KUZOYA 4 - Biblia Ilagho Jiboie Kwa Wandu Wose

Kaini na Abeli

¹ Nao Adamu ukammanya mkake Hawa, ukapata kifu, ukamva Kaini. Ukaghamba, “Nampata mwana wa womi kwa wutesia ghwa BWANA.”

² Na sena ukava mwana umu wa womi, Abeli. Abeli orekoghe mlisha wa ng'ondi, na Kaini orekoghe mlimi.

³ Nyuma ya matuku ghamu, Kaini ukamredia BWANA vizongona va makuwido gha mavalo ghamu gha ndoe.

⁴ Abeli nao ukareda wavalwa wa imbiri wa mfugho rake, ukafunya vizongona vinorie, na Mlungu ukamrumiria uo na kizongona chake wori;

⁵ ela nderemrumirieghe Kaini na kizongona chake anduangi. Kaini ukawawa nandighi na kukucha wushu ghwake kwa machu.

⁶ Nao BWANA ukamzera Kaini, “Kwaki kwakaia na machu? Na kwaki kwaghukucha wushu ghwako?

⁷ Welee, kukabonya nicha ndekurumirilwagha? Iji kusebonyere nicha, kaung'a eko aeni, nayo yawuyakulaliria mnyangonyi ikikulola, yaawuyakukunda; ela suti kuisime.”

⁸ Kaini ukamzera mruna Abeli, “Nndoko disele noko cha mbuwenyi.” Hata iji werekoghe aho mbuwenyi, Kaini ukamchumbia mruna Abeli ukam'bwagha.

⁹ BWANA ukamkotia Kaini, “Welee, mwanyinyu Abeli oko hao?” Ukatumbulia, “Simanyire. Neeka mlindiri wa mwanidu?”

¹⁰ Aho BWANA ukamzera, “Kwabonya wada? Lwaka lwa bagha ya mwanyinyu lwawuyakema imbiri kwapo kufuma ndoenyi.

¹¹ Idana kwawasirwa njowe oho kufuma kwa iyo ndoe yatambarua momu ghwake na kuimila bagha ya mwanyinyu, uhu kwam'bwagha kwa mkonu ghwako.

¹² Iji kwailima ndoe, ndeichaakuneka mavalo ghangi, kuchakaia kusewadie muzi na mundu omara-mara ndoenyi.”

¹³ Nao Kaini ukamzera BWANA, “Ikabo japo janichumba ndighi.

¹⁴ Zighana, oho kwaniwinga nifume ndoenyi, nani nichavisika mesonyi kwako, nichakaia mundu omara-mara ndoenyi na uo ose uchaaniwona uchanibwagha.”

¹⁵ Niko BWANA ukamzera, “Si huwo kungi, ngera mndungi wakubwagha oho, uchalipilwa ngenga mando mfungade.” Nao BWANA ukam'bonya Kaini alama eri mndungi ukakwana nao usem'bwaghe.

¹⁶ Niko Kaini ukafuma imbiri ya BWANA, ukakaia isanga ja Nodi, mashariki ya Edeni.

Kivalwa cha Kaini

¹⁷ Nao Kaini ukammanya mkake, ukapata kifu ukava mwana wa womi, ukammbanga Enoko; ukaagha muzi, ukaghuwanga Enoko kunughana na irina ja mwana wake.

¹⁸ Enoko orekoghe na mwana uwangwagha Iradi, nuo ndee Mehuyaeli; na Mehuyaeli ukava mwana ukammbanga Methushaeli, nuo ndee Lameki.

¹⁹ Lameki orelowueghe waka wawi, nawo ni Ada na Sila.

²⁰ Ada ukamva Jabeli, nao nuo ndee wa awa wifughagha mfugho na kukaia hemenyi.

²¹ Irina ja mruna orewangwagha Jubali, nao nuo ndee wa wabori awa wikabagha vinubi na misherembe.

²² Sila ukamva Tubali-kaini, nuo mchani vuma na shaba, na mruna wa waka orewangwagha Naama.

²³ Nao Lameki ukawizera waka wake: “Sikirienyi inyo Ada na Sila, inyo waka wapo sikirenyi agho nighoragha: uo mdawana angu orenikabieghe.

²⁴ Ikakaia wandu mfungade wichabwaghwa kwa kulipia kubwaghwa kwa Kaini, kwa loli mirongo mfungade na mfungade wichabwaghwa kunilipia ini.”

Sethi na Enoshi

²⁵ Nao Adamu ukammanya mkake sena, ukava mwana wa womi, ukammbanga Sethi, angu oreghambieghe, “Mlungu wanineka mwana umu wulalo ghwa Abeli uo orebwaghiloghe ni Kaini.”

²⁶ Sethi ukava mwana wa womi, nao ukammbanga Enoshi. Ngelo iyo, wadamu werezoeghe kumtasa BWANA.