JOHANE 17 - Biblia Ilagho Jiboie Kwa Wandu Wose

Jesu kuwilombia wanughi wake

¹ Nao iji Jesu wameria kughora malagho agho, ukazighana aighu mlungunyi ukaghamba, “Aba, ngelo yameria kuvika; mkase Mwana wako, na Mwana wako wori ukukase oho.

² Angu koremnekieghe nguma aighu ya wadamu wose, uwineke irangi ja kala na kala waja koremnekieghe.

³ Najo irangi ja kala na kala nijo iji: wikumanye oho Mlungu wa loli kuekeri, na Jesu Kristo uo koremdumieghe.

⁴ Nakukasa oho aha ndoenyi, naimeria ija kazi koreninekieghe niibonye.

⁵ Idana Aba, nikase ini imbiri kwako, kwa ugho wubaa nerekoghe nagho imbiri ya kuumbwa wurumwengu.

⁶ “Nakubonyere kumanyike kwa wandu awa koreninekieghe wurumwengunyi. Werekoghe wako, kukanineka ini; nawo wamerie kujiwada ilagho jako.

⁷ Idana wamerie kumanya vose kuninekie vedefuma kwako;

⁸ kwa kukaia nawinekie ijo ilagho koreninekieghe, nawo wikajiwada na kumanya kwa loli angu nedefuma kwako; sena wikarumiria angu ni oho korenidumieghe.

⁹ “Ini nawilombia awo, sighulombiagha wurumwengu anduangi; ela nawilombia awo koreninekieghe, angu awo ni wako.

¹⁰ Vose niko navo ni vako, na vako ni vapo; nani naawuyakaswa andenyi kwawo.

¹¹ Idana niacha kwako, siko sena wurumwengunyi; ela awo weko wurumwengunyi. Aba Mweli, wilindie kwa irina jako ijo koreninekieghe, wipate kukaia kindo chimweri sa iji isi diko umweri.

¹² Iji nerekwanyeghe nawo, nerewiwikieghe banana kwa ijo irina jako koreninekieghe. Nawilindirie, hata ungi nderelagharieghe, ela uo mwana wa kutota; eri maandiko ghikatisho.

¹³ Idana niacha kwako; nani naghighora malagho agha wurumwengunyi, eri kuboilwa kwapo kukate kuchuo andenyi ngolonyi kwawo.

¹⁴ Nawinekie ilagho jako, wikazamia wurumwengu, angu wiseko wa wurumwengu; seji ini wori niseko wa wurumwengu anduangi.

¹⁵ Silombagha kuwifunye wurumwengunyi, ela nalomba kuwilindie na uja Mmbiwi.

¹⁶ Awo ndewiko wa wurumwengunyi, sa iji koni ini niseko wa wurumwengunyi.

¹⁷ Kuwiwike wikaie wako weni kwa chia ya iyo loli; ijo ilagho jako niyo loli.

¹⁸ Sa iji oho korenidumieghe wurumwengunyi, nani wokoni nawiduma awo wurumwengunyi;

¹⁹ na kwa wundu ghwawo, nakuwika ini moni kwako, eri nawo weni wibonyo kukaia wako weni kwa iyo loli.

²⁰ “Nani siwilombiagha awo weni wiekeri anduangi, ela hata na awo wichaanirumiria kwa wundu ghwa ilagho jawo.

²¹ Aba, nalomba angu wose wikaie kindo chimweri andenyi kodu; seji oho Aba kuko andenyi kwapo, na ini andenyi kwako. Nawo wikaie kindo chimweri, wurumwengu ghupate kurumiria angu ni oho korenidumieghe.

²² Ini nawineka ghuja wubaa ghoni koreninekieghe ini, wipate kukaia kindo chimweri sa iji isi diko umweri.

²³ Ini nikaie andenyi kwawo, na oho kukaie andenyi kwapo, wipate kukaia kindo chimweri putu; eri wurumwengu ghupate kumanya angu korenidumieghe, na angu oho kwawikunde awo, sa iji kunikunde ini.

²⁴ “Aba, nakunda awo koreninekieghe wikaie andwamweri nani andu niko ini; wipate kughuwona ugho wubaa ghwapo koreninekieghe, angu korenikundieghe ini imbiri wurumwengu ghuseumbilo.

²⁵ Ee Aba wa hachi, wurumwengu ndeghukuichi oho, ela ini nakuichi, na awa waichi angu ni oho korenidumieghe.

²⁶ Nameria kukubonya kumanyike kwawo, nani nichachuria kubonya wokoni, eri ulo lukundo kunikunde nalo lukaie andenyi kwawo, nani nipate kukaia andenyi kwawo.”