JEREMIA 8 - Biblia Ilagho Jiboie Kwa Wandu Wose

¹ “Ngelo iyo, maindi gha wazuri wa Juda, na gha wabaa wawo, na gha wakohani, na gha walodi na gha wandu wose wikaie Jerusalemu, ghichafunywa makaburinyi kwawo,

² na kuanikwa airuwenyi na morinyi, na majeshi ghose gha mlungunyi, agho wereghikundieghe wikighidumikia; wikighinugha, na kughilola na kughitasa. Ndewichaatumbanywa na kurikwa, ela wichakaia sa wuchafu andoenyi.

³ Wandu wose wawiwi wisigharikie wa mbari ihi, wichakaia na bea efwa kuchumba kukaia moyo, andu kose niwiwingie wiendekaia;” waghamba BWANA wa majeshi.

Kaung'a na Ikabo

⁴ BWANA ukanizera nighore na wandu wake huwu, “Wandu wikaghwa-lee, ndewiwukagha? Mundu ukawuya nyuma, ndeheagha sena anguwada?

⁵ Kwaki sena awandu wa Jerusalemu wiwurie nyuma wiseheagha? Wiamaziriana na maza ra mikalo, nawo walegha kughaluka na kuhea.

⁶ Nasikirie nao ngasikira, ela ndewiwadie wuloli ghungi. Mndungi ndewuehea wuwiwi ghwake, ughambe, ‘Nabonya wada huwu?’ Kula umu uaghenda kwa chia rake reni, kara kara na farasi ikimbiagha cha wudenyi.

⁷ Ichachula jiburukagha mbeonyi jaichi ngelo rake rewuya, hata mbughi, na mbeumbeu, na mnyange walindiagha ngelo rawo rewuya, ela wandu wapo ndewiichi sharia rapo.

⁸ Mdima wada kughora wei moko na hikima, na sharia yapo andenyi konyu? Ola wonenyi seji walimu wa sharia wiandikie malagho ghisena wuloli, na kuibonya sharia ya tee.

⁹ Awo wandu wa hikima wichafushwa waya, wichashinika na kuposhoka, waleghie ilagho japo, da iyo ni hikima iko andenyi kwawo?

¹⁰ Kwa wundu ugho, waka wawo nichawineka wandu wazima; na mbuwa rawo nicharineka wandu wiwisimie; kwa kukaia kufuma mtini wawo hata m'baa wawo, kula umu wawo oochulwa ni bea ya fwaida iseko ya hachi; kufuma mlodi hata mkohani, kula umu uakalia wandu.

¹¹ Weerighita chonda cha wandu wapo ighu ighu, wikighamba, ‘Sere, sere,’ ingelo sere ingi iseko.

¹² Welee, werewonieghe waya iji werebonyereghe ugho wuwiwi? Ndewerewonieghe waya hata kutini hata ndewiichi kufwa waya. Kwa wundu ugho wichaghwa aghadi ya awo wighue, Na ngelo nichaawikaba wichaghwa putu.

¹³ “Ngelo nichaawitumbanya wandu wapo wichakaia sa mzabibu ghusewadie zabibu, na sa mtini ghusewadie tini; na mbashu raro richakaia riomie, na icho nerewinekieghe, wichasokwa.”

¹⁴ Wandu wakotia, “Kwaki dinyamagha kima? Kwanyikenyi chiaimweri, nndokonyi diighendie mizi ya ngome, diendetotera aeni aho; kwa kukaia BWANA Mlungu odu wamerie kudifunya ditote, nao wadinekie machi ghiko na sumu dipate kunywa; kwa kukaia damerie kum'bonyera kaung'a.

¹⁵ Dailolie sere, ela ndedipatire wucha ghungi, dikazighanira ngelo eboiswa, ela dikaawona maza reobosha.

¹⁶ Mrurumo ghwa farasi ra wamaiza wedu ghwasikirika kufuma Dani, lwaka lwa farasi rawo ra womi, lwasughusa ndoe yose. Wacha kujimeria isanga chiaimweri na kula kilambo chiko andenyi yaro, ugho muzi na wandu wikaiagha andenyi yaro.”

¹⁷ BWANA waghamba, “Olenyi niareda choka aghadi konyu, weke mwaropo wisedimagha kubonywa wughanga; naro richamluma.”

Wasi ghwa Jeremia kwa wundu ghwa wandu wake

¹⁸ Wasi ghwapo ndeghudimagha kuhoreshwa, ngolo yapo yakaia mkongo andenyi kwapo.

¹⁹ Sikirenyi kililo cha wandu wapo mzinyi, kufuma wulacha ghwaro ii chia, hata wushapa ghwaro ii chia “Welee, BWANA waaisigha Jerusalemu putu? Huwo mzuri wa Jerusalemu ndeuko?” BWANA watumbulia, “Kwaki wanivaviragha ngolo na iro fwana rawo rewachwa; na iyo milimu yawo ya kighenyi?”

²⁰ Wandu watumbulia, “Ngelo ekuwida yaida, na sumesu yasia; nesi daduagha disekirwagha.”

²¹ Angu kukabwa kwa wandu wapo ni kukabwa kwapo, nalila, na kufwa waya.

²² Wele wughanga ghungi ghohoresha ndeghuko Gileadi? Ndekuwadie mghanga ungi aho? Kwaki sena wandu wapo wiseboagha?