ISAYA 56 - Biblia Ilagho Jiboie Kwa Wandu Wose

Wandu wa Mlungu kurangana mbari rose

¹ BWANA wawizera wandu wake huwu: “Wadienyi loli m'bonye hachi, angu kukia kwapo kuchacha kafwani; nako kuchafunukuka worinyi.

² Warasimilwa uo mundu uwadiagha agha na kughikatisha; uo uriwadiagha Sabato na kurimaziria userilushagha, ulindiagha usebonye ilagho jingi iwiwi.”

³ Mghenyi wakufunya kuwadana na BWANA useghambe, “Kwa loli BWANA uchanitanya na wandu wake” hata kolowi useghambe, “Ola ini ne mudi ghuomie, sidimagha kuva;”

⁴ BWANA waghamba huwu, “Kolowi uo uriwadiagha Sabato rapo, na kusaghua iro maza nirikundagha, na kumaziria ilaghano japo,

⁵ irina jake uo, jichaandikwa na kukumbukwa andenyi ya Hekalu yapo na wurighenyi ghwaro, kuchumba awo wiko na wana wa womi na wa waka, nao na jingi ndechaaliwa anduangi.”

⁶ “Na waghenyi awo wikufunyire kukukwanya na BWANA, wimdumikie na kujikunda irina jake wikikaia wadumiki wake, kula mundu uiwadiagha Sabato kuseko na kuinona, nao wamaziria ilaghano japo,

⁷ nichawireda mghondinyi ghwapo ghwa Wueli Sioni, na kuwibonya wikaie na kuboilwa andenyi ya nyumba yapo elombia, vizongona vawo, na vizongona vekora nichavirumiria aighu ya madhabahu yapo, angu nyumba yapo ichawangwa nyumba elombia kwa wundu ghwa mbari rose ra wandu.”

⁸ Bwana MLUNGU waghora huwu, uo uwitumbanyagha awo wandu wileghelo wa Israeli, “Nichareda kwako wandu wamu sena, kuchuria waja wimerie kutumbanywa.”

Vilongozi va Israeli kutanywa kukaia wakosi

⁹ BWANA wawizera wandu wa mbari ya kighenyi huwu, “Choonyi mfondie nyama ra wandu wapo, seji nyamandu ra isakenyi rijagha.

¹⁰ Vilongozi vawo ni vitungure, wose ndewiwadie kumanya kungi, wose weeka sa koshi risededagha; wadalala na kuloda, nawo waboilwa ni kudungumia.

¹¹ Wakaia sa koshi riwadie lwafuo, wandu wisekatwagha jingi. Awo ni walisha wisewadie kumanya kungi, wose waghalukie kula mundu chia yake, kula mundu ukikulolia fwaida rake moni kwa kula chia.

¹² Wazerana weni na weni, ‘Choonyi, dinyo divei; dipate kukoja chofi ibirie; kesho dichawuria kunywa kuchumba idime.’”