KUFUMA 39 - Biblia Ilagho Jiboie Kwa Wandu Wose

Kubonya marwao kwa wundu ghwa wakohani

¹ Werebonyereghe marwao ghiboie gha uzi ra buluu, zambarau na ra ngundu, rerwalwa ni wakohani ngelo wakadumika andenyi ya Andu kwa Wueli. Wikabonya marwao gha wakohani, kwa wundu ghwa Haruni, sa iji koni BWANA oremlaghirieghe Musa.

² Ukaibonya iyo naivera kwa kitani ndicha ilukilo na uzi ra buluu, zambarau, na ra uzi wa dhahabu.

³ Wikachana ilala ja dhahabu, na kujibara uzi reshonwanya na kitani ndicha ilukilo na uzi ra buluu, zambarau na ra ngundu, kwa mchoro ghuboie.

⁴ Wikabonya vibandiko va maongenyi va iyo naivera, wikavishona aighu maongenyi kwaro.

⁵ Na mkowa ghofunga kiwonu, ghuboisiro nicha kwa ivo vilambo veni, va dhahabu, uzi wa buluu, zambarau, wa ngundu, na kitani ndicha ilukilo; ghukashonwa aighu ya naivera, sa iji koni BWANA oremlaghirieghe Musa.

⁶ Wikabonya magho gha zoghori mbaa; wikakota aighu yaro marina gha mbari ikumi na iwi ra Israeli, na kuchura dhahabu andenyi yaro.

⁷ Wikaghiwika aighu ya vija vibandiko va maongenyi va naivera, ghipate kukaia lukumbuso lwa wana wa Israeli, sa iji koni BWANA oremlaghirieghe Musa.

Kubonya kisibau cha laghenyi

⁸ Ukabonya kisibau cha laghenyi kwa wuya, sa iji oreibonyereghe naivera kwa vilambo vija veni; va dhahabu, uzi wa buluu, zambarau, wa ngundu, na kitani ndicha ilukilo.

⁹ Icho kisibau cherekoghe cha mraba, chikuchiro mando awi, sentimeta mirongo iwi na iwi kwa mirongo iwi na iwi.

¹⁰ Wikachibonyera zaria inya ritolelo kwa magho gha zoghori; luzaria lwa imbiri kwa rubi, topazi, na garineti;

¹¹ luzaria lwa kawi, kwa zumaridi, yakuti samawi, na almasi;

¹² luzaria lwa kadadu, kwa hiakintho, magho gha ngundu, na amethisto;

¹³ na luzaria lwa kana, kwa zabariji, Shohamu, na yaspi. Agha ghose gherengiriloghe dhahabu.

¹⁴ Agha magho ikumi na awi gherewikiloghe kunughana na marina ikumi na awi gha wana wa Israeli. Kula igho jerekoteroghe irina ja umu wa wana wa Israeli.

¹⁵ Wikabonya tiwina ra dhahabu kwa wundu ghwa icho kisibau cha laghenyi.

¹⁶ Wikabonya vishindo viwi va dhahabu viwadanishiro na pete iwi ra dhahabu, wikarifunya naighu ya icho kisibau ii chia na ii chia.

¹⁷ Wikangira iro tiwina iwi ra dhahabu kwa iro pete riko mbembenyi ya icho kisibau.

¹⁸ Kutuonyi kumu kwa iro tiwina wikakungira kwa ivo vibau va maongenyi, na kwa chia iyo wikakwanya icho kisibau na naivera.

¹⁹ Wikabonya pete iwi ra dhahabu, wikarifunga naighu akonenyi ii chia na ii chia ya ilala ja ndenyi ja icho kisibau, jianane na iyo naivera.

²⁰ Wikabonya pete rimu iwi ra dhahabu, wikarifunganya na ija sehemu ya ndonyi ya vija vibandiko va maongenyi va iyo naivera, andu ikwaniagha naighu ya ghuja mkowa ghwa naivera ghuboisiro kwa wuya.

