JOHANE 16 - Biblia Ilagho Jiboie Kwa Wandu Wose

¹ “Namghoria malagho agha, eri msakejisigha irumirio jenyu.

² Wandu wichammbinga sunagoginyi rawo, sena ngelo iacha uo ose ucham'bwagha inyo, uchaghesha wei, uamdumikia Mlungu.

³ Nawo wicham'bonya huwo kwa kukaia ndewimwichi uja Aba, hata ini anduangi.

⁴ Nani namghoria agho kiimbiri, eri iji ngelo yaro yavika, mpate kukumbuka angu neremghorieghe. “Seremghorieghe malagho agha kiimbiri angu nerekwanyeghe andwamweri nenyo.

Kazi ya Roho Mweli

⁵ Ela idana niaghenda kwa uo orenidumieghe, hata ndekuwadie mndungi konyu unikotiagha, ‘Welee, kwenda hao?’

⁶ Nani angu namghoria maza iri, ngolo renyu rachulwa ni wasi.

⁷ Elaima namghoria loli, ichamfwana inyo ini ngaghenda, angu ngera niseghendagha, uja Mtesia ndechaamchea anduangi; ela ngaghenda, nichamduma konyu.

⁸ Nao moni kasikira wacha, uchaghuwonyera wurumwengu worinyi seji ghukosere; kwa kaung'a, na kwa hachi, na kwa kutanywa.

⁹ Kwa kaung'a, angu wiserenirumirieghe ini;

¹⁰ kwa hachi, angu niaghenda kwa Uja Aba, nenyo ndemchaaniwona sena;

¹¹ kwa kutanywa, angu m'baa wa wurumwengu ughu wameria kutanywa.

¹² “Neko na malagho mengi ghemghoria, ela ndemdimagha kughiwada idana anduangi.

¹³ Ela kasikira wacha uja Roho wa loli, uchamghenja kwa loli rose; angu ndechaaghora kwa nguma yake moni anduangi, ela uchamghoria agho gheni ughisikiragha, sena uchamghoria maza richagha.

¹⁴ Uo moni uchanikasa ini, angu uchamghoria agho gheni uchaaghiwusa kufuma kwapo.

¹⁵ Vose viko na Aba ni vapo, niko namzera angu Uo Roho uchawusa ghapo, na kumghoria inyo.

Wasi na kuboilwa

¹⁶ “Kwa ngelo ndini ndemchaaniwona, sena kuida ngelo ndini mchaniwona.”

¹⁷ Wamu wa wanughi wake wikakotiana, “Kutambua kwaro niki ughoragha, ‘Kwa ngelo ndini ndemchaaniwona, sena kuida ngelo ndini mchaniwona?’ Na sena ‘Angu niaghenda kwa uja Aba.’”

¹⁸ Nao wikaghamba, “Isi ndeditambukilwagha seji ughoragha, ‘Kwa ngelo ndini.’”

¹⁹ Jesu oremanyireghe angu wakunda kumkotia, niko ukawizera, “Welee, mwaawuyakotiana kutambua kwaro agho naghora, ‘Kwa ngelo ndini ndemchaaniwona, sena kuida ngelo ndini mchaniwona?’

²⁰ Namghoria loli, inyo mchalila na kudikwa ni mbori, ela wurumwengu ghuchaboilwa, mchakaia na wasi, ela wasi ghonyu ghuchaghaluswa kukaia kuboilwa.

²¹ Iji muka wakakufungua, wadakaia na wasi angu ngelo yake ekumba lufu yameria kuvika; ela iji mwana wameria kuvalwa wadaliwa luja luwawo lose kwa kuboilwa, angu mundu wavalwa wurumwengunyi.

²² Na inyo idana moko na wasi, ela nichamchea sena, na ngolo renyu richachulwa ni kuboilwa, na kuboilwa konyu mndungi ndedimagha kumsoka anduangi.

²³ Ituku ijo ndemchaanilomba kilambo chingi anduangi. Namghoria loli, icho chose mchaalomba kwa uja Aba kwa irina japo uchamneka.

²⁴ Jingi ndemlombie kilambo chingi kwa irina japo. Lombenyi, nenyo mchapata; kuboilwa konyu kukate.

Kughusima wurumwengu

²⁵ “Namghoria malagho agha kwa mifwano. Ngelo iacha nani sichaaghora nenyo kwa mifwano anduangi, ela nichamghoria worinyi maza ra uja Aba.

²⁶ Ngelo iyo mchalomba kwa irina japo. Siwueghora wei ini nichamlombia kwa Aba anduangi;

²⁷ angu uo moni wamkunde inyo, kwa kukaia inyo mwanikunda ini, na kurumiria angu nerefumieghe kwa Aba.

²⁸ Ini nerefumieghe kwa Aba, ngacha wurumwengunyi; nani idana niaghusigha wurumwengu, na kuwuya kwa Aba.”

²⁹ Nao wanughi wake wikamzera, “Ola idana kwaghora worinyi kuseko na mifwano.

³⁰ Idana damanya kwaichi vilambo vose, hata ndekukunde mndungi ukukotie ilagho jingi anduangi; kwa huwu darumiria angu korefumieghe kwa Mlungu.”

³¹ Jesu ukawitumbulia, “Idana niko mwarumiria?

³² Ngelo iacha, nayo yameria kuvika, inyo mmbose mchasaghiswa kula mundu ughende andu kwake; na ini nichasigharika niekeri. Ela siko niekeri anduangi, kwa kukaia Aba oko andwamweri nani.

³³ Namghoria malagho agha, mpate kukaia na sere andenyi kwapo; mchakaia na wasi wurumwengunyi, ela kaienyi na ngolo, ini naghusima wurumwengu.”