JOHANE 7 - Biblia Ilagho Jiboie Kwa Wandu Wose

Jesu na waruna

¹ Nyuma ya agho, Jesu orekoghe ukimara-mara Galilaya, hata ndereghendieghe Judea anduangi; angu Wayahudi werekoghe wikimlola wim'bwaghe.

² Na ndima ya Wayahudi, ija Ndima ya Viwanda, erekoghe kaavui.

³ Niko waruna wikamzera, “Fuma aha kwende Judea, wanughi wako wipate kuriwona iro kazi kuribonyagha.

⁴ Angu ndekuwadie mndungi ubonyagha maza kivisonyi sena ukikunda kumanyika. Idana angu kwawuyabonya maza iri, ni nicha kukuwonyere kumoni kwa wurumwengu.”

⁵ (Angu hata waruna ndeweremrumirieghe anduangi.)

⁶ Jesu ukawizera, “Ngelo yapo ndeivikie kande anduangi, ela ngelo enyu eko aeni matuku ghose.

⁷ Wurumwengu ndeghudimagha kuzamilwa ni inyo, ela ghwadazamilwa ni ini angu nighughoragha kazi rake kukaia razamie.

⁸ Inyo jokenyi kwa iyo ndima. Ini sijokagha kwa iyo ndima anduangi; angu ngelo yapo ndeivikie anduangi.”

⁹ Nao ughora agho ukakaia ahoeni Galilaya.

Jesu andenyi ya Ndima ya Viwanda

¹⁰ Ela iji waruna wameria kughenda ndimenyi, Jesu moni wori ukajoka; si worinyi anduangi, ela kwa kiviso.

¹¹ Vilongozi va Wayahudi wikakaia wikimlola ndimenyi na kughamba, “Wele oko hao?”

¹² Korekoghe na madedo mengi-mengi wandunyi kwa wundu ghwake; wamu wikaghamba, “Ni mundu mucha.” Na wazima wikaghamba, “Hata, ualaghasha wandu.”

¹³ Ela mndungi ndereghorieghe malagho ghake worinyi anduangi, angu werewiobueghe vilongozi va Wayahudi.

¹⁴ Ndima iendavika ghadi na ghadi, Jesu ukaghenda Hekalunyi ukazoya kufundisha.

¹⁵ Wayahudi wikashinika wikighamba, “Mundu uhu wapatire wada ichi kishomo nao jingi useghenda mashomonyi?”

¹⁶ Niko Jesu ukawizera, “Mafundisho nifundishagha si ghapo ghangi, ela ni ghake uo orenidumieghe.

¹⁷ Mndungi ukakunda kubonya agho ughikundagha Mlungu, uchamanya ngera agho mafundisho nifundishagha gheefuma kwa Mlungu angu ngera ni gha nguma rapo reni.

¹⁸ Mundu udedagha kwa nguma rake reni wadalola wubaa ghwake moni. Ela uo ulolagha wubaa ghwa uo oremdumieghe, wadakaia mloli, hata ndekuwadie mikalo ingi andenyi kwake anduangi.

¹⁹ Welee, si Musa moni oremnekieghe Sharia? Hata huwo ndekuwadie ungi onyu uiwadagha Sharia anduangi. Kwaki mlolagha kunibwagha?”

²⁰ Awo wandu wikamtumbulia, “Oho koko na pepo! Nani ulolagha kukubwagha?”

²¹ Niko Jesu ukawitumbulia, “Nerebonyereghe ilagho jimweri, na inyo mmbose mkadajishinikia.

²² Musa oremnekieghe ghuja mzango ghwa kushamisha, (si kughamba wei ugho mzango ghodefuma kwa Musa, ela kwa weke wawa wenyu); nenyo mwadamshamisha mundu hata ituku ja sabato.

²³ Idana ikakaia mundu washamishwa ituku ja Sabato, eri Sharia ya Musa isechenonwa, welee, inyo mwanibonyera machu wei nam'boisa mundu ituku ja Sabato?

²⁴ Msaketanya kwa kuwona kwa shighadi tu, ela tanyenyi kwa hachi.”

Kewada uhu nuo Kristo

²⁵ Nao wandu wamu wa Jerusalemu wikaghamba, “Welee, uhu suo moni mundu wawuyalolwa ni vilongozi ubwagho?

²⁶ Zighanenyi hoyu wawuyadeda worinyi, nawo ndewiwueghora ilagho jingi aighu yake anduangi; kewada na wabaa wemmanya mundu uhu kukaia Kristo anguwada?

²⁷ Iji Kristo uchaacha, mndungi ndechaamanya andu ufumagha anduangi. Ela isi damwichi mundu uhu andu ufumagha.”

