JEREMIA 21 - Biblia Ilagho Jiboie Kwa Wandu Wose

Wulodi aighu ya kusimwa kwa Jerusalemu

¹ Iji nijo ilagho BWANA orenighorieghe ingelo Mzuri Zedekia oremdumirieghe Pashuri mwana wa Malkia na mkohani Zefania mwana wa Maaseia ukighamba,

² “Kukotie BWANA kwa wundu ghodu, kwa kukaia Nebukadnezari mzuri wa Babuloni waawuyabonya wuda nesi, kewada BWANA uchadibonyera mabonyo ghake gha mashiniko, upate kudiinjikia.”

³ Niko Jeremia ukawizera,

⁴ “Mumzere Zedekia huwu, BWANA, uo Mlungu wa Israeli waghamba, ‘Ola nichakwanya maswagha ghako gha wuda ghiko mkonunyi kwako, agho kwawuyatumia kulwa na mzuri wa Babuloni, na Wakaldayo, awo wakurughaia wurighenyi ghwako cha shighadi, nani nichaghireda chiaimweri ghadi na ghadi ya ughu muzi.

⁵ Ini moni nichalwa na oho kwa mkonu ghwapo ghwa ndighi, niko na machu ghibirie, najokwa nandighi.

⁶ Nani nichawikaba wandu wikaiagha andenyi ya ughu muzi, wose, mundu na nyamandu wichafwa kwa saka izamie.

⁷ Konyuma, nichamfunya Zedekia mzuri wa Juda, chiaimweri na wadumiki wake, na wandu wiko andenyi ya ughu muzi; awo wichaasigharika wisebwaghilo ni saka izamie, wuda angu njala; wingie mikonunyi kwa Nebukadnezari mzuri wa Babuloni, na kwa wamaiza wawo, awo wilolagha marangi ghawo. Uchawibwagha kwa lufu, ndechaawiwonia wughoma, kuwilekeria hata kuwifuya wughoma ghungi.’

⁸ “Na oho kuchawizera wandu awa huwu: ‘Nawika imbiri kwako chia ya irangi na chia ya kifwa.

⁹ Uo ose uchaakaia andenyi ya ughu muzi, uchabwaghwa wudenyi, na kwa njala, na saka izamie; ela uo uchaafuma na kukungira mikonunyi kwa Wakaldayo awo wamrughaia, uchakira irangi jake, nao uchapata irangi jake sa zawadi ya wuda.

¹⁰ Kwa kukaia namerie kughudumbuya ughu muzi ilagho jeghubonya kiwiwi, nichaghungira mikonunyi kwa mzuri wa Babuloni, nao uchaghukora na modo.’

Kutanya aighu ya nyumba ya kiwuzuri ya Juda

¹¹ “Ghora kwa nyumba ya kiwuzuri ya Juda huwu, Sikirenyi seji ini BWANA nighoragha,

¹² Ee kivalwa cha Daudi! ‘Bonyenyi hachi kula nakesho, mmbunje kilambo cha uo usokelo kufuma kwa uo mkorongi; machu ghapo ghisecheaka sa modo, na kumkora hata usepatike ungi oghurimisha, kwa wundu ghwa agho mawiwi ghenyu.’

¹³ “Ola neko aighu yako ee Jerusalemu, kukaiagha ighu kuchumba vololo andu kwa wurindi ghwa magho, inyo mghambagha, ‘Nani udimagha kuchalwa nesi? Na wei, nani udimagha kungia andu kodu?’

¹⁴ Nichakukaba kunughana na mabonyo ghako ghizamie, nichakora modo andenyi ngome yako na kutotesha kula kilambo chiko mbai-mbai yake.”