JEREMIA 20 - Biblia Ilagho Jiboie Kwa Wandu Wose

Kuleghapatana kwa Jeremia na mkohani Pashuri

¹ Idana mkohani Pashuri mwana wa Imeri, uo orekoghe m'baa wa Hekalu ya BWANA oresikireghe malagho nereghilodereghe.

² Niko Pashuri ukanikaba na kunifunganya na vilingo verekoghe Mbenge ya Wandu ya lughu aho Hekalunyi ya BWANA.

³ Nakesho yaro, Pashuri uendanifungua ngamzera, “BWANA ndewangagha irina jako Pashuri, ela wadajiwanga ‘Wowa Kula Andu.’

⁴ Angu BWANA waghamba, ‘Ola nichakubonya kuchulo ni wowa, na waghenyi wako wori wikuobuo. Kuchawiwona waghenyi wako wikibwaghwa kwa lufu ni wamaiza wawo; sena nichawingira wandu wa Juda mikonunyi kwa mzuri wa Babuloni, nao uchawidwa wunyika cha Babuloni na kuwibwagha kwa lufu.

⁵ Aighu ya agho, nichaneka wamaiza wenyu mali rose ra ughu muzi: fwaida raro rose, zawadi rose winekelo, na mashamo ghose gha wazuri wa Juda wichaghiwada na kughidwa wunyika noko cha Babuloni.

⁶ Na oho Pashuri chiaimweri na wose wikaiagha nyumbenyi kwako, mchadwalwa wunyika cha Babuloni; kuchaghenda na kufuya aho, kurikilo aho, chiaimweri na waghenyi wako awo kwawilodera tee.’”

Jeremia kumlalamikia BWANA

⁷ Ee BWANA, kwanikalia nani ngakalikia; oho kwawadie ndighi kunichumba ini, na oho kwameria kusima. Nawuya kilambo chesekwa dime dii, kula umu waawuyaniseka.

⁸ Kula ngelo nidedagha nawuyalila, ngikema, “Makorongo na kunoneka!” Kwa huwo uko kujighora ilagho ja BWANA, kwaniredia masholio na matiriro dime dii.

⁹ Ngaghamba, “Sichaamghora BWANA angu kughora kwa irina jake,” jiaghaluka ngolonyi kwapo seji ni modo ghuakagha, ghwarughilwa andenyi ya maindi ghapo; nani nalemwa ni kijighiria sidimagha kujikania.

¹⁰ Kwa kukaia nasikira wandu wengi wikihohoria, “Kiture changia kula andu! Nndokonyi dimghore kwa wabaa, nndokonyi dimghore!” Waghenyi wapo wa ngolonyi waghamba wikiweseria kughwa kwapo, “Kewada uchakalilwa nesi dichamsima, dipate kulipa kisasi aighu yake.”

¹¹ Ela BWANA oko luwaru lwapo, ing'oni jiwadie ndighi; kwa huwo watiriri wapo wichakuwa, ndewichaanisima anduangi. Wichafwa waya na ndighi, angu wisechaadima ilagho jingi; kusowekelwa ni ishima kwawo kwa kala na kala ndekuchaaliwika jingi.

¹² Ee BWANA wa majeshi, oho kuwitimagha wahachi; oho kuwonagha ngolo na nia, kunineke kuwona kukilipa kisasi chako aighu yawo, angu nakusaghika kwako.

¹³ M'borienyi BWANA! Mkasenyi BWANA! Uo wavuvua irangi ja uo usowagha, kufuma kwa mikonu ya wawiwi.

¹⁴ Ijo ituku nerevaloghe ndejiwasiro njowe! Ituku mao orenivaeghe jiserasimilo!

¹⁵ Uo mundu oreredieghe malagho kwa aba wei, “Kwavailwa mwana wa womi,” ukim'bonya uboilo, ndewado ni njowe.

¹⁶ Uo mundu ndekaie karakara na mizi iyo BWANA oreitoteshereghe, kuseko na wughoma ghungi ndesikire kililo luma lwa nakesho, na lwaka lwa wuda luma lwa dime ghadi.

¹⁷ Kwa kukaia nderenibwaghieghe niko kifunyi imbiri nisevalo. Kumangu mao oowuya kaburi yapo, kifu chake chikikaia kibaa kwa kala na kala.

¹⁸ Kwaki nerefumagha kifunyi eri niwoneghee matiriro na wasi, na kumeria matuku ghapo ngifwa waya?