²⁸ Jesu ukaghora kwa lwaka lubaa iji orekoghe ukifundisha Hekalunyi, “Loli mwaniichi, na andu nifumagha mwakumanya? Ini sichee kwa nguma rapo ini moni anduangi, ela uo orenidumieghe ni mloli, na inyo ndemumwichi anduangi.

²⁹ Ela ini namwichi angu nerefumieghe kwake, nao nuo orenidumieghe.”

³⁰ Waja wandu wikakunda kummbwada, ela mndungi nderedimieghe kummbwada angu ngelo yake ndeerevikieghe anduangi.

³¹ Elaima wengi wa awo werekoghe izungunyi wikarumiria kwake wikighamba, “Welee, iji Kristo uchaacha, uchabonya weke mwakilimbiti kuchumba awa wibonyero ni uhu mundu?”

Walindiri kudumwa wimmbwade Jesu

³² Nao Mafarisayo wikasikira wandu wikihohoriana agho malagho gha Jesu, nawo chiaimweri na Wakohani wabaa wikaduma walindiri wimmbwade Jesu.

³³ Niko Jesu ukaghamba, “Ini neko andwamweri nenyo kwa ngelo vui, nani nichaghenda kwa uo orenidumieghe.

³⁴ Mchanilola ela ndemchaaniwona anduangi, angu andu nighendagha inyo ndemdimagha kucha anduangi.”

³⁵ Nao vilongozi va Wayahudi wikaghamba weni na weni, “Mundu uhu uchaghenda hao isi disedimagha kuvika? Welee, uchaghenda kwa Wagriki andu wamzedu wiko, upate kuwifundisha Wagriki?

³⁶ Kutambua kwaro niki ughoragha wei, ‘Mchanilola nenyo ndemchaaniwona, na andu nichaakaia ini, inyo ndemdimagha kucha anduangi?’”

Meda ya machi gha Irangi

³⁷ Nao ituku ja kutua mbai, ituku ibaa ja Ndima, Jesu ukakaia kimusi na kughora kwa lwaka lubaa, “Ngera mndungi waoma, ndeche kwapo unyo.

³⁸ Uo unirumiriagha ini sa iji koni Maandiko ghighambagha, ‘Ngolonyi kwake ichafuma meda ya machi ghiko moyo.’”

³⁹ (Agho oreghighorieghe kwa wundu ghwa uo Roho wechaampata awo wirumiriagha kwake. Angu Roho nderefunyiroghe kwa kukaia Jesu nderekasiroghe kande anduangi.)

Mawaghanyiko gha wandu kwa wundu ghwa Jesu

⁴⁰ Wiendasikira agho malagho, wandu wamu waro wikaghamba, “Kwa loli mundu uhu ni uja Mlodi.”

⁴¹ Wamu wikaghamba, “Uhu nuo Kristo.” Ela wamu wikaghamba, “Kwani Kristo uafuma Galilaya?

⁴² Maandiko ndeghighorie angu Kristo uchafuma kwa kivalwa cha Daudi na kuvalwa Bethlehemu muzi orekaieghe Daudi?”

⁴³ Nao kukakaia mawaghanyiko aghadi ya jija izungu kwa wundu ghwa Jesu.

⁴⁴ Wamu werekundieghe kummbwada, ela ndekorekoghe na ungi oredimieghe kummbwada anduangi.

Kusowekelwa ni irumirio kwa vilongozi va Wayahudi

⁴⁵ Nao waja walindiri wikawuya kwa wakohani wabaa na Mafarisayo. Nawo wikawikotia, “Welee, kwaki msemredie?”

⁴⁶ Awo walindiri wikatumbulia, “Jingi mndungi ndededie sa mundu uhu anduangi.”

⁴⁷ Nao Mafarisayo wikaghamba, “Welee, na inyo wori mwalaghashwa?

⁴⁸ Jingi mwawonie m'baa ungi angu Mfarisayo ungi umrumirie mundu uhu?

⁴⁹ Ela izungu iji jiseichi Sharia ya Musa, jeewasirwa njowe.”

⁵⁰ Umu wa awo Mafarisayo orekoghe Nikodemo, uo oremghendieghe Jesu aho imbiri. Nao ukawizera wambao,

⁵¹ “Welee, Sharia edu yamtanyagha mndungi disemsikire na kughimanya agho ubonyere?”

⁵² Nao wikatumbulia, “Welee, na oho wori kwaafuma Galilaya? Zighana Maandiko kuwone ngera mlodi ungi jingi wafumie Galilaya.” [

Muka mlaki

⁵³ Nao kula umu ukaghenda cha nyumbenyi kwake;