JEREMIA 6 - Biblia Ilagho Jiboie Kwa Wandu Wose

Jerusalemu kurughailwa ni wamaiza

¹ Kimbirienyi wusalama inyo wandu wa Benjamini! Fumenyi Jerusalemu! Kabenyi tarumbeta aho Tekoa, wonyerenyi alama aho Beth-Hakeremu, kwa kukaia wuwiwi ghwa kunoneka m'baa nandighi ghwaawuyacha kufuma kaskazinyi.

² Nichaghutotesha ugho muzi ghughokie ghwa Jerusalemu, muzi ghuboie ghuboisiro nicha.

³ Wazuri na majeshi ghawo wichacha kulwa nagho; wichadunga hema rawo kughumaria chia rose, na kula mundu andu kwake.

⁴ Wichaaghamba, “Kuboisenyi dilo na Jerusalemu, diwikabe ngelo ya dime ghadi.” Ela sena ii chia wiaghamba, “Dachelewa nandighi ndoe yameria kuswa; na virerendi va luma lwa kenyi vaawuyachurikia kusea.

⁵ Kwa huwo wukenyi diwikabe nakio, dipate kuritotesha ngome ra mizi yawo.”

⁶ BWANA wa majeshi waghora huwu, “Demenyi midi yawo, m'bonye wurigha, mpate kughurughaia ugho muzi ghwa Jerusalemu, kwa kukaia ugho nigho muzi ifwane ghukabo kwa wundu ghwa kuchulwa ni kukoronga.

⁷ Seji kisima chifunyagha machi ghihorie ni huwo koni Jerusalemu ikaiagha na wuwiwi ghwake; lung'eto na kunoneka vasikirika andenyi yake, wukongo na vonda vawoneka imbiri kwapo kari kose.

⁸ Malagho agho ndeghikufundishe ee Jerusalemu nisechetana na oho; na kukubonya kuwuye mduu, isanga jisekailwagha ni wandu.”

Israeli uleghie kusikira

⁹ BWANA wa majeshi ukanizera, “Kwanyenyi masighariko gha Israeli nicha, seji mundu ukuwidagha zabibu, ukiwuria-wuria a mbashunyi raro.”

¹⁰ Nani ngaghamba, “Malaghiro agha nimzera angu nimghoria ani udimagha kusikira? Ola madu ghawo ghafindikikie, ndeghidimagha kusikira; hata ilagho ja BWANA kwawo jakaia sa madukano, ndejikundikie kwawo; hata ndejiwiboiagha anduangi.

¹¹ Kwa huwo nachulwa ni machu gha BWANA; Ilagho ja BWANA janisira ndighi kujiwadia.” BWANA ukanizera, “Dia agho machu ghapo kwa wana chienyi, na wokoni andenyi ya makwanyiko gha wandu wa irika. Womi wilowue na waka wilowolo wichadwalwa chiaimweri, na waghosi na awo wighosere nandighi; hata ungi ndechaasighwa.

¹² Nyumba rawo richanekwa wandu wazima, mbuwa rawo chiaimweri na waka wawo wori, kwa kukaia nichaghughorua mkonu ghwapo kuwikaba wandu wose wikaiagha isangenyi.

¹³ Weechulwa ni bea wose, kufuma mtini hata m'baa wawo; wakunda kupata fwaida risena hachi, kufuma mlodi hata mkohani, kula umu uabonya mikalo.

¹⁴ Waawuyatima kuboisa chonda cha wandu wapo ighu ighu tu; wikighamba, ‘Sere, sere,’ sena sere ingi iseko.

¹⁵ Welee, werewonieghe waya ingelo werebonyereghe wuwiwi ghwawo? Hata kutini; ndewerewonieghe waya hata kufwa waya anduangi. Kwa huwo wichaghwa aghadi ya awo wimerie kughwa, ingelo nichaakaia ngiwineka adhabu, nawo wichakumbwa noko,” waghamba BWANA.

Israeli kulegha chia ya Mlungu

¹⁶ BWANA waghora huwu, “Kaienyi kimusi chienyi ra matano mzighane, mkotie iro chia ra kala, andu iyo chia ndicha iko; mpate kughenda nayo, na kuhora rohonyi konyu. Ela wikaghamba, ‘Isi ndedichaaghenda nayo anduangi.’

¹⁷ Nawikie walindiri aighu yako ngighamba, ‘Sikirenyi lwaka lwa tarumbeta.’ Ela wikaghamba, ‘Ndedilusikiragha.’

¹⁸ Kwa huwo sikirenyi inyo mbari; mpate kumanya ee izungu ja wandu, agho ghichaawipata awo wandu wapo.

¹⁹ Sikirenyi ee ndoenyi, nichareda mawiwi aighu ya wandu awa, nagho ni malipo gha mipango yawo; kwa kukaia ndeweresikireghe malagho ghapo, wikailegha sharia yapo.

²⁰ Ugho ubani kufuma Sheba niredelwa ghwaki? Na marumba kufuma isanga ja kula? Vizongona venyu vekora sivirumirie, hata siwueboilwa ni vizongona venyu putu.

²¹ Olenyi nawika vikuwarisho vewikuwara wandu awa, weke aba na wana wawo wichakuwa chiaimweri, na mmbenyu na mghenyi wake wichatota chiaimweri.”

Kuchelwa ni wamaiza kufuma kaskazinyi

²² BWANA waghamba huwu, “Olenyi wandu wichacha kufuma isanga ja kaskazinyi, mbari mbaa yanyavurika kufuma isanga ja kula nandighi ja ndoenyi kubonya wuda.

²³ Wadwae ndana na mafumu ghawo; wang'etere hata ndewiwadie wughoma ghungi. Tiri ra kughenda kwawo ni kara kara na kururuma kwa bahari; wajoka aighu ya farasi na kukupanga sa mundu uko tayari kwa wuda, wipate kulwa na oho ee Jerusalemu.”

²⁴ Wandu wa Jerusalemu waghamba, “Dasikire agho malagho na mikonu yedu ikadateweleka. Dapatwa ni luwawo lubaa sa lwa muka ukumbagha lufu.

²⁵ Kusefume noko cha mbuwenyi, hata kusakesela a chienyi; kwa kukaia m'maiza wadwae maswagha, nesi dachulwa ni wowa chia rose.”

²⁶ BWANA wawizera wandu wake, “Ronyi nguwo ra magunia na kung'ara maivunyi; lilenyi nandighi kwa luwawo sa lolilia mwana wa womi wa ititi, angu mtoteshi udicheagha aighu yedu shwa wori.

²⁷ Jeremia, nakubonyere oho kukaie mundu ozighana na kupima wandu wapo, seji chuma chipimwagha, kupate kumanya chia rawo.

²⁸ Wose ni wandu wighilikie wileghagha, wandu wighendanyagha na waghori tee, weeka sa shaba na chuma; na wose wadabonya wuwiwi.

²⁹ Mpuputo ghwaawuyafuria modo kwa ndighi mbaa, kuinja risasi, ela iyo kazi eelesha yaawuyabonywa duu, kwa kukaia awa wandu weeranganywa na wawiwi.

³⁰ Wichawangwa feza isena kazi angu ini BWANA nimerie kuwilegha.”