JEREMIA 35 - Biblia Ilagho Jiboie Kwa Wandu Wose

Jeremia na Warekabi

¹ Matuku gha Jehoiakimu mwana wa Josia, mzuri wa Juda, BWANA oreghorieghe nani ukighamba,

² “Ghenda kwa wandu wa kichuku cha Warekabi kudedanye nawo; kuwirede andenyi ya chimu cha vumba va Hekalu ya BWANA; nao kuwineke divei winyo.”

³ Niko ngammbwada Jaazania mwana wa Jeremia wawae Habazinia, na waruna na wana wake wose, na wandu wa kichuku cha Warekabi.

⁴ Ngawireda andenyi ya Hekalu ya BWANA, andenyi ya chumba cha wana wa Hanani mwana wa Igdalia, mundu wa Mlungu; cherekoghe kaavui na chumba cha wabaa, naighu ya chumba cha Maaseia mwana wa Shalumu, mlindiri mnyango.

⁵ Niko ngawika bakuli na vikombe vichue divei imbiri ya Warekabi ngawizera, “Nyonyi divei.”

⁶ Ela wikatumbulia, “Isi ndedinywaghwa divei ingi, kwa kukaia aba Jonadabu mwana wa Rekabu oredilaghirieghe, ‘Inyo jingi msenyo divei, hata wana wenyu kwa kala na kala.

⁷ Mseaghe nyumba hata kuwa mbeu, msewe, angu kukaia na mbuwa ra mizabibu; ela mchakaia hemenyi matuku ghenyu ghose, mpate kukaia matuku mengi isangenyi mjighendiagha.’

⁸ Damerie kusikira malaghiro ghose dighorelo ni aba odu Jonadabu mwana wa Rekabu, seji udizerie disenyo divei marangi ghedu ghose, isi hata waka wedu, hata wana wedu wa womi na wa waka;

⁹ hata disakeagha nyumba rekaia. Isi ndediwadie mbuwa ra mizabibu, hata mbuwa hata mbeu;

¹⁰ ela dadakaia hemenyi, nesi damerie kumsikira na kubonya ghose dilaghirilo ni aba odu Jonadabu.

¹¹ Ela iji Nebukadnezari mzuri wa Babuloni orechieghe kulwa na iji isanga, dereghambieghe, ‘Choonyi dijoke Jerusalemu kwa wundu ghoobua ijeshi ja Wababuloni na ijeshi ja Wasiria.’ Kwa huwo dadakaia Jerusalemu.”

¹² Niko BWANA ukaghora nani;

¹³ BWANA wa majeshi, Mlungu wa Israeli wanizerie nighende niwizere wandu wa Juda na awo wikaiagha Jerusalemu, “Welee, moolegha mafundisho, na kuleghasikira malagho ghapo?

¹⁴ Malaghiro Jonadabu mwana wa Rekabu ulaghirie wana wake wisenyo divei, waghiwadie; nawo ndewinywagha divei hata linu, kwa kukaia wamsikire ndee. Ini naghorie nenyo sena na sena, ela ndemunisikire anduangi.

¹⁵ Nadumie wadumiki wapo walodi wose konyu sena na sena ngimzera kula umu onyu ughaluke kufuma kwa chia rake mbiwi, m'boise mighendo yenyu. Msakenugha milungu mizima na kuidumikia, nenyo mchakaia isangenyi neremnekieghe inyo na weke ndeyo. Ela ndemdeghie madu kusikira, hata kusikira ndemusikire.

¹⁶ Wana wa Jonadabu mwana wa Rekabu wamazirie malaghiro werenekeloghe ni ndee, ela awa wandu ndewinisikire ini.

¹⁷ Kwa huwo ini BWANA, Mlungu wa majeshi, Mlungu wa Israeli naghamba huwu, Olenyi nichawiredia wandu wa Juda, na wose wikaiagha Jerusalemu mawiwi ghose nighighorie aighu yawo; kwa kukaia naghorie nawo wikalegha kusikira, ngawiwanga nawo wikalegha kudika.”

¹⁸ Ela kwa Warekabi Jeremia ukaghamba, “BWANA wa majeshi, Mlungu wa Israeli waghamba kukaia: Kwa kukaia mwamsikire ndeyo Jonadabu, na kunugha malaghiro ghake, mkabonya agho ghose umlaghirie,

¹⁹ BWANA wa majeshi, Mlungu wa Israeli waghamba huwu, Jonadabu mwana wa Rekabu jingi ndechaasowa mundu onidumikia.”