ISAYA 34 - Biblia Ilagho Jiboie Kwa Wandu Wose

Mlungu kuwikaba wamaiza wake

¹ Choonyi, inyo mbari ra wandu, mpate kusikira; deghenyi madu inyo wandu wa ndoenyi msikire, ee, wurumwengu na vose viko andenyi yaro choonyi msikire.

² BWANA wabonya machu aighu ya mbari rose ra wandu na aighu ya majeshi ghawo ghose; nao wawitanyire wipate kubwaghwa.

³ Gharia rawo nderichaarikwa, naro richawoa na kunuka; mighondi yose ichachulwa ni bagha rawo.

⁴ Majeshi ghose gha mlungunyi ghichasagha, na mawingunyi kuchakuchwa sa karatasi. Majeshi gharo ghose ghichapotoka sa malemba gha mizabibu na gha mtini.

⁵ BWANA wawika lufu lwake tayari mlungunyi, nalo luasea kukaba Edomu, ee, awo wandu umerie kuwitanya kufwa.

⁶ Lufu lwa BWANA luchachulwa ni bagha rawo na kurogha mavuda ghawo, sa bagha na mavuda gha wana wa ng'ondi na wa mburi, kara kara na mavuda gha figho ra bauru. Kwa kukaia BWANA uchafunya kizongona aja Bosra na kubwagha wandu wengi isanga ja Edomu.

⁷ Wandu wichabwaghwanya na mbogho na wana wa njau, na njau mbaa; isanga jichanywa bagha, na ndoe rawo richawurushwa ni mavuda ghawo.

⁸ Kwa kukaia BWANA wawikie ituku na mwaka gholipia kisasi, kwa wundu ghwa wandu wake wikaiagha Jerusalemu.

⁹ Meda ya Edomu ichawuya lami, na ndoe richawuya kibiriti hata riwuye sa lami iakagha.

¹⁰ Modo ghwaro ndeghuchaarima nakio hata nadime; mosi ghwaro ghuchafukia kwa kala na kala. Isanga jichasighwa iduu, kivalwa hata kivalwa; mndungi ndeechaaida aho kwa kala na kala.

¹¹ Isanga ijo jichakailwa ni mbungu na sasa; jichakailwa ni mikango na ngorusa. Mlungu uchawikambira chongo, na wabaa wawo ndewichaasikirana.

¹² Ndekuchaakaia na mzuri ungi aho, na wabaa waro ndewichaawoneka.

¹³ Minjwa na mndandangoma ichazoghua aighu ya ngome rawo, nako kuchakailwa ni mizozo na nyagha.

¹⁴ Nyamandu ra isakenyi richakwana na mbisi na kukaia aho; visuka vichakaia vikiwangana, ee, pepo ya waka ichacha na kio na kubonya wulalo ghwake ghohoresha aho.

¹⁵ Kungumuzi uchabonya kijungu chake aho, uchava maghi na kughilalia, na vana vake uchavifinikira na mawawa ghake; ee, hata visangangoju vichakaia kula chimu na mmbao wa womi aho.

¹⁶ Lolenyi andenyi ya chuo cha BWANA mshome, nenyo mchawona kukaia ingi ya iro nyamandu ndeisowekie aho, na kula imu ndeichaasowa mmbao wa womi kwa kukaia momu ghwa BWANA ghwajighorie ilagho ijo, na Roho wake nuo urikwanyagha iro nyamandu.

¹⁷ BWANA moni wajiwaghie ijo isanga kwa kura; nuo moni ubonyere mwano kwa wundu ghwawo; naro richakaia aho kivalwa hata kivalwa.