ISAYA 18 - Biblia Ilagho Jiboie Kwa Wandu Wose

Mlungu kuikaba Ethiopia

¹ Sikirenyi mrumo ghwa mawawa ghuko kimonu cha meda ya Ethiopia.

² Ijo isanga jaduma wadumi wake kwa chia ya Moda ghwa Naili, kwa kutumia mashua ribonyero na maria. Ghendenyi shwa-shwa inyo wadumwa, kwa iyo mbari ya wandu walacha widendere; mbari iobolwagha ni wandu kula na kaavui, mbari iwadie ndighi isimagha; isanga jake jiwaghilo ni meda.

³ Inyo wandu wose mkaiagha wurumwengunyi, inyo mmbose mkaiagha ndoenyi; bendera ikawusirwa mghondinyi mzighane, na tarumbeta ikakabwa msikire.

⁴ Angu BWANA wanizerie huwu, “Nichazighana mboaeri kufuma andu kwapo nikaiagha, sa ndoe yakombwa ingelo iruwa jakala, sa iwingu ja mami mrukenyi ngelo ekuwida viro.

⁵ Angu imbiri ya kukuwida, iji vishekero vasia na zabibu kuwurwa, Mlungu uchanona Ethiopia seji mundu udumbuagha chonge ra midi na kurikumba noko.

⁶ Gharia rawo richasigharika mghondinyi rijigho ni nyonyi ngelo ya sumesu, na nyamandu ra isakenyi ngelo ya kwari.”

⁷ Ngelo iyo, awo wandu walacha widendere wichareda manosi kwa BWANA wa majeshi; awo wandu wiobolwagha kula na kaavui; iyo mbari ya wandu wiwadie ndighi, isimagha, na isanga jake jiwaghilo ni meda, wichamredia manosi Mghondinyi ghwa Sioni, andu irina ja BWANA wa majeshi jitaswagha.