KUFUMA 40 - Biblia Ilagho Jiboie Kwa Wandu Wose

Kudungwa na kuwikwa wakfu kwa Hema Ekwania

¹ BWANA ukamzera Musa,

² “Ituku ja imbiri ja mori ghwa imbiri kuidunge Hema Ekwania.

³ Kungire Sanduku ya Ilaghano andenyi, iko na Memu Ikumi, sena kuirighie pazia.

⁴ Kurede meza na kuwika vilambo varo aighu yaro; wokoni kurede kilambo chewikiria taa na taa raro aighu yaro.

⁵ Kungire madhabahu ya dhahabu efukira marumba na kuiwika naimbiri ya Sanduku ya Ilaghano, sena kubonye pazia ya mnyango ghwa Hema.

⁶ Kuwike madhabahu ekora vizongona naimbiri ya mnyango ghwa Hema Ekwania.

⁷ Iyo beseni ekuoghosha kuiwike ghadi na ghadi ya madhabahu na Hema; kuichure machi.

⁸ Kudunge wurigha ghwa waza nao kubonye pazia ya mbenge yaro.

⁹ “Kuiwike Hema wakfu na vilambo vake vose kwa kuvishinga mavuda, nayo ichaela.

¹⁰ Niko kuiwike madhabahu wakfu na vilambo vake vose, kwa kuvishinga mavuda nayo ichakaia ielie kuchumba.

¹¹ Wokoni kuiwike wakfu iyo beseni ekuoghosha na andu kwaro koiwikiria kwa kuishinga mavuda.

¹² “Kumrede Haruni na wana wake mnyangonyi ghwa Hema Ekwania, na oho kuchawioghosha kwa machi;

¹³ kumrushe Haruni agho marwao gha wueli, nao kumshinge mavuda; kwa chia ihi kuchammbika wakfu, upate kunidumikia sa mkohani.

¹⁴ Na wana wake wori kuwirede na kuwirusha majoho;

¹⁵ kuwishinge mavuda seji kubonyere kwa ndee, wipate kunidumikia sa wakohani; na kuja kushingwa mavuda kwawo kuchawiwika wikaie wakohani vivalwa vawo vose.”

¹⁶ Musa ukabonya maza rose sa iji koni BWANA oremlaghirieghe.

¹⁷ Kwa huwo, ituku ja imbiri ja mori ghwa imbiri, mwaka ghwa kawi ghwa kufuma kwawo Misri; Hema Ekwania ikadungwa.

¹⁸ Musa ukaidunga Hema, ukaiwikiria vishawalata varo va nandonyi, ukafunga fremu, ukadunga nguro raro, na kuwikiria mbau raro.

¹⁹ Ukaifinikira iyo Hema sa iji koni BWANA oremlaghirieghe.

²⁰ Niko ukawada ivo vishawalata viwi va magho, na kuvingira andenyi ya Sanduku ya Ilaghano. Ukangira ija midi eiduka kwa rija pete ra Sanduku ya Ilaghano ukawikiria kifuniko aighu yaro.

²¹ Ukangira iyo Sanduku Hemenyi na kurugha pazia. Huwo ukairugha iyo Sanduku sa iji koni BWANA oremlaghirieghe.

²² Ukangira ija meza andenyi ya Hema Ekwania luwaru lwa kaskazinyi shighadi ya ija pazia.

²³ Ukawika mkate ghorefunyiroghe kwa BWANA aighu yaro, sa iji koni BWANA oremlaghirieghe.

²⁴ Ukawika kilambo chewikiria taa andenyi ya Hema Ekwania, luwaru lwa kusinyi kulangaya ija meza.

²⁵ Ukakora iro taa aho, sa iji koni BWANA oremlaghirieghe.

²⁶ Ukangira madhabahu ya dhahabu andenyi ya Hema Ekwania naimbiri ya pazia;

²⁷ ukafukira marumba sa iji koni BWANA oremlaghirieghe.

²⁸ Ukawanika pazia mnyangonyi ghwa Hema.

²⁹ Na aho, imbiri ya iyo pazia, ukawika madhabahu ekora vizongona, na aighu yaro ukafunya kizongona chekora na kizongona cha viro, sa iji koni BWANA oremlaghirieghe.

³⁰ Ukawika ija beseni ekuoghosha ghadi na ghadi ya Hema na madhabahu, nao ukaidungiria machi.

³¹ Musa, Haruni na wana wake werekoghe wikioghoshera vala na maghu ghawo aho,

³² ngelo werekoghe wikingia andenyi ya Hema Ekwania, na ngelo wereisoghoderagha madhabahu, sa iji koni BWANA oremlaghirieghe Musa.

³³ Musa ukadunga wurigha ghwa waza kuimara Hema chia rose, na madhabahu; ukawanika pazia mnyangonyi ghwa waza. Huwo ukaimeria iyo kazi yose.

Iwingu aighu ya Hema Ekwania

³⁴ Niko iwingu jikaifinikira Hema, na mwengere m'baa ghwa BWANA ghukang'ala-ng'ala andenyi yaro.

³⁵ Na Musa nderedimieghe kungia andenyi ya Hema Ekwania kwa kukaia ijo iwingu jerekaieghe aho, na mwengere ghwa BWANA ghorekoghe andenyi yaro.

³⁶ Ngelo rose Waisraeli werekoghe wikidamba, iji ijo iwingu jawuka kufuma kwa iyo Hema, wandu wa Israeli werekoghe wikizoya kudamba.

³⁷ Ela iji iwingu jakaia jisewukie kufuma Hemenyi, werekoghe wikikaia aeni hata iwingu jiwuke.

³⁸ Matuku ghose gha kumara-mara kwawo, wandu wa Israeli werekoghe wikiwona ijo iwingu aighu ya Hema na dime, na modo ngelo ya nakio.