LUKA 18 - Biblia Ilagho Jiboie Kwa Wandu Wose

Mfwano ghwa muka mkiwa na mtanyi

¹ Niko Jesu ukawighoria wanughi wake mfwano ughu ghuwonyeragha kukaia yawifwana kufunga ndighi kulomba Mlungu, hata wisefo ngolo.

² Ukaghamba, “Korekoghe na mtanyi muzi ghumu useremuobueghe Mlungu, hata kumtala mndungi anduangi.

³ Na ghuja muzi ghoni, korekoghe na muka ufulo ni mumi wake, orekoghe ukimchea uja mtanyi matuku ghose ukighamba, ‘Nitanye na m'maiza wapo.’

⁴ Nao uja mtanyi ukakaia ukimleghia kwa ngelo ndacha, ela konyuma ukaghora ngolonyi kwake, ‘Hata ngera ini simuobuagha Mlungu, angu kumtala mndungi,

⁵ ela kwa kukaia muka uhu wawuyanisumbua huwu, nichamtanyira hachi yake, usechenisirisha ndighi kwa kulalacha kwapo huwu.’”

⁶ Nao Bwana ukaghamba, “Sikirenyi seji uja mtanyi mmbiwi ughoragha.

⁷ Welee, na Mlungu nao ndechaawitanyira hachi wasaghulwa wake wimliliagha kio na dime anguwada? Loli uchamuka kuwitesia?

⁸ Namghoria, uchawitanyira hachi shwa-shwa. Ela kukakoni-lee, iji Mwana wa Mdamu wacha, uchajiwona irumirio ndoenyi?”

Mfwano ghwa Mfarisayo na mmbwadi wushuru

⁹ Jesu ukaghora mfwano ughu wori, kwa wandu werekurumirieghe weni kukaia wahachi na kuwimenya wambao.

¹⁰ “Korekoghe na wandu wawi werejokieghe Hekalunyi kulomba Mlungu; umu orekoghe Mfarisayo, na mzima mmbwadi wushuru.

¹¹ Uja Mfarisayo ukakaia kimusi ukalomba ngolonyi kwake ukighamba, ‘Nakufunyira chawucha ee Mlungu, kwa kukaia ini siko sa wandu wazima, wa lwafuo, wawiwi, walaki, na hata sa uhu mmbwadi wushuru.

¹² Nadafunga tumu mando awi kwa njumwa, nadafunya ifungu ja ikumi ja mapato ghapo ghose.’

¹³ Ela uja mmbwadi wushuru ukakaia kula koni, nao nderekundieghe hata kuwusira meso ghake cha mlungunyi, ela ukakukaba-kaba moni laghenyi kwake ukighamba, ‘Ee Mlungu, kunifue wughoma ini mundu wa kaung'a.’”

¹⁴ Nao Jesu ukaghamba, “Namghoria, mmbwadi wushuru oreserieghe nyumbenyi kwake wanekwa hachi kuchumba Mfarisayo. Angu uhu ukujosagha moni, uchaserwa, na uhu ukuseragha moni, uchajoswa.”

Jesu kuwirasimia wanake watini

¹⁵ Nao wandu wamu wikamredia Jesu wanake wawo watini upate kuwiwikiria mikonu yake, ela wanughi wiendawiwona wikawikemia.

¹⁶ Jesu ukawiwanga ukighamba, “Wilekenyi wanake wiche kwapo msakewighiria, angu Wuzuri ghwa Mlungu ni ghwa awo wiko sa awa.

¹⁷ Namghoria loli, uo ose useghuwusagha Wuzuri ghwa Mlungu sa mwanake mtini, na jingi ndechaangia andenyi kwaro anduangi.”

Mzuri umu wa mali

¹⁸ Kilongozi umu ukamkotia Jesu, “Mwalimu mucha, nibonya wada nijipate irangi ja kala na kala?”

¹⁹ Jesu ukamkotia, “Kwaki kwaniwanga mucha? Ndekuwadie ungi uko mucha, ela Mlungu moni.

²⁰ Nechi kwaichi memu, ‘Kusakelaka, kusakebwagha, kusakeiwa, kuseshuhudie tee, kuwineke ishima ndeyo na mayo.’”

²¹ Nao ukaghamba, “Ihi yose naiwadie kufuma wanake ghwapo.”

²² Jesu uendasikira agho ukamzera, “Kwasighwa ilagho jimweri; uza vose kuko navo kuwiwaghie wakiwa, na oho kuchakaia na mali mlungunyi, sena kuche kuninughe.”

²³ Nao iji wasikira agho, ukakaia na wasi angu orekoghe na mali nyingi.

²⁴ Nao iji Jesu wammbona seji wakaia na wasi, ukaghamba, “Kwakurie saki kwa wandu wiko na mali kungia kwa wuzuri ghwa Mlungu.

²⁵ Kwaangue ngamila kuida ilanga ja siziano, kuchumba mundu uko na mali kungia kwa wuzuri ghwa Mlungu.”

²⁶ Awo wandu werekwanyeghe wiendasikira huwo wikaghamba, “Idana nani udimagha kukia?”

²⁷ Ela Jesu ukaghamba, “Agho ghisedimikagha kwa wandu ghadimika kwa Mlungu.”

²⁸ Petro ukamzera, “Zighana isi dasighie mizi edu dikakunugha.”

²⁹ Niko Jesu ukawizera, “Nani namghoria loli, kula mundu usighie muzi, angu muka, angu waruna, angu wavi, angu wana, kwa wundu ghwa Wuzuri ghwa Mlungu,

³⁰ uchapata mando mengi kuchumba agho ngelo ihi, na sena irangi ja kala na kala ngelo ichagha.”

Jesu kughora aighu ya kifwa chake indo ja kadadu

³¹ Nao Jesu ukawidwa wanughi wake kambai ukawizera, “Olenyi diajoka Jerusalemu, na agho malagho ghose ghiandikilo ni walodi aighu ya Mwana wa Mdamu ghichakatishwa.

³² Angu uchafunywa kwa wandu wa mbari zima, nawo wichamseka, wicham'bonya kiwiwi, na kumchuya mada;

³³ wichamkaba na viboko na kum'bwagha, na ituku ja kadadu ucharuka.”

³⁴ Ela wanughi ndeweredimieghe kumanya agho Jesu orekoghe ukighora anduangi.

Jesu kum'boisa mlombi ufue meso

³⁵ Nao iji Jesu orevikieghe kaavui na Jeriko, mndumu ufue meso orekoghe kidombo mbai na mbai ya chia ukilomba.

³⁶ Iji wasikira izungu jikiida ukakotia, “Niki icho?”

³⁷ Nawo wikamtumbulia, “Ni Jesu wa Nazareti uidagha.”

³⁸ Nao ukakema ukighamba, “Jesu, Mwana wa Daudi niwonie wughoma!”

³⁹ Niko awo wandu werekirieghe wikamkemia wikimzera unyame kima. Ela ukakema nandighi kuchumba ukighamba, “Mwana wa Daudi, niwonie wughoma!”

⁴⁰ Jesu ukadunga maghu, ukafunya momu uja mundu ufue meso uredo kwake. Hata iji wacha kaavui Jesu ukamkotia,

⁴¹ “Kwakunde nikubonyereki?” Nao ukatumbulia, “Bwana, neekunda kuwona sena.”

⁴² Jesu ukamzera, “Haya wona, irumirio jako jakuboisa.”

⁴³ Nao shwa wori ukawona, ukamnugha ukimneka Mlungu wubaa; na wandu wose iji werewonieghe agho wikamkasa Mlungu.