ISAYA 49 - Biblia Ilagho Jiboie Kwa Wandu Wose

Israeli, mwengere kwa iro mbari ra wandu

¹ Nisikirenyi, inyo wandu wa masanga gha pwani, inyo mkaiagha kula nisikirenyi, BWANA orenisaghueghe imbiri nisevalo, ukanidema irina kufuma kifunyi kwa mao.

² Orebonyereghe malagho ghapo ghikaie sa lufu lukalie, ukanivisa kijunyi cha mkonu ghwake; ukanibonya sa iwanu jakalishwa na kuniwika andenyi ya zaka yake.

³ Ukanizera, “Oho Israeli ko mdumiki wapo, ini nichanekwa wubaa kwa wundu ghwako.”

⁴ Ela ini nereghambieghe, “Neebonya kazi nduu, ndighi rapo neeritumia kwa maza ra duu; ela kwa loli hachi yapo eko kwa BWANA, na malipo ghapo gheko kwa Mlungu wapo.”

⁵ Na idana, BWANA uo oreniumbieghe nikaie mdumiki wake kufuma kifunyi, eri nimghaluye wana wa Jakobo cha kwake, na Israeli upate kutumbanywa kwake, angu ninekelo ishima mesonyi kwa BWANA, na Mlungu wapo wawurie ndighi rapo.

⁶ Uo BWANA waghamba, “Kazi ewunja kichuku cha Jakobo na kutumbanya masighariko gha Israeli ni ndinieri ee mdumiki wapo; nichakubonya kukaie mwengere kwa iro mbari ra wandu, eri kukia kwapo kupate kukuvikia kutua kwa ndoenyi.”

⁷ BWANA, uo Mkomboli na Mlungu Mweli wa Israeli wamzera huwu uo umenyekie na ndighi, uleghelo ni iro mbari ra wandu: nao ni mdumiki wa awo wibonyagha nguma. “Wazuri wichawona na kukuwukia kimusi, wabaa wichakughoghomia kwa ishima, kwa wundu ghwa BWANA, uo uko mloli na Mlungu Mweli wa Israeli orekusaghueghe oho.”

Kuaghwa wuwishi kwa Jerusalemu

⁸ BWANA waghamba huwu kwa wandu wake, “Ngelo irumirikie nerekutumbulieghe, na kwa ituku ja kukia, nerekuteserieghe; nakuwikie na kukufunya kukaie ilaghano kwa wandu, kupate kuwuya na kujimangisha isanga, eri kuwineke ifwa ja isanga awo wisewadie.

⁹ Kuchawizera wafungwa, ‘Choonyi shwa-shwa;’ na awo wiko kirenyi ‘Fumenyi worinyi.’ Wichakaia wikija na kughuda chienyi, wichawona malisho hata andu kuko kuduu mighondinyi,

¹⁰ ndewichaawona njala hata kau, hata ndewichakabwa ni iruwa, angu kuwona mruke ghungi; angu uo uwiwoniagha wughoma, uchawilongoza na kuwighenja kwa ndoria ra machi.

¹¹ “Nani nichabonya chia aighu ya mighondi yapo yose; na kuboisa barabara rapo.

¹² Olenyi wandu awa wichacha kufuma kula, wichafuma kaskazinyi na magharibi; na wamu kufuma Sinimu.”

¹³ Borenyi kwa kuboilwa inyo mlungunyi, na inyo ndoenyi mkabe lukilighili, mighondi ndeibore, kwa kukaia BWANA wawihoresha wandu wake wikorongelo, nao uchakaia na wughoma aighu kwawo.

¹⁴ Ela wandu wa Jerusalemu waghambie, “BWANA wamerie kudisigha, BWANA odu wamerie kudiliwa.”

¹⁵ “Welee, muka wadima kumliwa mwana wake wa nyodonyi, hata usemmbonie wughoma mwana wa kifu chake? Awo wadima kuliwa, ela ini sichaakuliwa jingi.

¹⁶ Ola nameria kukuandika aighu ya lui lwa mkonu ghwapo, na mawurigha ghako naawuyaghizighana ngelo rose.

¹⁷ “Awa wikuaghagha sena wiacha shwa-shwa, na awo werekunonieghe, waawuyafuma.

¹⁸ Wusira meso ghako kuzighane kose kuwone; wandu wako wose wakwanyika wiakuchea oho. Sa iji koni niko moyo, waghamba BWANA, wandu wako wichakaia kwako sa mapambo, wichakaia aghadi kwako sa mapambo gha mwai ulowolwagha.

¹⁹ “Kwa loli isanga jako jerenoneloghe, na kuwuya iduu, ela idana ndejichaawikata awo wichagha; na awo werekusaghisireghe, wichakaia kula.

²⁰ Kuchasikira wana wako werevailoghe noko wunyikenyi wikighamba, ‘Iji isanga jeeka itini, dichurienyi diwonekata.’

²¹ Na oho kuchaghora ngolonyi kwako, ‘Awa wana wose wavalo nani? Ini nerefuiloghe ngasighwa nisewadie wana, ngafunywa na kudwalwa wunyika; idana awa wana walelelo nani? Ini nedesighwa niekeri awa wandu awo wafumie hao?’”

²² BWANA Mlungu waghora huwu: “Olenyi nichawiwusiria wandu wa iro mbari mkonu ghwapo, nipate kuwikunyiria na kiweto; nawo wichakuwunjira wana wako wa womi wikiwiduka laghenyi kwawo, na wana wako wa waka wikiwiduka maongenyi kwawo.

²³ Kuchachelwa ni wazuri sa weke ndeyo, na waka wawo wichakaia sa weke mayo. Wichakughoghomia na kudunga mawushu ghawo andonyi, nawo wichaleta teri ya maghunyi kwako. Niko aho oho kuchamanya angu ne BWANA, na kukaia, awo winiweseriagha niwitesie, ndewichaafushwa waya anduangi.”

²⁴ Welee, mundu uwadie ndighi wadima kusokwa wandu wawidwa wunyika; angu mng'eti kusokwa wafungwa wake?

²⁵ Hee loli, waghamba BWANA, “Wandu widwalo wunyika wa mundu uwadie ndighi, hata wafungwa wa mng'eti wichakombolwa. Kwa kukaia nichalwa na awo wilwagha na oho, nani nichawikira wana wako.

²⁶ Nichawibonya awo wikukorongagha wije nyama ra mimbi yawo, na kunywa bagha yawo sa divei. Niko wandu wose wichaamanya kukaia Ini ne BWANA Mkiri wako, na Mkomboli wako; Uja Uwadie Ndighi wa Jakobo.”