JEREMIA 3 - Biblia Ilagho Jiboie Kwa Wandu Wose

Kusowa wuloli kwa Israeli

¹ BWANA waghamba, “Keni mundu ukamsigha mkake, nao ulowolo ni mundu mzima, wadima sena kummburia muka uo? Huwo isanga ndajadalushwa anguwada? Ela oho Israeli kwanughie milungu mingi sa malaya unughagha wandu wengi, sena kookunda kuwuya kwapo.

² Zighana nokoighu cha mighondinyi kuwone ngera koko andu kungi kusighilo kusetasire milungu mizima! Korekoghe kukiwesera wandu wetasa milungu mizima chiaimweri nakumoni achienyi kara kara na Muarabu ulaliriagha wandu kireti. Kwanonie isanga kwa kutasa milungu mizima kwako.

³ Kwa huwo mishushure ya vua yamerie kughirilwa na vua ya kwari kusoweka. Sena kwadazighana sa ilaya, hata ndekune waya.

⁴ “Na idana kwanizera, ‘Oho ko aba, korenikundieghe kufuma niko mwanake;

⁵ ndekuchakaia na machu matuku ghose, hata ndekuchaazamilwa ni ini kwa kala na kala.’ Israeli, huwo niko kwawuyaghora, ela sena kwaawuyabonya wuwiwi ugho ghose kughudimagha.”

Suti ya Israeli na Juda kuhea

⁶ Matuku gha kubonya nguma kwa Mzuri Josia, BWANA orenizerieghe, “Welee, kwawonie seji uhu Israeli useko mloli wawuyabonya? Wawuyajoka kula mghondi mlacha, na kukaia aisi ya midi mibaa ipambie ukitasa milungu mizima.

⁷ Neregheshereghe kewada nyuma ya kubonya agho uchaniwuria, ela nderewurieghe. Juda wa kwawo useko mloli ukawona ghose.

⁸ Juda wawonie putu kukaia, namnekie Israeli barua etana nao kwa wundu ghwa wulaki ghwake, ela nao moni kwa kusowa wuloli ukalemwa ni kuobua; ukafuma na kubonya wumalaya.

⁹ Orewonieghe wumalaya kukaia ilagho jiangue kwake, ukanona isanga kwa kubonya wulaki ghotasa magho na midi.

¹⁰ Aighu ya agho ghose, uja Juda wa kwawo useko mloli nderewurieghe kwapo kwa ngolo yake yose, ela odeeka ukibonya mikalo tu, waghamba BWANA.”

¹¹ BWANA ukanizera kukaia, hata ngera Israeli oremsighieghe, wacheewoneka kukaia baa kuchumba Juda useko mloli.

¹² Ukaniduma nighende nimzere Israeli huwu: “Wuya ee Israeli kuseko mloli, Sichaakuvaia machu sena, kwa kukaia ini ne wa wughoma, sichaakaia na machu kwa kala anduangi.

¹³ Rumiria ikosa jako tu, kukaia, korenileghieghe ini BWANA Mlungu wako, kukakufunya kutasa milungu ya kighenyi, aisi ya kula mudi m'baa ghupambie, hata ndekorelusikireghe lwaka lwapo anduangi.

¹⁴ “Wuyenyi ee wandu mseko na wuloli, angu ini ne Bwana onyu, nichammbwada umweri kufuma mzinyi, na wawi kufuma kinyumba chimweri, nani nichamreda Jerusalemu.

¹⁵ “Nani nichamneka wabonyi nguma wiko na ngolo sa yapo, nawo wicham'bonyera nguma na kumchura hikima na kumanya.

¹⁶ Hata iji mwameria kuchurikia na kuera isangenyi, matuku agho, ndewichaja malagho gha Sanduku ya Ilaghano japo. Ndewichaaikumbuka angu kuighesha, hata wandu ndewichaakaia na haja nayo angu kubonya ingi zima anduangi.

¹⁷ Ngelo iyo, Jerusalemu ichawangwa ‘Kifumbi cha nguma cha BWANA’, na mbari rose ra wandu richakwanyika aho Jerusalemu imbiri ya BWANA, nawo ndewichaanugha ngolo rawo ra wung'eti sena anduangi.

¹⁸ Matuku agho, mbari ya Juda ichawadana na mbari ya Israeli, nawo wose wichafuma isanga ja kaskazinyi na kuwuya ijo isanga nerejinekieghe weke ndee jikaie ifwa jawo.”

Kutasa milimu kwa wandu wa Mlungu

¹⁹ BWANA waghamba, “Yakaiagha nicha saki ngera nedekuwika aghadi ya wana wapo, eri nikuneke isanga jighokie; na ifwa jiboie kuchumba ja mbari rose. Neregheshereghe kuchaniwanga Aba kuseko na ugho wundu ghwa kughaluka na kusigha kughendanya nani.

²⁰ Ela kwa loli kwaleghie kukaia mloli kwapo kara kara na muka useko mloli kwa mumi ee Israeli.”

²¹ Lwaka lwasikirika aighu mghondinyi, kulila na kulalama kwa wandu wa Israeli, kwa kukaia wailaghashire chia yawo, na kumliwa BWANA Mlungu wawo.

²² “Wuyenyi inyo wana mseko waloli, nani nichamkira kufuma kwa uko kusowa wuloli konyu.” Nenyo mwatumbulia, “Ola daawuyacha kwako, angu ni oho BWANA Mlungu odu.

²³ Ni loli kutasa milimu aighu mighondinyi na karamu ra lwafuo ni kwa tee. Hata mikutano yedu ekema ya mighondinyi ni sa ya tee nduu. Kwa loli kukia kwa Israeli kooka andenyi ya BWANA Mlungu odu.

²⁴ “Ela kufuma wanake ghodu, ughu wutasi ghwa milimu ghodifusha waya ghwanonie mali rose weke aba werepatireghe kwa wudumiki ghwawo, ng'ondi na ng'ombe rawo, na wana wawo wa womi na wa waka.

²⁵ Idana ndedilale andonyi kwa wundu ghwa waya ghodu, na uko kusowekelwa ni ishima kodu ndekudifinikire; kwa kukaia dabonyere kaung'a kwa BWANA Mlungu odu, chiaimweri na weke aba, kufuma wanake ghodu hata idime, hata ndederelusikireghe lwaka lwa BWANA Mlungu odu anduangi.”