JONA 3 - Biblia Ilagho Jiboie Kwa Wandu Wose

Jona kumsikira BWANA

¹ Nao BWANA ukaghora na Jona indo ja kawi ukighamba,

² “Wuka kughughendie ghuja muzi m'baa ghwa Nineve kughuchilie malagho nichaakughoria.”

³ Niko Jona ukawuka ukaghenda Nineve seji BWANA oreghambieghe. Nineve ghorekoghe muzi m'baa nandighi, wushapa ghwaro ghorekoghe ghwa charo cha matuku adadu.

⁴ Jona ukazoya kungia mzinyi, ukabonya mwendo ghwa ituku jimweri. Ukachila ukighamba, “Ghaasighwa matuku mirongo ina, nao muzi ghwa Nineve ghuatoteshwa.”

⁵ Wandu wa Nineve wikamrumiria Mlungu, wikaeresha malagho wandu wifunge tumu; wikarwa nguwo ra magunia kufuma m'baa wawo, hata mtini wawo.

⁶ Mzuri wa Nineve uendasikira agho malagho ukainjika kifumbinyi chake cha nguma, ukarua nguwo yake, ukakurusha nguwo ya igunia na kusea kidombo aivunyi.

⁷ Ukaeresha malagho muzi ghwa Nineve ghose ukighamba, “Mzuri na wandu wake wa ishima wafunya momu kughamba: Mndungi, angu nyamandu, ng'ombe angu ng'ondi isetoo kindo chingi; risakeja hata risakenywa machi.

⁸ Ela mdamu na nyamandu rirusho nguwo ra magunia, na kumlilia Mlungu nandighi; ee, kula mundu ndeghaluke na kutana na wuwiwi ghwake, na lung'eto uko nalo.

⁹ Nani umanyagha kewada Mlungu wadima kughalua maghesho uhoreshe machu ghake ghibirie eri disechetota?”

¹⁰ Mlungu ukawona seji wabonya, na seji waghaluka na kuchisigha kiwiwi chawo; niko ukaghalusa maghesho na kusigha icho kiwiwi orekundieghe kuwibonyera, ukakaia usechibonyere.