ISAYA 35 - Biblia Ilagho Jiboie Kwa Wandu Wose

Chia ya Wueli

¹ Kireti na isanga jiomie jichakaia na kuboilwa, ikara jichaboilwa na kufunya mboi sa ra waridi;

² jichafunya mboi kwa wungi, na kuboilwa; jikizuma na kubora. Ijo ikara jichaghoka sa mighondi ya Lebanoni, na kuboa sa mbuwa ra Karmeli na Sharoni. Wandu wose wichaghuwona wubaa ghwa BWANA na ndighi ra Mlungu odu.

³ Ibonyerenyi ndighi iyo mikonu itewelekagha, na vitemberu visewadie ndighi.

⁴ Wizerenyi awo wandu wiko na wowa, “Kaienyi na ndighi, msakeobua! Olenyi Mlungu onyu uchacha kulipia kisasi, uchacha na malipo ghake, upate kumkira.”

⁵ Niko aho meso gha vitungure ghichatambulwa, na madu gha wandu wisesikiragha ghichafunguka;

⁶ mkelemeri ucharama-rama sa shaa, na kituri uchabora kwa kuboilwa. Kwa kukaia machi ghichabuka kireti, na ndoria ra machi richakaia andu kuomie;

⁷ msangagha ghuakaaka ghuchawuya kiriwa cha machi, na isanga jiomie jichabuka ndoria ra machi, andu korekailwagha ni mizozo kuchawuya ipara, na nyasi richakaia kilemba cha maria.

⁸ Chia mbaa ichakaia aho, nayo ichawangwa “Chia ya Wueli.” Mundu useelie ndechaidiria iyo chia, na wakelu ndewichaalaghaya aho.

⁹ Shimba ndeichaawoneka aho, hata nyamandu ibirie ndeichaakaia aho anduangi hata kuwoneka koni nderichaawoneka, ela awo wandu wikombolo wichaghenda na iyo chia.

¹⁰ Awo wikombolo ni BWANA wichawuya Jerusalemu wikibora; wichachulwa ni kuboilwa kwa kala na kala, wichakaia na iseko na kuboilwa, wasi na kusirimika vichasia putu.