KUFUMA 5 - Biblia Ilagho Jiboie Kwa Wandu Wose

Musa na Haruni kuwoneka imbiri ya Mzuri wa Misri

¹ Konyuma Musa na Haruni wikaghenda kwa Farao wikamzera, “BWANA, uo Mlungu wa Israeli waghora huwu, ‘Wisighe wandu wapo wighende, eri winibonyere ndima kireti.’”

² Ela Farao ukaghamba, “Uo BWANA nani nidimagha kusikira lwaka lwake na kuwisigha Waisraeli wighende? Ini simwichi uo BWANA, sena sidimagha kuwisigha Waisraeli wighende anduangi.”

³ Musa na Haruni wikatumbulia, “Mlungu wa Waebrania wakwane nesi; dakulomba kudisighe dighende charo cha matuku adadu kireti, dipate kumfunyira Mlungu odu kizongona, usechedikaba kwa makongo angu kwa lufu.”

⁴ Ela mzuri wa Misri ukawizera, “Inyo Musa na Haruni, kwaki muwifunyagha wandu kazinyi kwawo? Wurienyi kazi renyu.”

⁵ Farao ukaghamba, “Zighana seji wandu wachurikia isangenyi, nenyo muawibonya wisighe kazi rawo!”

⁶ Ituku jija jeni Farao ukawilaghira wazighaniri wa wandu na wanyapara wawo ukighamba,

⁷ “Kufuma idime, msakewineka awa wandu nyasi rebonyea matofali seji morekoghe mkiwibonyera, ela wichaghenda wideme weni.

⁸ Mtalo ghwa matofali werekoghe wikibonya ghuchakaia ghuja ghoni, msakeghupunguza; kwa kukaia weeghada, niko wawuyacha na kughamba wei, ‘Disighe dighendemfunyira Mlungu odu kizongona.’

⁹ Kwa huwo wichurienyi kazi rebonya, hata msaketala agho malagho ghawo gha mikalo.”

¹⁰ Niko awo wazighaniri wa wandu na wanyapara wa wandu wa Israeli wikafuma na kuwizera Waisraeli, “Farao waghora huwu, ‘Sichaamneka nyasi ra matofali:

¹¹ ghendenyi mukudemie nyasi mmbeni andu uko kose mchaaripata; ela kazi enyu ndeichaapunguzwa hata kutini.’”

¹² Niko wandu wikasasarika isanga jose ja Misri wikidema nyasi.

¹³ Wazighaniri wa wandu wikawishashira wikighamba, “Katishenyi mtalo ghwa kazi enyu ya kula ituku karakara na seji koni moredemelwagha nyasi.”

¹⁴ Wanyapara wa wandu wa Israeli awo werekoghe aisi ya Wabaa wa kazi wa Farao, wikakabwa na kuzerwa “Kwaki msemerie kazi enyu ekaba matofali sa iji koni morekoghe mkibonya?”

¹⁵ Niko wanyapara wa wandu wa Israeli wikacha wikilalamika kwa Farao, “Kwaki kudibonyagha huwu isi wadumiki wako?

¹⁶ Ndedinekelo nyasi isi wadumiki wako, na sena wiadizera, ‘Kabenyi matofali!’ Wona seji wadumiki wako wakabwa; na ikosa jeeka kwa wandu wako weni.”

¹⁷ Ela Farao ukaghamba, “Inyo mooghada, mwaghadie na ndighi; niko mwawuyaghamba wei, ‘Disighe diendemfunyira Mlungu odu kizongona.’

¹⁸ Ghendenyi m'bonye kazi; ndemchaanekwa nyasi, sena mtalo ghwa matofali ghuchakaia ghuja ghoni.”

¹⁹ Wanyapara wa wandu wa Israeli wikawona angu wangia mashakenyi iji werezereloghe, “Kwa ivo vose ndemchaapunguza mtalo ghonyu ghwa matofali gha kula ituku.”

²⁰ Nao iji wafuma kwa Farao, wikakwana na Musa na Haruni, nawo werekoghe wikiwiweseria,

²¹ wikawizera, “Bwana ndemzighane utanye, kwa kukaia mwadibonya diwoneke wakosi kwa Farao na wadumiki wake, nenyo mwawibonya wipate sababu edibwagha.”

Musa kumlalamikia BWANA

²² Nao Musa ukamghalukia BWANA ukamzera, “Ee BWANA, kwaki kwawibonyera wuwiwi wandu awa? Kwaki korenidumagha?

²³ Kufuma nacha na kudedanya na Farao kwa irina jako, niko wachuria kuwibonyera wuwiwi wandu awa; hata ndekuwikirie wandu wako anduangi.”