JEREMIA 16 - Biblia Ilagho Jiboie Kwa Wandu Wose

Lukundo lwa BWANA kwa irangi ja Jeremia

¹ BWANA ukaghora nani sena ukighamba,

² “Ndekuchaalowua na kuva wana wa womi na wa waka aha.

³ Kwa kukaia BWANA wawuyaghora huwu aighu ya wana wa womi na wa waka wivalo andenyi ya isanga iji, na aighu ya wavi wawo.

⁴ Wichafwa kwa makongo ghizamie, ndewichaalililwa hata kurikwa, ela wichakaia sa mavi ndoenyi. Wichatota kwa lufu na njala, na mimbi yawo ichawuya vindo va nyonyi ra mbeonyi na nyamandu ra isakenyi.”

⁵ BWANA wawuyaghora huwu, “Kusengie nyumba andu ifwa jiko hata kuselile andwamweri nawo, hata kuwadwa ni wughoma ghungi kwawo; kwa kukaia namerie kuinja irasimio japo ja kuwineka sere, na lukundo na wughoma.

⁶ Wandu wabaa na watini wichafwa chiaimweri andenyi ya isanga iji; ndewichaarikwa angu kulililwa ni mndungi; na mndungi ndechaakudema-dema angu kukuara iridia kuwonyera wasi kwa wundu ghwawo anduangi.

⁷ Mndungi ndechaajanya nawo kuwihoresha kwa wundu ghofuilwa, hata mndungi ndechaawinyosha kindo chingi kwa wundu wei mundu wafuilwa ni ndee angu mae.

⁸ “Kusengie nyumba andu karamu iko kukanya na wandu, kukija na kunywa andwamweri nawo.

⁹ Angu ini BWANA wa majeshi uo Mlungu wa Israeli naghamba, Nichanyamirisha chwaka ra kuboilwa na maseko ra wandu wiko aha kukiwona, ngelo ya matuku ghako, hata chwaka ra bwana na bibi arusi nderichaasikirika anduangi.

¹⁰ “Ngelo kuchaawighoria malagho agha ghose, wichakotia, ‘Kwaki BWANA waghora malagho mabaa ghing'ane huwu aighu yedu? Wuwiwi ghodu niki? Ni kaung'aki dam'bonyera BWANA Mlungu odu?’

¹¹ Niko kuchawizera, ‘Ni kwa kukaia weke ndeyo wanisighie, nawo wanughie milungu mizima, wikaidumikia na kuitasa, wikanilegha hata ndewereiwadieghe sharia yapo anduangi.

¹² Na kwa kukaia mwabonyere mawiwi kuchumba weke ndeyo, seji mwawona kula umu onyu uanugha kukua kwa ngolo yake moni na kukunda kwake, kwa kulegha kunisikira ini;

¹³ kwa huwo nichamfunya iji isanga na kumghenja isanga weke ndeyo wiserejimanyireghe, hata inyo wori; nenyo mchaidumikia milungu mizima aho kio na dime, kwa kukaia sichaammbonia wughoma ghungi.’”

Kuwuya kufuma wubarishonyi

¹⁴ BWANA waghamba, “Zighanenyi matuku ghichacha wandu wisechaaghora wei ‘Sa iji BWANA uko moyo, uo orewifunyireghe wandu wa Israeli isanga ja Misri,’

¹⁵ ela wichaghamba, ‘Sa iji BWANA uko moyo, uo orewifunyireghe wandu wa Israeli isanga ja kaskazinyi, na masanga ghose agho orewiwingieghe.’ Kwa kukaia nichawiwunja isangenyi jawo jeni, ijo nerewinekieghe weke ndee.

Ikabo jichagha

¹⁶ “Olenyi nichadumiria wawadi samaki wengi nawo wichawiwada awo wandu; konyuma nichadumiria wadiwi, nawo wichawidiwa awa wandu kula mghondi na kula mghondi mtini, hata na chukororonyi ra magho.

¹⁷ Angu nawuyawiwona kwa chia rawo rose, ndewivisikagha kwapo, hata na mawiwi ghawo ndeghivisikie mesonyi kwapo anduangi.

¹⁸ Nani nichalipia mawiwi ghawo na kaung'a rawo mando awi, kwa kukaia wamerie kujinona isanga na gharia ra milimu yawo izamie, na kuchura ifwa ja isanga japo wuchafu.”

Ilombi ja Jeremia jiko na irumirio kwa BWANA

¹⁹ Ee BWANA, oho kuko ndighi rapo na ngome yapo, andu kwapo kokimbiria ngelo ya wasi; mbari ra wandu richacha kwako kufuma kutuonyi kwa ndoenyi wikighamba, “Weke aba ndewerewadieghe kindo chingi, ela milungu ya tee, iyo milimu ya duu isene fwaida ingi.

²⁰ Kwani mdamu wadima kukubonyera moni milungu? Iyo si milungu ingi.”

²¹ Kwa huwo, BWANA waghamba, “Olenyi nichawibonya wimanye; nichawibonya wimanye ndighi rapo na kudima kwapo, nawo wichamanya kukaia irina japo ini ni BWANA.”