KUFUMA 8 - Biblia Ilagho Jiboie Kwa Wandu Wose

Vichula

¹ Niko BWANA ukamzera Musa, “Ghenda kwa Farao kumzere, BWANA waghora huwu, ‘Sigha wandu wapo wighende winidumikie.

² Kukalegha kuwisigha wighende, nichajikaba, isanga jako kwa kujiredia vichula.

³ Moda ghwa Naili ghuchachulwa ni vichula; navo vichafuma aho na kungia nyumbenyi kwako, chumbenyi chako chelala, wulinyi kwako, nyumbenyi ra wadumiki wako, na wandu wako, hata andenyi ya mariko ghenyu na vilambo venyu vedekia.

⁴ Vichula ivo vichakuchumbia oho, wandu wako, na wadumiki wako wose.’”

⁵ Nao BWANA ukamzera Musa, “Zera Haruni uwadie zobo yake na kuighorua aighu ya meda, mikua, na ndiwa; vichula vipate kucha na kufinikira isanga ja Misri.”

⁶ Niko Haruni ukaghorua zobo yake aighu ya machi gha Misri, na vichula vikacha, vikafinikira isanga jose ja Misri.

⁷ Ela awo waghanga wikabonya huwo koni kwa wughanga ghwawo, na vichula vikacha aighu ya isanga.

⁸ Nao Farao ukawiwanga Musa na Haruni ukawizera, “Mvoenyi BWANA uviinje ivi vichula vifume kwapo na kwa wandu wapo; nani nichawineka wandu wako rusa, wiendemfunyira BWANA vizongona.”

⁹ Musa ukamzera Farao, “Kwadima kunilaghira ngelo iyo yose kukunde nikulombie, ivo vichula vipate kuinjika kwako, na kwa wadumiki wako, na kwa wandu wako; ela visigharike modenyi ghwa Naili ghuekeri.”

¹⁰ Mzuri ukaghamba, “Munilombie kesho.” Musa ukamzera, “Ndeikaie sa iji koni kwaghamba; eri mpate kumanya angu ndeuko mlungu ungi mzima sa BWANA Mlungu odu anduangi.

¹¹ Vichula vichainjika kwako, kwa wadumiki wako, na kwa wandu wako, navo vichasigharika modenyi ghwa Naili ghuekeri.”

¹² Niko Musa na Haruni wikafuma kwa mzuri, na Musa ukamlomba BWANA kwa wundu ghwa ivo vichula, sa iji koni wererumirianeghe na Farao.

¹³ BWANA ukabonya sa iji koni Musa oremlombieghe; vichula vose verekoghe nyumbenyi, shighadinyi na mbuwenyi, vikafwa.

¹⁴ Wamisri wikavikwanya ivo vichula vitungu-vitungu, na isanga jose jikanuka shuu.

¹⁵ Ela iji Farao orewonieghe angu maza rakaia baa, ukaikurisha ngolo yake sa iji koni BWANA oreghorieghe; hata nderewisikireghe Musa na Haruni anduangi.

Sawa

¹⁶ Niko BWANA ukamzera Musa, “Mzere Haruni ukabe teri ya ndoenyi na zobo yake, eri teri ipate kuwuya sawa isangenyi jose ja Misri.”

¹⁷ Wikabonya woruwo, na Haruni ukaikaba teri ya ndoe na zobo yake; sawa rikabuka na kungia kwa wandu na nyamandu isanga jose ja Misri.

¹⁸ Waghanga wikatima kureda sawa wokoni kwa wuya ghwa akili rawo, ela wikalemwa; na sawa rikawingia wadamu na nyamandu wori.

¹⁹ Waghanga wikamzera Farao, “Iji ni ibonyo ja Mlungu.” Ela Farao ukaikurisha ngolo yake, sa iji koni BWANA oreghorieghe, hata nderewisikireghe Musa na Haruni anduangi.

Izi

²⁰ BWANA ukamzera Musa, “Kesho kuwuke kokio, kughende kukwane na Farao ukighenda modenyi kumzere Bwana waghamba huwu, ‘Sigha wandu wapo wighende eri wipate kunidumikia.

²¹ Si huwo, ngera kwawighiria wandu wapo wiseghende, nichareda izi nyingi kwako, na kwa wadumiki wako, na kwa wandu wako, na andenyi ya nyumba rako; na nyumba ra Wamisri richachulwa ni izungu ja izi nyingi, hata na andu kose wawuyakaia kimusi.

²² Ela ituku ijo, nichajilindia isanga ja Gosheni, andu wandu wapo wikaiagha, na izi ringi nderichaakaia aho anduangi; kupate kumanya angu Ini ne BWANA ndoenyi.

²³ Nichabonya mwano aghadi ya wandu wapo na wandu wako; uo mwakilimbiti uchabonywa kesho.’”

²⁴ BWANA ukabonya wokoni; ukareda izungu ja izi nyingi nyumbenyi kwa Farao, na nyumbenyi kwa wadumiki wake, na andenyi ya isanga jose ja Misri, na ijo isanga jikanonwa ni izi.

²⁵ Niko Farao ukawiwanga Musa na Haruni ukawizera, “Ghendenyi mumfunyire Mlungu onyu kizongona ahoeni isangenyi.”

²⁶ Ela Musa ukamtumbulia, “Ndeichaakaia hachi ingi isi dikabonya huwo; angu vizongona dichaamfunyira BWANA Mlungu odu, ni makuwisho kwa Wamisri. Welee, dikafunya vizongona vedu, navo ni makuwisho kwa Wamisri wikiwona-lee, ndewichaadilasa na magho?

²⁷ Suti dighende charo cha matuku adadu noko cha kireti, dipate kumfunyira Mlungu odu kizongona, sa iji koni uchaadilaghira.”

²⁸ Niko Farao ukaghamba, “Nichamsigha mghende cha kireti kum'bwaghia Mlungu onyu kizongona, ela mseghende kula. Nilombienyi.”

²⁹ Niko Musa ukamzera, “Ola naghenda, nani kesho nichamlomba BWANA uriinje iri izi kufuma kwa Farao, na kwa wadumiki wako, na kwa wandu wako; ela Farao usedikalie sena kwa kulegha kuwisigha awo wandu wighende kumfunyira BWANA kizongona.”

³⁰ Niko Musa ukafuma kwa Farao na kumlomba BWANA,

³¹ na BWANA ukabonya sa iji koni Musa orelombieghe; ukainja iro izi kufuma kwa Farao, na kwa wadumiki wake, na kwa wandu wake; ndeeresigharikieghe hata imweri anduangi.

³² Ela hata ngelo ihi, Farao ukaikurisha ngolo yake wokoni, hata nderewisighieghe awo wandu wighende anduangi.