²¹ Werefunganyeghe pete ra kisibau na rija ra naivera kwa kamba ya buluu, sa iji koni BWANA oremlaghirieghe Musa; eri icho kisibau chipate kulalia naighu ya mkowa chisenengaa-nenga.

Kubonya nguwo zima ra wakohani

²² Nguwo erwalwa naighu ya naivera erebonyeroghe kwa uzi wa buluu yose.

²³ Andu kwaro kongiria chongo korelukiloghe kuilindia isecherashuka.

²⁴ Wikangira makomamanga andenyi hemunyi ya iyo nguwo, gherebonyeroghe kwa kitani ndicha ilukilo, na uzi wa buluu, na wa ngundu.

²⁵ Wikabonya njugha ra dhahabu ielie, wikariwika ghadi na ghadi ya makomamanga;

²⁶ njugha na ikomamanga, njugha na ikomamanga, kuimara hemu chia rose ya iyo nguwo ya wudumiki; sa iji koni BWANA oremlaghirieghe Musa.

²⁷ Wikabonya majoho ghilukilo kwa kitani ndicha, kwa wundu ghwa Haruni na wana wake.

²⁸ Na kiremba cha nguwo ya kitani ndicha, kofia ra kitani ndicha, na vipande va kitani ndicha.

²⁹ Na mkowa ghwa kitani ndicha ilukilo, na uzi ra buluu, zambarau, na ra ngundu ghutolelo kwa wuya, sa iji koni BWANA oremlaghirieghe Musa

³⁰ wikabonya kibambo cha dhahabu ielie kwa wundu ghwa kirumbu cha Wueli, chikaandikwa mbari rekotwa aighu yaro “MWELI KWA BWANA.”

³¹ Wikachifunga na imbiri ya kiremba kwa kamba ya buluu, sa iji koni BWANA oremlaghirieghe Musa.

Kumerelwa kwa Kazi

³² Kutua, kazi yose ya Hema Ekwania ikamerelwa. Waisraeli wikabonya kula ilagho sa iji koni BWANA oremlaghirieghe Musa.

³³ Wikaireda iyo Hema kwa Musa, chiaimweri na vilambo varo vose. Koleo raro, fremu raro, mbau raro, nguro raro, na vishawalata varo va nandonyi;

³⁴ kifuniko charo cha mrongo ghwa bauru ghungirilo rangi ra ngundu, na mrongo ghwa mburi na pazia raro.

³⁵ Sanduku ya Ilaghano iko na Memu Ikumi nguro raro, na kifuniko charo;

³⁶ meza na vilambo varo, na Mkate ghufunyiro kwa Mlungu;

³⁷ kilambo chewikiria taa cha dhahabu ielie, taa raro na vilambo varo vose, na mavuda gha taa;

³⁸ madhabahu gha dhahabu, mavuda gheshinga wandu, marumba mecha, pazia ya mnyango ghwa Hema;

³⁹ madhahabu gha shaba, chekecheke raro ra shaba, nguro raro na vilambo varo vose, beseni ekuoghosha na andu kwaro koiwikiria;

⁴⁰ nguwo ya idawo, nguro raro, na vishawalata varo va nandonyi; pazia ya mbenge ya idawo, na kamba raro; vigingi va Hema, na vilambo vose vitumilwagha kwa iyo Hema;

⁴¹ nguwo righokie rerwalwa ni wakohani andenyi ya Andu kwa Wueli – nguwo ra Wueli kwa wundu ghwa mkohani Haruni na kwa wundu ghwa wana wake; wipate kudumika sa wakohani.

⁴² Waisraeli werebonyereghe kazi yose, sa iji koni BWANA oremlaghirieghe Musa.

⁴³ Musa ukalawua kula ilagho, ukawona angu werevibonyereghe sa iji koni BWANA oremlaghirieghe; ukawirasimia.