ISAYA 2 - Biblia Ilagho Jiboie Kwa Wandu Wose

Sere ya kala na kala

¹ Agha nigho malagho gherewoneloghe ni Isaya mwana wa Amozi aighu ya Juda na Jerusalemu:

² Matuku ghichagha, andu Hekalu yawuyakaia, mghondi ghwaro ghuchakaia m'baa kuchumba mighondi yose; na mbari rose richaghughendia.

³ Wandu wengi wichacha wikighamba, “Nndokonyi dighende mghondinyi ghwa BWANA, Hekalunyi kwa Mlungu wa Jakobo; upate kudifundisha seji ifwane dibonye, nesi dipate kubonya. Kwa kukaia sharia ichafuma Sioni, na ilagho ja BWANA jichafuma Jerusalemu.”

⁴ Uchareda kutanya aghadi ya mbari ra wandu, na kudumbua njama ra wandu wengi, wichachana chufu rawo riwue maghembe, na mafumu ghawo ghiwue miundu, mbari nderichaalwa sena, hata nderichaakufundisha kulwa wuda sena anduangi.

⁵ Idana ee kivalwa cha Jakobo, ndedighende kwa mwengere ghwa BWANA.

Ituku ja BWANA

⁶ Oho kwawisighie wandu wako ee Mlungu, icho kivalwa cha Jakobo; Kwa kukaia wachulwa ni wulaghui sa wandu wa mashariki, na sa Wafilisti, sena wabonya wungara na waghenyi.

⁷ Isanga jawo jeechulwa ni feza na dhahabu, mashamo ghawo ndeghiwadie kutua; isanga jawo jeechulwa ni farasi, na kubonya magare kwawo ndekuwadie kutua.

⁸ Isanga jawo jeechulwa ni milimu, nawo waghoghomia kazi ra mikonu yawo; vilambo wivibonyere weni.

⁹ Kwa huwo mdamu uchaserwa na kumenyeka; kusakewifuya wughoma ee BWANA.

¹⁰ Ngia mbangenyi kukuvise mrumenyi, kupate kukaia kula na machu gha BWANA; na wubaa ghwa nguma yake.

¹¹ Kuwoneka kwa wubaa ghwa mdamu kuchaserwa, kukujosa kwa wadamu kuchaserwa. BWANA uekeri nuo uchaajoswa ituku jija.

¹² Kwa kukaia BWANA wa majeshi oko na ituku jesera icho chose chikudukie na kukujosa, icho chose chikujosere ighu;

¹³ uchaiinja misida milacha yose ya Lebanoni, na mialoni yose ya Bashani.

¹⁴ Uchaiinja mighondi mibaa yose, na mighondi mitini yose;

¹⁵ uchainja kula mnara mlacha, na kula wurigha ghwa ngome.

¹⁶ Uchainja meli rose ra Tarshishi, na vilambo vose viboisiro vighokie.

¹⁷ Kukujosa kose kwa mdamu kuchaserwa, na kukuduka kwa wadamu kuchaserwa; BWANA uekeri nuo uchaajoswa ituku jija.

¹⁸ Milimu yose ichasoweka putu.

¹⁹ Wandu wichangia mbangenyi ra magho, na miruma ya ndoenyi wikiobua agho machu gha BWANA na wubaa ghwa nguma rake; iji uchaawuka kuisughusa ndoe.

²⁰ Ituku jija, wandu wicharikumbia fuko na maososi iro fwana rawo ra feza na ra dhahabu, wereribonyereghe wiritase;

²¹ nawo wichakuvisa mbangenyi ra magho, na chughumenyi mbaa ra ndoenyi; wipate kukaia kula na machu gha BWANA na wubaa ghwa nguma yake; iji uchaawuka kuisughusa ndoe.

²² Sigha kumrumiria mdamu, uo urudagha miruke na mbua yake, kwa kukaia uo si kilambo chingi anduangi.