JEREMIA 13 - Biblia Ilagho Jiboie Kwa Wandu Wose

Weke mshipi ghwa kitani

¹ BWANA ukanizera, “Ghenda kughuo mshipi ghwa kitani, kughufunge kiwonunyi kwako, ela kulindie kuseghungire machinyi.”

² Niko ngaghua ugho mshipi sa iji koni BWANA orenilaghirieghe, ngaghufunga kiwonunyi kwapo.

³ BWANA ukanizera sena,

⁴ “Wada mshipi kwaghua, ugho kwaghufunga kiwonunyi kwako, kuwuke kwende Moda ghwa Eufrate, kughuvise a lukororonyi lwa igho.”

⁵ Niko ngaghenda na kughuvisa aho Eufrate, sa iji koni BWANA orenilaghirieghe.

⁶ Nyuma ya matuku mengi, BWANA ukanizera, “Wuka kughende Eufrate, kughuwuse ghuja mshipi nerekulaghirieghe kughuvise aho.”

⁷ Niko ngaghenda cha Eufrate ngakota aja andu nereghuvisireghe ghuja mshipi ngaghufunya; ngaghukua ghumerie kunoneka ghusefwanagha ilagho jingi.

⁸ BWANA ukaghora nani ukighamba,

⁹ “Huwo niko nichaanona kukujosa kwa Juda, na uko kukujosa kubaa kwa Jerusalemu.

¹⁰ Awa wandu wawiwi wileghagha kusikira malagho ghapo, na kunugha kukua kwa ngolo rawo, wikiinugha milungu mizima kwa kuidumikia na kuitasa, wichakaia kara kara na ughu mshipi ghusefwanagha ilagho jingi.

¹¹ Sa iji koni mshipi ghuwadanagha na kiwonu cha mundu, niko koni wandu wose wa Israeli na wandu wa Juda nerewibonyereghe wiwadane na ini, eri wipate kukaia wandu wapo kwa kujimanyisha irina japo, na kwa kunikasa, na kwa kunineka ishima. Ela ndewerenisikireghe anduangi.”

Kiriba cha divei

¹² BWANA, uo Mlungu wa Israeli ukanizera, “Jeremia, wizere wandu wa Israeli kukaia kula kiriba chichachurwa divei.” Nawo wichakuzera, “Kwani huwo ndediichi viriba vadachurwa divei?”

¹³ Niko aho kuchawizera, “BWANA waghamba, olenyi nichawiwongera wandu wose wikaiagha iji isanga. Wazuri wiseriagha kifumbi cha nguma cha Daudi, na wakohani, na walodi, na wandu wose wikaiagha Jerusalemu.

¹⁴ Nichawiredia ndasanya kula mundu na mmbao, weke aba na wana wawo wa womi, waghamba BWANA. Sichaawiwonia wughoma, sichaasigha angu kufuya ungi wughoma; ela nichawitotesha wose.”

Jeremia kuonya wandu aighu ya kukukasa

¹⁵ Deghenyi madu msikire; msakekukasa, angu BWANA wameria kughora.

¹⁶ Mnekenyi BWANA Mlungu onyu wubaa, imbiri useredie kira, imbiri maghu ghenyu ghisekuwie, aighu ya mighondi ya kira cha ndoe kuelenyi; ngelo msuwiriagha mwengere, uo waghughalua ghuwuye kira, ee, kira cha ndindi.

¹⁷ Mkalegha kusikira, nichamlilia kivisonyi, kwa wundu ghwa lukaso lonyu; nichalila kwa kuwawa, na mbori rapo richadika, kwa kukaia wandu wa BWANA wadwalwa wunyika.

¹⁸ BWANA ukanizera, “Ghoria mzuri, na mzuri-mae, wikusere kufuma vifumbinyi vawo va nguma; kwa kukaia virumbu vawo vighokie vamerie kupotoka kufuma vongonyi kwawo.

¹⁹ Mizi ya Juda ya kusinyi yamerie kurughwa, ndekuwadie mndungi orugua minyango yaro; wandu wose wa Juda wamerie kudwalwa, wose putu wamerie kudwalwa cha wubarishonyi.

²⁰ Wusira meso ghako kuwone wamaiza wako wikicha kufuma kaskazinyi ee, Jerusalemu; awo wandu wako korenekeloghe weko hao, ee awo wandu wako korekukasireghe nawo?

²¹ Kuchaghora wada kukawiwona waghenyi wako korewifundishireghe wikikaia wabaa aighu yako? Welee, ndekuchaawawa karakara na muka ukumbagha lufu anguwada?

²² Na kukaghora ngolonyi kwako, ‘Kwaki nachelwa ni iri maza rose?’ Ni kwa wundu ghwa wungi ghwa makosa ghako, niko nguwo rako rafunukulwa na oho kukadidikwa.

²³ Welee, Muethiopia wadima kukughalua rangi yake, angu inge kughalua maboli ghake? Nenyo wori ndemdimagha kubonya mecha ingelo mlisire kubonya mawiwi.

²⁴ Nichamsaghisa kara kara na masemu ghidukwagha ni mbeo yafuma kireti.

²⁵ Ihi niyo kura yako na ifungu jako nimerie kukupimia, kwa kukaia kwamerie kuniliwa na kuirumiria milungu ya tee.

²⁶ Ini nimoni nichafunukua nguwo rako rivike wushunyi, wuduu ghwako ghupate kuwoneka.

²⁷ Namerie kughuwona wuchafu ghwako; kulaka kwako, na bea rizamie, na wumalaya ghuchumbie, aighu mighondinyi na mbuwenyi. Ni bugha kwako ee Jerusalemu! Kudua mchafu kuseoghoshero hata lii?”