JEREMIA 22 - Biblia Ilagho Jiboie Kwa Wandu Wose

Machilo gha Jeremia aighu ya kinyumba cha kiwuzuri cha Juda

¹ BWANA orenizerieghe nisee ngomenyi kwa mzuri wa Juda, nighore agha malagho,

² “Sikira ilagho ja BWANA ee Mzuri wa Juda, kuseagha kidombo aighu ya kifumbi cha nguma cha Daudi; oho, na wadumiki wako, na wandu wako wingiriagha iri mbenge;

³ BWANA waghamba, m'bonye malagho gha loli na gha hachi, mmbunje kilambo cha uo usokelo ni mkorongi. Msebonye kiwiwi, angu kumkita mghenyi, angu mwana mkiwa, angu muka mkiwa, angu kudia bagha ya mundu usena ikosa andu aha.

⁴ Angu loli mkamsikira, wazuri wichaidiria kwa iri mbenge, awo wiseagha kidombo aighu ya kifumbi cha nguma cha Daudi, wikijoka magare na aighu ya farasi, awo, chiaimweri na wadumiki wawo na wandu wawo.

⁵ Ela mkalegha kusikira agha malagho, BWANA waghema kwa uo moni kukaia, inyumba ichanonwa.

⁶ “BWANA waghamba huwu aighu ya ngome ya mzuri wa Juda, ‘Ini nadakuwona sa Gileadi, kooka sa mdo ghwa Lebanoni; elaima nichakubonya kuwuye kireti, muzi ghusekailwagha ni wandu.

⁷ Nichakuwikia watoteshi, kula umu na iswagha jake nawo wichadema nguro rako ra misida ireni riboie, na kurikumba modonyi.

⁸ “‘Na mbari ra wandu wengi wichaidia ughu muzi, kula mundu ukikotiana na mmbao, “Kwaki BWANA ughubonyere ughu muzi m'baa huwu?”

⁹ Nawo wichatumbulia, “Ni kwa kukaia wijisighie ilaghano ja BWANA Mlungu wawo, wikaitasa milungu mizima na kuidumikia.”’”

Machilo gha Jeremia aighu ya Joahazi

¹⁰ Msakemlilia Josia mzuri ufue angu kum'bonyera ifwa, ela mumlilie nandighi Joahazi uo mzuri udwalwagha wunyika; angu ndechaawuya hata kuwona isanga jake sena.

¹¹ BWANA waghora huwu aighu ya Joahazi mwana wa Josia, mzuri wa Juda, uo orebonyereghe nguma wulalo ghwa ndee Josia, ukafuma ukaghenda kufuma iji isanga. “Ndechaawuya aha sena,

¹² ela uchafuya ijo isanga udwalo wunyika, nao ndechaawona iji isanga sena.”

Machilo gha Jeremia aighu ya Jehoiakimu

¹³ “Ni bugha kwa mundu uaghagha nyumba kwa chia iseko ya hachi, na ghorofa rake kwa chia riseko ra hachi; uo umdumikishagha mmbao duu, usemlipagha malipo ghake;

¹⁴ uo ughambagha, ‘Nichakuaghia nimoni nyumba mbaa, na vumba vibaa va naighu;’ na kuibonyera madirisha, ukiibonyera wurigha ghwa mbau ra sida, na kughushinga rangi ya ngundu.

¹⁵ Kuaghesha kooka mzuri angu kusimanagha aighu ya kuagha na midi ya sida? Welee, ndeyo nderejieghe na kunywa, ukabonya agho ghiko gha loli na gha hachi? Aho niko orewonieghe mecha.

¹⁶ Oretanyireghe kwa hachi maza ra mkiwa na uo usowie, nao ukawona nicha. Uko niko kuwangwagha kummanya BWANA.

¹⁷ Ela mawoni gha ngolo yako ni aighu ya fwaida risefwanagha, na kudia bagha ra wandu wisewadia ikosa jingi, na kukuzaisira maza rekoronga wandu.”

¹⁸ Kwa huwo BWANA waghamba huwu aighu ya Jehoiakimu mwana wa Josia, mzuri wa Juda, “Ndewichaamlilia wikighamba, ‘Ai, o mwanidu wa womi!’ angu ‘Ai, o mwanidu wa waka!’ Ndewichaamlilia wikighamba, ‘Ai o bwana odu!’ angu ‘Ai o mzuri odu!’

¹⁹ Ucharikwa karakara na punda, ukikurudulwa na kukumbwa shighadi ya mbenge ra Jerusalemu.”

Machilo gha Jeremia aighu ya maza richagha ra Jerusalemu

²⁰ “Joka cha Lebanoni kukeme, wusira lwaka lwako aho Bashani, kukeme kufuma Abarimu; kwa kukaia awo wakundwa wako wose wameria kutoteshwa.

²¹ Nereghorieghe na oho ingelo korekoghe nicha, ela kukaaghora, ‘Sighisikiragha agho.’ Iyo edeeka ni tabia yako kufuma wanake ghwako, na jingi ndekonisikira.

²² Mbeo ichaweta kuwiinja wabonyi nguma wako; na wakundwa wako wichadwalwa wunyika; aho niko kuchaafwa waya nandighi, kwa wundu ghwa wuwiwi ghwako ghose.

²³ Oho kukaiagha Lebanoni, kubonyere andu kwako kokaia na midi ya Sida; kusirimika saki ngelo wasi ghuchaakuchea, sa ghwa muka wachelwa ni lufu lokufungua.”

Kutanya kwa Mlungu aighu ya Jehoiakini

²⁴ BWANA waghamba, “Sa iji koni nikaiagha moyo, hata ngera Jehoiakini mwana wa Jehoiakimu, mzuri wa Juda odeeka sa pete ya muhuri chalenyi chapo cha mkonu ghwa kiwomi, nadamfunya noko

²⁵ na kumngira mikonunyi kwa awo wandu wilolagha kum'bwagha, awo uwiobuagha, ee, uo Mzuri Nebukadnezari wa Babuloni na Wakaldayo.

²⁶ Nichamuda noko cha isanga izima chiaimweri na mae uo oremvaeghe, andu mserevailoghe; nenyo mchafuya aho.

²⁷ Mchakaia na bea ewuya isanga morevailoghe, ela mdua jingi msewurie aho sena.”

²⁸ Welee, umundu Jehoiakini waakaia sa nyungu imenyekie ibarikie, chombo chisetalwagha ni mndungi? Kwaki ukumbilo noko chiaimweri na wana wake cha isanga wisejiichi?

²⁹ Ee isanga, isanga, isanga, sikira ilagho ja BWANA!

³⁰ BWANA waghamba huwu, “Kumuandike umundu sa usewadie mwana ungi; mundu usechaawona nicha kwa ilagho jingi, matuku ghake ghose; kwa kukaia ungi wa wuvalo ghwake ndechaadima kuseria kifumbi cha nguma cha Daudi, na kubonyera isanga ja Juda nguma.”