LUKA 14 - Biblia Ilagho Jiboie Kwa Wandu Wose

Jesu kum'boisa mkongo

¹ Ituku jimu ja Sabato, Jesu oreghendieghe kuja vindo nyumbenyi kwa m'baa umu wa Mafarisayo, na wandu werekoghe wikimzighanira.

² Nao ukacha mundu imbiri kwake uko na saka ya mavunde;

³ na Jesu ukaghora na walimu wa Sharia na Mafarisayo ukighamba, “Welee, Sharia edu yarumiriagha kuboisa ituku ja Sabato anguwada?”

⁴ Ela awo wikanyama kima. Niko Jesu ukammbwada ukam'boisa ukamsigha ughende.

⁵ Nao ukawizera, “Nani onyu usedimagha kumfunya mwanwake, angu ng'ombe yake shwa-shwa iji yachunukia kinenyi ituku ja Sabato?”

⁶ Nawo ndeweredimieghe kumtumbulia anduangi.

Wucha na kukusera

⁷ Nao ukawighoria mfwano awo werekaribishiroghe, angu orewiwonieghe seji weresaghueghe malalo gha ishima, ukaghamba,

⁸ “Iji mndungi wakuwanga harusinyi, kusakesea kidombo wulalo ghwa ishima, isechekaia mndumu m'baa ukuchumbie wawangwa,

⁹ na uo oremmbangieghe inyo mmbose wawi uche ukuzere, ‘M'barie uhu mundu ughu wulalo.’ Niko aho kuchawuka na waya kuwuse ugho wulalo ghwa ndonyi.

¹⁰ Ela oho iji kwawangwa, ghenda kusee kidombo wulalo ghwa ndonyi, eri uo orekuwangieghe ukacha ukuzere, ‘Mghenyi wapo, ghenda aja imbiri.’ Niko aho kuchanekwa ishima imbiri ya wose mkwanye mezenyi.

¹¹ Angu uo ose ukujosagha moni uchaserwa, na uo ose ukuseregha moni, uchajoswa.”

¹² Niko Jesu ukamzera uja oremkaribishireghe, “Iji kwabonya karamu ingi, kusakewiwanga waghenyi wako, angu wanyinyu, angu wandu wa kichuku chako, hata wambenyu wiko na mali, isechekaia nawo weni kukukaribisha nao kupate malipo ghako.

¹³ Ela iji kwabonya karamu, kuwange wakiwa, watighini, wakelemeri, na vitungure;

¹⁴ na oho kucharasimilwa, angu wisechaadima kukulipa. Na oho kuchalipwa ituku ja kurukenyi kwa wahachi.”

Mfwano ghwa Ndima mbaa

¹⁵ Nao iji umu wa waja wereserieghe kidombo wasikira agho ukamzera, “Warasimilwa uo uchaaja mkate kwa Wuzuri ghwa Mlungu.”

¹⁶ Jesu ukamzera, “Kala, mndumu orebonyereghe karamu mbaa, ukawiwanga wandu wengi.

¹⁷ Nao iji ngelo ya karamu yavika, ukamduma mdumiki wake ukawizera waja werewangiloghe, ‘Choonyi, vindo vose vakaia tayari.’

¹⁸ Ela wose umu-umu wikazoya kukudederia. Wa imbiri ukaghamba, ‘Naghua mbuwa na ni suti nighende kuizighana; nakulomba kunisighe.’

¹⁹ Na umu ukaghamba, ‘Naghua ng'ombe ikumi relima, nani niaghenda kuritima; nakulomba kunisighe.’

²⁰ Na umu ukaghamba, ‘Nalowua muka, kwa huwu sidimagha kucha anduangi.’

²¹ Niko uja mdumiki ukawuya na kumghoria bwana wake. Uja mundu wa nyumba ukajokwa ni machu, ukamzera mdumiki wake, ‘Ghenda shwa-shwa kwa chia mbaa, na chia ndini ra mizi, kuwirede aha wakiwa, watighini, wakelemeri, na vitungure.’

²² Nao uja mdumiki ukaghamba, ‘Bwana iro korelaghirieghe rameria kubonyeka, na wulalo ghumu ghoko aeni.’

²³ Uja bwana ukamzera mdumiki wake, ‘Ghenda chia ra matano na manonyi yose, kuwishingire wandu kucha, nyumba yapo ipate kuchua.

²⁴ Angu namghoria, awandu wose werewangiloghe, ndekuwadie ungi uchaatoa vindo vapo anduangi.’”

Ighuri ja kukaia mnughi wa Jesu

²⁵ Nao izungu ibaa ja wandu jerekoghe jikinughana nao, ukaghaluka na kuwizera,

²⁶ “Mndungi ukacha kwapo, usezamilo ni ndee, na mae, na mkake, na wana wake, na waruna wa waka na wa womi, hata na irangi jake wori, ndedimagha kukaia mnughi wapo anduangi.

²⁷ Sena uo ose usedukagha msalaba ghwake na kuninugha, ndedimagha kukaia mnughi wapo anduangi.

²⁸ Nani konyu ukakunda kuagha mnara, useseagha kidombo na kutala ighuri jaro ngera oko na pesa rikate ra kughumeria.

²⁹ Isechekaia nyuma ya kuagha msingi, ulemo ni kughumeria, na wandu wose wiwonagha, wizoe kumseka wikighamba,

³⁰ ‘Mundu uhu orezoeghe kuagha, ukalemwa ni kumeria.’

³¹ Angu oko mzuri uao ughendagha kulwa na mzuri mmbao, useseagha kidombo kande, na kubonya njama ngera wadima kulwa na uo uchagha na wandu elfu mirongo iwi, kwa wandu elfu ikumi uko nawo.

³² Nao iji wawona ndedimagha, waduma wandu kulola mapatano gha sere, iji uja mzuri mmbao uduagha kula.

³³ Ni huwo koni uo ose usesighagha vose uko navo, ndedimagha kukaia mnughi wapo anduangi.”

Kiserere chisewadie fwaida

³⁴ “Kiserere ni kindo kicha, ela chikafumwa ni kusinga kwaro, chichalungwa naki?

³⁵ Ndechifwanagha kwa ndoe, hata kwa mbolea, ela wandu wadachidagha noko. Uo uko na madu ghesikira ndesikire.”