ISAYA 61 - Biblia Ilagho Jiboie Kwa Wandu Wose

Malagho mecha gha kukia

¹ Roho wa Bwana MLUNGU oko aighu kwapo, kwa kukaia BWANA orenishingieghe mavuda, nipate kuwiredia wandu wikorongelo malagho mecha; wanidumie niwirighite awa wifue ngolo, na kuwitangazira wuhuru ghwawo awo wandu widwalo wunyika; na awo wiko kifungonyi, malagho gha kufungulwa kwawo.

² Wanidumie kueresha mwaka ghorumirilwa ni BWANA, na ituku ja Mlungu jeluya lugho, upate kuwihoresha awo wose wiko na wasi,

³ kuwineka awo wiko na wasi Sioni, kiremba cha maua gha kuboilwa wulalo ghwa maivu gha wasi; na mavuda gha kuboilwa wulalo ghwa wasi, na lumbo lokasa wulalo ghwa roho ya wasi; eri wiwango mialoni ya hachi iwalo ni BWANA, nao upate kunekwa wubaa.

⁴ Wichaghiagha maghacho gha kala ghinonelo, na kuagha mizi inonelo na kusighwa, wichaiboisa mizi inonelo kokala, iyo erenoneloghe vivalwa vingi va kokala uko.

⁵ Waghenyi wichamlishira mfugho renyu, wichamlimia mbuwa renyu ra mizabibu.

⁶ Ela inyo mchawangwa wakohani wa BWANA, wandu wichamghora inyo kukaia wadumiki wa Mlungu odu; mchaja mali ra iro mbari ra wandu, na kukukasa aighu ya mali rawo.

⁷ Mchanekwa ishima mando awi wulalo ghwa ugho waya morekoghe nagho, mchachulwa ni kuboiwa kwa ifwa jenyu wulalo ghwa uko kumenywa konyu; kwa huwo mchakaia na mafungu awi isangenyi konyu, nenyo mchakaia na kuboilwa kwa kala na kala.

⁸ BWANA waghamba, “Ini BWANA nadakunda loli, nadazamilwa ni kusoka na makosa; nani nichawilipia wandu wapo kwa hachi, na kubonya nawo ilaghano ja kala na kala.

⁹ Kivalwa chawo chichamanyika kwa iro mbari ra wandu, ee, wana wawo wichamanyika aghadi ya wandu; wandu wose wichaawiwona, wichawitambua kukaia ni awo wandu BWANA uwirasimie.”

¹⁰ Ini Jerusalemu nichazuma nandighi andenyi ya BWANA, roho yapo ichakasa andenyi ya Mlungu wapo; angu Mlungu wanirushire marwao gha kukia, na kunifinikira nguwo ya hachi; sa bwana arusi ukupambie moni na maua, na sa mwai ulowolwagha ukupambie na lulu.

¹¹ Sa iji koni ndoe ibusagha miwalwa, na sa iji koni mbuwa ibonyagha mbeu riwalo ribuke ni huwo koni BWANA uibonyagha hachi na makaso ghiwoneke worinyi kwa mbari rose.