KUFUMA 20 - Biblia Ilagho Jiboie Kwa Wandu Wose

Memu ikumi

¹ Nao Mlungu ukaghora malagho agha ghose ukighamba,

² “Ini ne BWANA Mlungu wako, nerekufunyireghe isanga ja Misri, kufuma wuzumbenyi.

³ “Kusakekaia na milungu mizima imbiri kwapo.

⁴ “Kusakekubonyera kumoni fwana ingi iwachilo, angu kilambo chingi chifwananagha na kilambo chiko aighu mlungunyi, angu chiko ndoenyi aisi, angu machinyi ghiko ndoenyi nakosi;

⁵ kusakevighoghomia hata kuvidumikia, angu ini BWANA Mlungu wako, ne Mlungu uko na iriso; nawikabagha wanake kwa wundu ghwa kaung'a ra weke ndee, hata kivalwa cha kadadu na cha kana; awo wizamilwagha ni ini;

⁶ ela nawibonyera lukundo maelfu gha wandu, awa winikundagha, na kuiwadia memu yapo.

⁷ “Kusakejighora duu irina ja BWANA Mlungu wako, angu Mlungu ndechaalegha kumtalia makosa, uo ughoragha irina jake duu.

⁸ “Kukumbuke kujielesha ituku ja Sabato;

⁹ dumika kwa matuku arandadu, kubonye kazi rako rose,

¹⁰ ela ituku ja mfungade ni Sabato kwa BWANA Mlungu wako. Ituku ijo, kusakebonya kazi ingi; oho, angu mwana wako wa womi, angu mwana wako wa waka, angu mzumba wako wa womi hata wa waka, mfugho rako, angu mghenyi uko andenyi ya mbenge rako.

¹¹ Angu BWANA oreumbieghe mlungunyi na ndoenyi kwa matuku arandadu, bahari na vose viko andenyi yaro; ukahora ituku ja mfungade. Kwa huwo, BWANA ukajirasimia ituku ja mfungade, ukajielesha.

¹² “Kuwineke ishima ndeyo na mayo, matuku ghako ghikaie mengi isangenyi, kuchaanekwa ni BWANA Mlungu wako.

¹³ “Kusakebwagha.

¹⁴ “Kusakelaka.

¹⁵ “Kusakeiwa.

¹⁶ “Kusakemzighiria mmbenyu kwa tee.

¹⁷ “Kusakebonya iriso kwa nyumba ya mmbenyu, kusakebonya iriso kwa muka wa mmbenyu, hata kwa mzumba wake wa womi angu wa waka, hata kwa ng'ombe yake, hata kwa punda wake, hata kwa kilambo chingi chiko cha mmbenyu.”

Wowa ghwa wandu

¹⁸ Nao iji wandu weresikireghe chukuwa na kuwona chuhehia, na kusikira lwaka lwa tarumbeta, na kuwona ugho mosi ghorefukiagha mghondinyi, wikaobua na kusughusika, wikakaia kula;

¹⁹ wikamzera Musa, “Dedanya nesi; dichasikira; ela Mlungu usakededanya nesi, dichefwa.”

²⁰ Musa ukawizera wandu, “Msakeobua, angu Mlungu waacha kumtima, mpate kumuobua, hata msakebonya kaung'a.”

²¹ Ela wandu wikakia kula wokoni, ingelo Musa orekoghe ukisoghoda kaavui na ijo iwingu jikambie kira, aho Mlungu orekoghe.

Sharia ra madhabahu

²² BWANA ukamlaghira Musa uwizere wandu wa Israeli huwu: “Mwawona mmbeni seji Ini BWANA nadedanya nenyo kufuma mlungunyi.

²³ Msakekubonyera mmbeni milungu ya feza angu dhahabu kuitasa chiaimweri nani.

²⁴ Kuaghe madhabahu gha ndoe kwa wundu ghwapo, kufunye vizongona vako vekora na vizongona vako va mapatano aighu yaro, ng'ondi rako na ng'ombe rako, andu kose nichaabonya irina japo jighoro; nani nichacha na kumrasimia.

²⁵ Iji kwaniaghia madhabahu ya magho, kusetumie magho ghiwachilo, kwa kukaia kukatumia chombo chewacha aighu yaro, kuchailusha.

²⁶ Kusejoke na viluwatiro madhabahunyi yapo, kuchewoneka wuduu ghwako kuko aighu yaro.