KUFUMA 27 - Biblia Ilagho Jiboie Kwa Wandu Wose

Madhabahu

¹ “Kubonye madhabahu kwa mudi ghwa mgholeka, ikatane chia rose, meta iwi na pointi iwi, na wuighu ghukaie meta imweri na pointi idadu.

² Kubonye mbembe rishingilo shaba, kurikwanye na kona inya ra madhabahu rikaie kindo chimweri.

³ Kubonye nyungu redikilwa ni ivu na miiko, bakuli, uma, na sufuria rewika modo. Ivo vilambo vose vikaie va shaba.

⁴ Kuibonyere chekecheke ya shaba, na aighu mbembenyi ra iyo chekecheke, kufunge pete inya ra shaba reiduka.

⁵ Kuingire iyo chekecheke andenyi ya madhabahu, ivike mkelenyi ghadi na ghadi nusu ya wuighu ghwa madhabahu.

⁶ Kubonye midi ya mshita, eduka iyo madhabahu; nao kuishinge shaba;

⁷ kuingire kwa iri pete iji iyo madhabahu yakadukwa.

⁸ Iyo madhabahu kuibonye ya mbau, nao kuisighe iari kunughana na mfwano nakuwonyera mghondinyi.

Wurigha ghwa Hema Ekwania na BWANA

⁹ “Kubonye wurigha kwa wundu Hema Ekwania na BWANA. Wurigha ugho ghuchakaia ghwa nguwo ya kitani iboie ilukilo nicha; wulacha ghwaro ghukaie meta mirongo ina na inya ii chia cha kusinyi;

¹⁰ ghuwadilwagha ni nguro mirongo iwi ra shaba, na vishawalata varo va nandonyi mirongo iwi va shaba; ela koleo richakaia ra feza.

¹¹ Kubonye woruwo kwa luwaru lwa kaskazinyi lwa ugho wurigha.

¹² Wushapa ghwa ugho wurigha ii chia cha magharibi, kuchakaia nguwo ya kitani iboie ilukilo iko na wulacha ghwa meta mirongo iwi na iwi, nguro ikumi, na vishawalata varo va nandonyi ikumi.

¹³ Luwaru lwa mashariki lwa ugho wurigha, andu mnyango ghongiria ghuko, kuchakaia na wushapa ghwa meta mirongo iwi na iwi wokoni.

¹⁴ Luwaru lumu lwa mbenge ya ugho wurigha, kuchakaia na pazia ya meta irandadu na pointi irandadu; chiaimweri na nguro idadu, na vija vishawalata varo va nandonyi vidadu.

¹⁵ Ulo luwaru lumu lwa mbenge ya ugho wurigha, kuchakaia na pazia ya meta irandadu na pointi irandadu; chiaimweri na nguro idadu, na vishawalata varo va nandonyi vidadu.

¹⁶ Mbenge cheni ya wurigha ichakaia na pazia ya wulacha ghwa meta ikenda ra nguwo ya kitani iboie ilukilo na uzi wa buluu, zambarau, na wa ngundu, itolelo nicha. Iyo pazia ichawadilwa ni nguro inya, na vishawalata va nandonyi vina.

¹⁷ Nguro rose, kumara ugho wurigha, richafungwa na kamba ra feza, koleo raro rikaie ra feza, na vishawalata varo va nandonyi vikaie va shaba.

¹⁸ Iyo waza ichakaia na wulacha ghwa meta mirongo ina na inya, wushapa ghwa meta mirongo iwi na iwi, na wuighu ghwa meta iwi na pointi iwi. Mapazia ghichabonywa kwa kitani iboie, ilukilo nicha, na vishawalata varo va nandonyi va shaba.

¹⁹ Vilambo vose vitumilwagha andenyi ya iyo Hema, na vikosi varo, na ivo va wurigha, vichabonywa va shaba.

Wulindiri ghwa taa

²⁰ “Kuwilaghire wandu wa Israeli wikuredie mavuda gha zeituni ghiboie kwa wundu ghwa taa, ipate kukorwa kula luma lwa kenyi.

²¹ Haruni na wana wake wichaiwika iyo Taa andenyi ya Hema Ekwania cha shighadi ya Pazia iko imbiri ya Sanduku ya Ilaghano; nayo ichakaia ikiaka kufuma luma lwa nakenyi hata luma lwa nakesho. Sharia ihi ichawadilwa ni Waisraeli chiaimweri na kivalwa chawo kwa kala na kala.