JONA 1 - Biblia Ilagho Jiboie Kwa Wandu Wose

Jona kuleghamsikira BWANA

¹ Ituku jimu BWANA oreghorieghe na Jona mwana wa Amitai ukighamba,

² “Wuka kughughendie ghuja muzi m'baa ghwa Nineve, kughuchilie; angu nawona seji wandu waro wakaia wawiwi.”

³ Ela Jona ukawuka ukimbie cha Tarshishi BWANA usemmbone. Ukasea Jopa ukakua meli aho ighendagha cha Tarshishi, ukalipa tikiti, ukangia ughendanye na wandu wa Tarshishi, upate kukaia kula na BWANA.

⁴ Ela BWANA ukawetesha mbeo mbaa baharinyi, kukakaia na kiremba kibaa, hata meli ikadaamba na kuchika.

⁵ Niko wadumiki wa melinyi wikaobua na kula mundu ukamlilia mlungu wake; wikashoa vilambo verekoghe melinyi na kuvikumba baharinyi, eri meli ipate kuangua kwa wundu ghwawo. Ela Jona orekoghe wasea kondonyi melinyi, ukalala na kuwadwa ni dilo nyingi.

⁶ Kilongozi wa meli ukamkua, ukamzera, “Wele oho koko wa wada kulalagha? Wuka kumlombe mlungu wako! Kewada wadima kuwadwa ni wughoma ghodu uditesie disechetota.”

⁷ Nao wadumiki wa melinyi wikazerana, “Nndokonyi dikabe kura diwone ngera nani washekeria ughu wuwiwi ghukadipata.” Niko wikakaba kura, na kura ikammbwada Jona.

⁸ Niko wikamzera, “Dighorie, wuwiwi ughu ghwadipata kwa wundu ghwa indoki? Kazi yako niki? Kwafuma hao? Mzenyu ni hao? Na oho ko m'bariki?”

⁹ Ukawizera, “Ini ne Muebrania nani nadamtasa BWANA, Mlungu wa mlungunyi uo ubonyere bahari na ndoe iomie.”

¹⁰ Jona ukachuria kuwighoria kukaia odeeka ukimkimbia BWANA. Wadumiki wa melinyi wikaobua nandighi wikamzera, “Ni ilaghoki iji kwabonya?”

¹¹ Wikamkotia, “Da dikubonya wada bahari ipate kuhoa?” Kwa kukaia hahari erekoghe ikichurikia kunyavurika nandighi.

¹² Ukawizera, “Niwadenyi munikumbe baharinyi nayo ichahoa; angu namanya ni ini nashekeria mchelo ni ichi kiremba.”

¹³ Ela sena wandu wikatima nandighi kuruda makasia eri meli iwuye cha ndoe iomie, angu kiremba cherekoghe chikichurikia nandighi, ikalemeka.

¹⁴ Kwa huwo wikamlilia BWANA wikaghamba, “Dakuvoya ee BWANA kusakeditalia ikosa kwa wundu ghwa kum'bwagha mundu usene ikosa, angu niko koni kwawona ikaie huwo ee BWANA.”

¹⁵ Niko wikammbwada Jona wikamkumba baharinyi, na bahari ikanyama.

¹⁶ Nao wandu wikamuobua BWANA nandighi, wikamfunyira kizongona na kum'bonyera ighemi.

¹⁷ BWANA ukawika samaki mbaa immile Jona; na Jona ukakaia andenyi ya kifu cha samaki matuku adadu kio na dime.