JEREMIA 52 - Biblia Ilagho Jiboie Kwa Wandu Wose

Kughwa kwa Jerusalemu

¹ Zedekia orekoghe mundu wa irika ja miaka mirongo iwi na ghumweri ingelo orebonywagha kukaia mzuri; ukabonya nguma Jerusalemu kwa miaka ikumi na ghumweri. Mae orewangwagha Hamutali mwai wa Jeremia wa Libna.

² Ukabonya mawiwi imbiri ya BWANA, karakara seji Jehoiakimu orebonyereghe.

³ Loli kwa wundu ghwa machu gha BWANA, maza rikawinonekia wandu wa Jerusalemu na Juda, hata BWANA ukawifunya wikaie kula nao. Nao Zedekia ukamlegha mzuri wa Babuloni.

⁴ Na ituku ja ikumi ja mori ghwa ikumi, mwaka ghwa ikenda ghwa kubonya nguma kwake, Nebukadnezari mzuri wa Babuloni ukacha na ijeshi jake jose, kughukaba muzi ghwa Jerusalemu, ukaghurughaia.

⁵ Muzi ghukarughailwa hata mwaka ghwa ikumi na imweri ghwa Mzuri Zedekia.

⁶ Ituku ja ikenda ja mori ghwa kana, njala ikabia andenyi ya ugho muzi hata wandu wa ijo isanga wikasowa kindo chingi cheja.

⁷ Niko wandu wikaturua mruma a wurighenyi ghwa muzi, na masikari ghose ghikafuma mzinyi nakio, wikinugha chia ya mbengenyi iko ghadi na ghadi ya mawurigha awi kaavui na mbuwa ya mzuri, ingelo Wababuloni werekoghe wikighurughaia muzi. Nao wikaghenda wikinugha chia ya Araba.

⁸ Ela ijeshi ja Wababuloni jikamnugha mzuri; wikammbwada Zedekia aho wurindinyi cha Jeriko, na ijeshi jake jose jikasaghiswa kufuma kwake.

⁹ Niko wikammbwada mzuri, na kumdwa hata kwa mzuri wa Babuloni aho Ribla, isanga ja Hamathi; Nebukadnezari ukamtanya aho.

¹⁰ Ukawibwagha wana wa Zedekia imbiri ya meso ghake, na wokoni ukawibwagha wabaa wa Juda aho Ribla.

¹¹ Ukafunya meso gha Zedekia, na kumfunga na pingu. Mzuri wa Babuloni ukamdwa noko cha Babuloni, ukamngira kifungonyi hata kufwa kwake.

Kunonwa kwa Hekalu

¹² Ituku ja ikumi, ja mori ghwa kasanu, nagho ni mwaka ghwa ikumi na ikenda ghwa kubonya nguma kwake Nebukadnezari mzuri wa Babuloni, uja Nebuzaradani m'baa wa majeshi gha Babuloni, uo orekoghe ukimdumikia mzuri, orengirieghe Jerusalemu.

¹³ Ukaikora Hekalu ya BWANA, na ngome ya mzuri, na nyumba rose ra Jerusalemu; orekorieghe kula nyumba erekoghe mbaa.

¹⁴ Na ijeshi jose ja Wababuloni jerekwanyeghe na m'baa wa walindiri, werechikanyireghe mawurigha ghose ghimarie Jerusalemu.

¹⁵ Nao Nebuzaradani, uo m'baa wa majeshi, ukawidwa wunyika wandu wamu werekoghe wakiwa wichumbie, na masighariko ghose gha wandu werekoghe andenyi ya muzi, chiaimweri na awo werekimbirieghe cha kwa mzuri wa Babuloni, chiaimweri na mafundi gheresigharikieghe.

¹⁶ Ela Nebuzaradani uja m'baa wa ijeshi, ukawisigha wandu wamu werekoghe wakiwa wichumbie isangenyi, wiboiseghe mizabibu na kulima.

¹⁷ Wababuloni wikarichikanya vipande vipande rija nguro ra shaba rerekoghe andenyi ya Hekalu ya BWANA, na chija kilambo cha shaba chewadia beseni ekuoghosha, na ija beseni mbaa ya shaba, wikaviduka; wikaghenja shaba yose cha Babuloni.

