JEREMIA 12 - Biblia Ilagho Jiboie Kwa Wandu Wose

Jeremia kulalamika kwa BWANA

¹ Ngakareda malalamiko ghapo kwako ee BWANA, ni oho kuko na hachi yose. Elaima nalomba kudedanya na oho aighu ya hachi yako. Kwaki wandu wawiwi wikaiagha nicha huwu? Kwaki wandu wa mikalo wiwonagha mecha?

² Oho kwadawiwa nawo wadadunga miri; wazoghua na kuva matunda; wadakughora nicha, ela ngolo rawo weko kula na oho.

³ Ela oho BWANA kwaniichi, oho kwadaniwona na kunitima seji nikuichi oho. Wifunye noko sa ng'ondi riendaabwaghwa, kuwiwike kula kwa ituku jawo jebwaghwa.

⁴ Isanga na nyasi ra mbuwenyi rikaia riomie hata lii? Nyamandu ra isakenyi na nyonyi ramerie kutota, kwa wundu ghwa wuwiwi ghwa awo wandu wiko andenyi yaro; wandu waghambie, “Mlungu ndedimagha kuwona agho dawuyabonya.”

⁵ BWANA ukamzera Jeremia, “Ikakaia kwakimbianye na wadamu kukalemwa, kuchadima wada kukimbianya na farasi? Ikakaia kudimagha kughwa andenyi ya isanga ja sere, kuchabonya wada andenyi ya kilemba cha Jordani?

⁶ Kwa kukaia wanyinyu, ni wandu wa nyumbenyi kenyu, hata awo weni wakubonyere mikalo, waawuyakema wikilwa na oho; kusewiwurie hata ngera wakuja malagho ghiboie.”

Wasi ghwa BWANA kwa wundu ghwa wandu wake

⁷ BWANA waghamba, “Namerie kumsigha Israeli, namerie kusigha wandu wapo. Namerie kumngira mkundwa wapo wa ngolonyi, mikonunyi kwa wamaiza wake.

⁸ Wasaghulwa wapo wamerie kunighaluka, wikawuya sa shimba iko kilembenyi; Waawuyaniborosokia, kwa huwo na ini wanizamia.

⁹ Welee, wandu wapo waawuya sa nyonyi ya virapa eja nyama? Welee, nyonyi reja nyama raaimaria chia rose kulwa nayo? Ghendenyi mkwanye nyamandu rose ra isakenyi riche karamunyi na kuja.

¹⁰ Wabonyi nguma wengi wa kighenyi wamerie mbuwa yapo ya mizabibu, wikaiwadia na maghu ghawo, na kujibonya isanga japo jiboie jiwuye kireti kiduu.

¹¹ Wamerie kujibonya isanga jikaie iduu, jawurie iduu hata jianililia isanga jose jeewuya kireti, ela ndekuwadie mndungi wawuyajiririkanya ngolonyi kwake anduangi.

¹² Watoteshi wacha aighu ya mighondi miduu yose kireti, kwa kukaia ini BWANA naredie wuda kutotesha kufuma kutua uku hata kutua uku kwa isanga; na mndungi ndewadie sere.

¹³ Wandu wawae ngano wikakuwida minjwa, wabonyere kazi mbaa, ela ndewipatire kindo chingi. Wichafushwa waya ni mavalo ghawo matini.”

Ilaghiro ja BWANA kwa Israeli wambao

¹⁴ BWANA waghora huwu aighu ya wambao Israeli wose wawiwi, awo wiwadie ifwa ja isanga orejinekieghe wandu wake Israeli jiwuye ifwa jawo: “Ola nichawifunya isangenyi kwawo, na kumvuvua Juda ufume aghadi kwawo.

¹⁵ Nani ngameria kuwifunya, awo wawiwi, wughoma nichawifuya sena, na kummbunja kula umu wawo andenyi ya ifwa jake na isanga jake.

¹⁶ Na ichakaia, ingelo wichaakufunya kukufundisha chia ra wandu wapo, na kughema kwa irina japo ‘Sa iji Bwana uko moyo,’ wokoni seji werefundishireghe wandu wapo kughema kwa Baali, niko aho wichaamangishwa nicha aghadi ya wandu wapo.

¹⁷ Ela ikakaia mbari ya wandu ingi ichalegha kusikira, niko nichaifunya putu na kuitotesha,” waghamba BWANA.