KUFUMA 17 - Biblia Ilagho Jiboie Kwa Wandu Wose

Machi kufuma ighonyi

¹ Izungu jose ja wandu wa Israeli wikafuma kireti cha Sini, na kudamba kwa mpango kunughana na malaghiro gha BWANA. Wikabonya kambi aja Refidimu, ela ndekorekoghe na machi ghenyughwa ni wandu aho.

² Kwa huwo, wandu wikamzughunukia Musa wikighamba, “Dineke machi dinyo.” Musa ukawizera, “Kwaki munizughunikiagha? Kwaki mumtimagha BWANA?”

³ Ela wandu werekoghe waoma na ndighi, wikachuria kumzughunukia Musa wikighamba, “Kwaki koredifunyagha Misri kuchedibwagha isi, na wana wedu, na mfugho redu kwa kau?”

⁴ Musa ukamlilia BWANA ukighamba, “Awandu niwibonya wada? Hawa wiamba na kunilasa na magho.”

⁵ BWANA ukamzera Musa, “Wada waghosi wamu wa Waisraeli, kukirie imbiri ya wandu andwamweri nawo; sena kudo mkonunyi kwako ija zobo korekabagha nayo moda ghwa Naili.

⁶ Ola nichakaia kimusi imbiri kwako aighu ya igho aja Horebu, na oho kuchajikaba igho, najo jichafunya machi, wandu wipate kunywa.” Musa ukabonya woruwo waghosi wa Waisraeli wikiwona.

⁷ Musa ukakuwanga andu aja Masa na Meriba, angu wandu wa Israeli werezughunukieghe na kumtima BWANA wikighamba, “Sena loli BWANA oko andwamweri nesi, anguwada?”

Wuda na Waamaleki

⁸ Niko Waamaleki wikacha kulwa na Waisraeli aja Refidimu.

⁹ Musa ukamzera Joshua, “Saghua wandu wamu kwa wundu ghodu, mfume mghende kulwa na Waamaleki. Kesho, nichakaia kimusi aighu mghondinyi, ngiwadia ija zobo ya Mlungu mkonunyi kwapo.”

¹⁰ Nao Joshua ukabonya sa iji koni Musa oremghorieghe; ukalwa na Waamaleki; ela Musa, na Haruni, na Huri wikajoka koighu mghondinyi.

¹¹ Iji Musa oreghorueghe mikonu yake, Waisraeli wikasima; na iji oreserieghe mikonu yake, Waamaleki wikasima.

¹² Ela mikonu ya Musa ikawoka kusilwa, kwa huwo Haruni na Huri wikamredia igho upate kujiseria, nawo weni wikakaia kimusi kaavui na Musa, umu ii chia na umu ii chia wikaiwadia mikonu yake na kuimazira hata iruwa jikaneng'ena.

¹³ Joshua ukawisima Waamaleki wose kwa lufu.

¹⁴ Nao BWANA ukamzera Musa, “Kuandike agha malagho chuonyi ghikaie lukumbuso; sena kughighore madunyi kwa Joshua kukaia, nichawimeria Waamaleki putu, wisekumbuko jingi ndoenyi.”

¹⁵ Musa ukaagha madhabahu ukaghiwanga, “Bwana nuo kiweto chapo,”

¹⁶ ukighamba, “Josa kiweto cha BWANA. BWANA uchabonya wuda na Waamaleki kivalwa hata kivalwa.”