¹⁸ Wikadwa nyungu na miiko, na makasi, na bakuli, na vilambo vefukiria marumba, na vilambo vose va shaba vitumilwagha kwa wudumiki andenyi ya Hekalu;

¹⁹ wokoni na bakuli ndini, vilambo vealua modo, na bakuli na nyungu, na kilambo chewikiria taa, na vilambo vefukiria marumba, na bakuli ra vizongona venywa. Kula kilambo cherekoghe cha dhahabu cheredwaloghe ni uja m'baa wa walindiri, na ivo verekoghe va feza ukavidwa chiaro wori.

²⁰ Iro nguro iwi rerebonyeroghe ni Mzuri Solomoni kwa wundu ghwa Hekalu, itangi ibaa, na fwana ra njau ikumi na iwi rewadia ijo itangi, rerekoghe rilemere nandighi risedukikagha;

²¹ wulacha ghwa iro nguro ghorekoghe meta wunyanya na wurifu ghwaro meta isanu na pointi idadu; redeeka ra mruma; wurifu ghwa shaba ghorekoghe milimeta mirongo mfungade na isanu,

²² na aighu ya kula nguro korekoghe na shaba wuighu ghwaro meta iwi na pointi iwi na makomamanga, rose ribonyero kwa shaba, rikimara icho chongo cha shaba; nguro ya kawi edebonywa woruwo, na makomamanga gharo.

²³ Korekoghe na makomamanga mirongo ikenda na arandadu kula luwaru. Makomamanga ghose gherekoghe ighana jimweri aighu ya kazi ya nyavu kurimara chia rose.

Wandu wa Juda kudwalwa cha Babuloni

²⁴ Nebuzaradani, mbaa wa majeshi oremdwaeghe Mkohani M'baa Seraia, na mkohani wa kawi Zefania, na walindiri wa mnyango wadadu;

²⁵ na kufuma mzinyi ukamdwa m'baa umu wa masikari, na wanjama mfungade wa mzuri awo werekuloghe andenyi ya muzi. Na muandiki wa m'baa wa majeshi uo orekoghe ukiwiandika wandu wa isanga; na wandu wamu wabaa wa isanga mirongo irandadu, awo werekuloghe aghadi ya muzi.

²⁶ Nao Nebuzaradani, uo m'baa wa majeshi ukawiwada na kuwireda kwa mzuri wa Babuloni aho Ribla.

²⁷ Niko mzuri wa Babuloni ukawikaba na kuwibwagha aho Ribla isanga ja Hamathi. Kwa huwo wandu wa Juda wikadwalwa wunyika kufuma isangenyi jawo.

²⁸ Ughu nigho mtalo ghwa wandu weredwaloghe wunyika ni Nebukadnezari: Mwaka ghwa mfungade, Wayahudi elfu idadu na mirongo iwi na idadu;

²⁹ mwaka ghwa ikumi na wunyanya ghwa Nebukadnezari, orewidwaeghe wunyika wandu maghana wunyanya mirongo idadu na wawi kufuma Jerusalemu;

³⁰ mwaka ghwa mirongo iwi na idadu ghwa Nebukadnezari, Nebuzaradani uja m'baa wa majeshi orewidwaghe wunyika wayahudi maghana mfungade mirongo ina na wasanu. Wandu wose weredwaloghe wunyika ni elfu inya na maghana arandadu.

³¹ Mwaka ghwa mirongo idadu na mfungade ghwa kudwalwa wunyika kwa Jehoiakini mzuri wa Juda, ituku ja mirongo iwi na isanu ja mori ghwa ikumi na iwi, Evil-merodaki uwurie mzuri, oremmbonieghe wughoma Jehoiakini mzuri wa Juda, ukamfunya kifungonyi.

³² Ukadedanya nao ukimmbonia wughoma na kumjosa daraja kuchumba wazuri wambao werekwanyeghe.

³³ Niko Jehoiakini ukainja nguwo rake ra kifungonyi, na kula ituku ukakaia ukija vindo mezenyi kwa mzuri;

³⁴ ukakaia ukilipwa nicha ni mzuri kunughana na haja rake ra kula ituku, hata ituku ja kufwa kwake.