ISAYA 21 - Biblia Ilagho Jiboie Kwa Wandu Wose

Mawono aighu ya kughwa kwa Babuloni

¹ Agha ni malagho aighu ya kireti cha baharinyi. Wuwiwi ghuchacha karakara na kiremba kibaa chiwetagha Negebu.

² Nawonie mawono gha malagho ghikurie: mundu osoka, waawuyasoka; na mtoteshi, waawuyatotesha. Inyo majeshi gha Elamu, kabenyi muzi; inyo majeshi gha Media, ghurughaienyi muzi. Mlungu uchaghumeria wasi ghose ghuredelo ni Babuloni.

³ Malagho nighiwonie kwa mawono agho ghanioboshere na kunivavira, ngawawa sa muka ukumbagha lufu kwa kuva; agho nighisikire, ghanikambirie chongo, nafwa waya hata sidimagha kuzighana.

⁴ Nakambwa ni chongo, na kiture chaningia; ugho mwengere naghusuwiriagha, ghwaachawuya kusughusika.

⁵ Nawona karamu yakaia tayari; meza yaalwa, waja kuja na kunywa. Wukenyi inyo m'bonyagha nguma, m'boise ngao renyu.

⁶ Niko BWANA ukanizera huwu, “Ghenda kuwike mlindiri, upate kutangaza agho ughiwonagha.

⁷ Ukawona wandu wajoka farasi wawi-wawi, na wamu wajoka punda, na wamu ngamila, ujizighane ilagho ijo loli-loli.”

⁸ Mlindiri uendawona ukakema, “Bwana, nameria kuwada ilindiri japo, dime dii na kio chee.

⁹ Ola, wajoki farasi wiacha, hawaja wiacha wawi-wawi,” Nao ukatumbulia, “Ghwaghue, ugho muzi ghwa Babuloni, ghwaghue, na fwana ra milungu yake raghushwa andoenyi.”

¹⁰ Agho nighisikire kufuma kwa BWANA wa majeshi, Uo Mlungu wa Israeli, niamghoria inyo ee wandu wapo Israeli, mchanilo na kuelwa sa viro.

Wulodi aighu ya Edomu

¹¹ Agha ni mawono aighu ya Edomu. Mndumu wawuyaniwanga kufuma Seiri, “Mlindiri, Kio chisiali? Nighorie chasighwa ching'ane wada?”

¹² Mlindiri watumbulia, “Ndoe yaawuyaela, ela kio chichacha sena. Ngera kwakunde kukotia sena, wuya kukotie.”

Wulodi aighu ya Arabu

¹³ Agha ni mawono aighu ya Arabu. Inyo wandu wa Dedani mchadamba na kubonya kambi renyu visachinyi va isanga ja Arabu.

¹⁴ Inyo wandu wa isanga ja Tema, winekenyi machi na vindo awo wandu wa Dedani wawuyamkimbiria.

¹⁵ Kwa kukaia waawuyakimbia wisebwagho kwa lufu na ndana andenyi ya wuda ghubirie.

¹⁶ Niko BWANA ukanizera, “Andenyi ya mwaka mlazi gi, wubaa ghose ghwa Kedari ghuchasia.

¹⁷ Wandu wa ndana wa Kedari wiko na ndighi, wichasigharika watini; ini BWANA Mlungu wa majeshi naghamba.”