KUFUMA 15 - Biblia Ilagho Jiboie Kwa Wandu Wose

Lumbo lwa Musa

¹ Niko Musa na Waisraeli wikam'boria BWANA lumbo ulu: “Nicham'boria BWANA angu wasima kwa wubaa mungi, farasi na mjoki farasi, wawikumba baharinyi.

² BWANA nuo ndighi rapo na lumbo lwapo, nao wawuya kukia kwapo; Uhu nuo Mlungu wapo, nani nichamkasa; ni Mlungu wa aba, nani nichamkuma.

³ BWANA ni mundu wa wuda, irina jake ni BWANA.

⁴ “Majeshi gha Wamisri na magare ghawo waghikumbie baharinyi, na wabaa wake aweni wecha, wawikumbie andenyi ya Bahari ya Shamu.

⁵ Wafinikirwa ni machi mengi; waneng'ena andu kumilie sa igho.

⁶ Mkonu ghwako ghwa kiwomi ee BWANA, ghoko na wubaa na kudima, mkonu ghwako ghwa kiwomi ee BWANA, ghwamfasha-fasha m'maiza.

⁷ Kwa wubaa ghwa nguma yako kwawikumba wamaiza wako noko; kwaghiduma machu ghako, nagho ghawikora sa matasa.

⁸ Kwafunyire miruke na mbua rako machi ghikakwanyika na kuwuya kitungu ghikakwanyika kitungu sa wurigha; machi ghimilie gha bahari ghikawadana.

⁹ M'maiza ukaghamba, ‘Nichawinugha niwiwade; nichawaghanya mali rawo, na kwa iro nichakatisha bea yapo. Nichakua lufu lwapo, na kuwitotesha kwa mkonu ghwapo.’

¹⁰ Oho koreweteshereghe mbeo, na bahari ikawifinikira; wikamilika sa chuma chilemere andenyi ya machi mengi.

¹¹ “Nani uko sa oho ee BWANA aghadi ya milungu? Nani uko sa oho kwa wubaa andenyi ya wueli? Mabonyo ghako gha wubaa ghiaobosha, ghiko gha mashiniko?

¹² Oho koreghughorueghe mkonu ghwako ghwa kiwomi na ndoe ikawimila.

¹³ Oho korewighenjere kwa lukundo lwako lwa loli, awo wandu korewikombueghe kumoni; oho korewilongozere kwa ndighi rako, hata andu kwako kokaia kuelie.

¹⁴ Wandu wasikire, nawo wiasughusika; kuwawa kwawingia awo wikaiagha Filistia.

¹⁵ Idana wabaa wa Edomu wichangilwa ni kiture, vilongozi va Moabu vawadwa ni kusughusika. Awo wose wikaiagha Kanaani wateweleka.

¹⁶ Kiture na wowa vangia andenyi kwawo; kwa wundu ghwa kudima kwa mkonu ghwako, wakaia kima sa igho; hata wandu wako wameria kuida ee BWANA, hata wandu wako waida, awo korewighueghe.

¹⁷ Oho kuchawireda na kuwiwika aighu ya mghondi ghwako ghoni andu korekuboisireghe kukaie wulalo ghwako ghokaia ee BWANA, andu kwa wueli korekumangishireghe kwa mikonu yako ee BWANA.

¹⁸ BWANA uchabonya nguma kwa kala na kala.”

Lumbo lwa Miriamu

¹⁹ Iji farasi ra Farao, magare, na wajoki farasi wake werengirieghe baharinyi, BWANA oreghiwunjiereghe agho machi gha bahari aighu yawo; ela Waisraeli wereidieghe andu kuomie ghadi na ghadi ya bahari.

²⁰ Niko Miriamu mlodi wa waka, mruna Haruni, ukawada kayamba mkonunyi kwake, na waka wose wikamnugha nanyuma wikikaba kayamba na kuvina.

²¹ Miriamu ukawiboria, “M'borienyi BWANA angu wabonya wusimi m'baa; farasi na mjoki farasi wake wawikumba baharinyi.”

Machi ghiwawie

²² Niko Musa ukawighenja Waisraeli imbiri kufuma Bahari ya Shamu hata kireti cha Shuri; wikaghenda charo cha matuku adadu kireti wisewonagha machi.

²³ Hata iji werevikieghe Mara, ndeweredimieghe kunywa machi gharo, angu gherekoghe ghiwawie; kwa huwo gherewangiloghe Mara.

²⁴ Wandu wikamzughunukia Musa wikighamba, “Dinywa kii?”

²⁵ Musa ukamkemia BWANA, na BWANA ukammbonyera mudi, ukaghukumba machinyi, na machi ghikawuya ghisingie. Aho BWANA ukawiwikia sharia na malaghiro ghewitima ukighamba,

²⁶ “Ngera mchalusikira lwaka lwa BWANA Mlungu onyu kwa loli, na kubonya agho ghiko gha hachi imbiri kwake, kwa kuiwadia sharia yake na malaghiro ghake, niko aho nisechaamredia makongo agho nerewiredieghe Wamisri; kwa kukaia Ini ne BWANA m'boisi wako.”

²⁷ Niko wikacha Elimu, andu korekoghe na ndoria ra machi ikumi na iwi, na mitende mirongo mfungade; wikabonya kambi aho kaavui na machi.