ISAYA 47 - Biblia Ilagho Jiboie Kwa Wandu Wose

Kutanywa kwa Babuloni

¹ BWANA waghamba, “Sea, kusee kidombo a terinyi ee muzi ghwa Babuloni; seria andonyi kuseko na kifumbi cha nguma, ee muzi ghwa Wakaldayo! Kwa kukaia ndekuchaawangwa sena, ughokie, ufwano.

² Wada igho jesha, kushe mufu; inja shela yako. Inja irwao jako, kusune nguwo rako maghunyi; kuruwuke meda.

³ Kuchashanakulwa nguwo rako kusigho duu, na wandu wichaghuwona wuduu ghwako. Nichalipa kisasi hata sichaasigha mndungi.”

⁴ Irina ja Mkomboli odu ni BWANA wa majeshi, Mlungu, Mweli wa Israeli.

⁵ BWANA waghamba “Sea kidombo kunyame chui kirenyi ee muzi ghwa Babuloni, kwa kukaia ndekuchaawangwa sena malkia wa mawuzuri.

⁶ Wandu wapo werenivavirieghe ngolo, ngawilusha wandu wa ifwa japo; ngawingira mikonunyi kwako, na oho ndekorewifuyeghe wughoma hata kutini; kukawingira waghosi ghongolo ilemere nandighi.

⁷ Na oho koreghambieghe, ‘Nichakaia malkia kwa kala na kala;’ kwa huwo ndekoretalieghe malagho agha ngolonyi kwako hata ndekoregheshereghe ghikaia gha wada kutua kwaro.

⁸ “Idana sikira oho kukundagha maseko, oho kukaiagha kidombo kwa sere kukighesha, ‘Ni ini moni, hata ndekuwadie ungi unichumbie; sichaasea kidombo sa muka ufuilo, hata sichaamanya kusowekelwa ni wana anduangi.’

⁹ Kuchachelwa ni malagho awi shwa wori kwa ituku jimweri; kuchasowekelwa ni wana chiaimweri na mumi wako kwa kipimo chikate, hata ngera koko na wusawi m'baa, na ndighi mbaa ra wughanga ghwako.

¹⁰ “Korewonieghe ndekupatwagha ni ilagho jingi andenyi ya ugho wuwiwi ghwako, kukaghamba, ‘Ndekuwadie mndungi uniwonagha;’ ela hikima yako na kumanya kwako kwakulaghashire; kukaghamba ngolonyi kwako, ‘Ni ini moni hata ndekuwadie ungi unichumbie.’

¹¹ Ela wuwiwi ghuchakuchea aighu kwako, kusechaadima kughughiria. Kutota kuchakuchea, kusechaadima kukukombua. Kunoneka kuchakuchea aighu yako shwa wori kusemanyire.

¹² Manga gi kwa wughanga ghwako na wusawi ghwako mungi; ugho kughudumikie kufuma wanake ghwako. Kewada kwadima kusima, hata kudime kwawingira wowa wamaiza wako.

¹³ Wanjama wako wengi wakusirishire ndighi, ndewikaie kimusi ima, wikukire; awo wizighanagha mlungunyi, na kurishoma nyerinyeri nawo waloda ngelo ya mori mmbishi, na kukughoria malagho ghako gha ngelo richagha.

¹⁴ “Ola awo weeka sa matasa, nagho ghadahia na kumerelwa ni modo; ndewidimagha kukukira na ulo lumu lwa modo Maka gheoda aho ndeghiko, na modo ghooda ndeghuko.

¹⁵ Huwo niko awo wandu morekwanyeghe wichaakubonyera, awo werekwanyeghe na oho kufuma wanake ghako; wichakimbia kula umu wawo chia yake, hata ndekuchaakaia na mndungi okukira anduangi.”