengi, ghipate kufunukulwa.”

³⁶ Na aho korekoghe na mlodi wa waka, uwangwagha Ana mfwa Fanueli, wa mbari ya Asheri, ughosere na ndighi. Orekanyeghe na mumi kwa miaka mfungade nyuma ya kulowuana kwawo.

³⁷ Orekoghe na miaka mirongo wunyanya na inya, ukikaia muka ufulo ni mumi wake; nao orekoghe usefumagha Hekalunyi, ukitasa na kufunga tumu, na kulomba Mlungu kio na dime.

³⁸ Nao ukicha kwa saa ija cheni, ukamfunyira Mlungu chawucha, nao ukaghora malagho gha uo mwana worinyi kwa wose werekoghe wikikuweseria kuja kukombolwa kwa Jerusalemu.

Kuwuya kwawo Nazareti

³⁹ Hata iji wameria kubonya maza rose karakara na Sharia ya Bwana, wikawuya Galilaya, mzinyi kwawo koni Nazareti.

⁴⁰ Nao uja mwana ukazoghua na kukaia na ndighi, uchuagha hikima; na mvono ghwa Mlungu ghorekoghe aighu kwake.

Uja mwana Jesu kusigharika Hekalunyi

⁴¹ Wavi wake werekoghe wikighenda Jerusalemu kula mwaka kwa Ndima ya Pasaka.

⁴² Nao iji orevikieghe irika ja miaka ikumi na iwi, wikajokanya karakara na mzango ghwawo;

⁴³ hata iji Ndima yameria kusia, wikazoya kughala; ela uja mwana Jesu ukasigharika na nyuma aja Jerusalemu. Na wavi wake ndewerejimanyireghe ilagho ijo anduangi,

⁴⁴ ela wedeeka wikighesha wei oko aeni charonyi. Nawo iji waghenda charo cha ituku jimweri, wikazoya kumlola kwa wakwawo na waghenyi wawo;

⁴⁵ hata iji wamsowa, wikawuya Jerusalemu wikimlola.

⁴⁶ Nao nyuma ya matuku adadu wikammbona Hekalunyi uko kidombo aghadi ya walimu, ukiwisikiria na kukotiana nawo makoto.

⁴⁷ Na wose weremsikireghe, wikashinika kwa uko kumanya kwake na uko kutumbulia kwake wori.

⁴⁸ Nawo iji wammbona wikashinika; mae ukamzera, “Wele mwanwapo, kwadibonyere kwaki huwu? Zighana seji ini na ndeyo dijie wasi dikikulola.”

⁴⁹ Ukawizera, “Kwaki morenilolagha? Welee, ndemmanyire angu yanifwana kukaia nyumbenyi kwa Aba?”

⁵⁰ Nawo ndeweretambukiloghe ni agho madedo orewizeragha anduangi.

⁵¹ Nao ukaghendanya nawo hata Nazareti, ukakaia ukiwisikira, na mae ukaghiwika malagho agho ghose ngolonyi kwake.

⁵² Jesu ukachurikia hikima na kuzoghua, ukikundwa ni Mlungu na wandu.