JEREMIA 43 - Biblia Ilagho Jiboie Kwa Wandu Wose

Jeremia kudwalwa cha Misri

¹ Niendameria kuwighoria wandu wose agho malagho ghose BWANA Mlungu wawo orenidumieghe nagho kwawo,

² Azaria mwana wa Hoshaia, na Johanani mwana wa Karea, na wandu wose wikudukie wikanizera, “Kuaghora tee. BWANA Mlungu odu ndekudumie kudizere diseghende Misri kukaia aho;

³ ela Baruku mwana wa Neria nuo wakuduma kughore kiwiwi aighu yedu kudingire mikonunyi kwa Wababuloni wipate kudibwagha, angu kudidwa wunyika cha Babuloni.”

⁴ Kwa huwo Johanani mwana wa Karea na wabaa wose wa majeshi na wandu wose, wikalegha kumsikira BWANA, wipate kusigharika isanga ja Juda.

⁵ Na Johanani mwana wa Karea na wabaa wose wa majeshi wikawada masighariko ghose gha wandu wa Juda, awo werewurieghe kukaia isanga ja Juda, wifumie kwa mbari rose aho weresaghisiroghe,

⁶ wandu wa womi, na wa waka, na wana, na wai wa mzuri, na kula mundu oresighiloghe ni Nebuzaradani uja m'baa wa majeshi mikonunyi kwa Gedalia mwana wa Ahikamu wawae Shafani; hata ini na Baruku mwana wa Neria wikadidwa,

⁷ na kughenda isanga ja Misri; kwa kukaia ndeweremsikireghe BWANA anduangi. Wikaghenda na kuvika Tahpanesi.

⁸ Niko BWANA ukaghora nani aho Tahpanesi

⁹ ukighamba, “Duka magho mabaa, kughivise andenyi ya chokaa, aho mbengenyi engia cha ngomenyi kwa Farao iko Tahpanesi, wandu wose wa Juda wikizighana;

¹⁰ nao kuwizere kukaia ini BWANA wa majeshi uo Mlungu wa Israeli naghamba nichamdumiria mdumiki wapo Nebukadnezari uo mzuri wa Babuloni, nao uchawika kifumbi chake cha nguma aighu ya agha magho kwaghivisa, nao uchadunga hema yake ya kiwuzuri aighu yaro.

¹¹ Uchacha na kujikaba isanga ja Misri, na awo wandu wiwikilo kufwa kwa saka izamie, wichafwa kwa saka izamie; na awo wiwikilo wedwalwa wunyika, wichadwalwa wunyika; na awo wiwikilo webwaghwa wudenyi wichabwaghwa wudenyi.

¹² Nichakora hekalu ra milungu ya Misri, naro richahia; na Nebukadnezari uchaikora milungu yawo, angu kuidwa wunyika. Na sa iji koni mlisha uoghoshagha nguwo rake risekaie na inda, huwo koni mzuri wa Babuloni uchaelesha isanga ja Misri na kughala kwa sere.

¹³ Ucharinona fwana retasa riwikilo Heliopolisi aho Misri, na kurikora hekalu ra milungu ya Misri.”