ISAYA 14 - Biblia Ilagho Jiboie Kwa Wandu Wose

Kuwuya kufuma wubarishonyi

¹ BWANA uchakaia na wughoma kwa wandu wa Israeli, na kuwisaghua sena; nao uchawiwunja isangenyi jawo jeni, na waghenyi wichacha kukaianya nawo.

² Na wandu wa iro mbari wichawitesia wandu wa Israeli kuwuya isangenyi jawo, nawo wichakaia andenyi ya isanga werenekeloghe ni Mlungu. Waja wandu wichawuya wazumba wawo wa womi na wa waka; awo wandu weni werewidwaeghe wunyika, niwo weni sena wandu wa Israeli wichaawidwa wunyika na kuwibonyera nguma.

Mzuri wa Babuloni kukaia andenyi ya wurumwengu ghwa wafu

³ Ngelo BWANA uchaamredia wuhoreshi kufuma kwa wasi ghonyu, na masumbuko ghenyu, na kufuma kwa iro kazi rikurie moredumikishiroghe,

⁴ mchamseka mzuri wa Babuloni mkighamba; “Mkorongi watua! Lung'eto lwa kubia kwake lwasia!

⁵ BWANA waghuchikanya mzata ghwa wawiwi, ugho mzata ghwa wabonyi nguma;

⁶ ghorekabagha wandu kwa machu, na kuwibula ngelo rose; ghorewibonyeragha nguma iro mbari ra wandu kwa lubio, na kwa matiriro ghiseko na kutua.

⁷ Wurumwengu ghose ghwahora na kunyama, na kula mundu uabora na kuboilwa.

⁸ Misumbesu yachulwa ni kuboilwa na misida ya Lebanoni yaboilwa ikighamba, ‘Kufuma kwaghushwa, mndungi ndechee kudidema sena?’

⁹ Andu kwa Wafu kwawuka kukwana na oho, ngelo kwaghenda aho ee Mzuri wa Babuloni; kwarinyavura roho ra awo wifue wikuroghuo. Awo wose werekoghe vilongozi va ndoenyi, kwawiwusira kufuma vifumbinyi vawo va nguma, awo wose werekoghe wazuri wa iro mbari ra wandu.

¹⁰ Wose wichadeda wikikuzera, ‘E hoku nakumoni wori kwawuya mnyonge kara kara na isie! Kwafwanana nesi!

¹¹ Wubaa ghwako ghwaserwa hata Andu kwa Wafu, na chwaka ra vinubi vako wori; ming'ori niyo wuli ghwako, na vizi nivo brangeti wako.’

¹² “Kwaserwa wada kufuma mlungunyi ee mzuri wa Babuloni? Oho korekoghe sa nyerinyeri ya luma lwa nakesho! Kwaserwa wada hata andoenyi? Oho korekoghe kwarisima mbari rose!

¹³ Koreghambieghe ngolonyi kwako, ‘Nichajoka ighu hata mlungunyi; ighu kuchumba nyerinyeri ra Mlungu, na kuwika kifumbi chapo cha nguma koighu. Nichasea kidombo niide mido ya mghondi ghwa ikwanyiko ja milungu, noko kula cha kaskazinyi.

¹⁴ Nichajoka ighu niide mawingunyi, nichakaia karakara na Uo-Uko-Aighu-Nandighi.’

¹⁵ Ela kwaserwa hata Andu kwa Wafu, kwaserwa Kinenyi chiko ndenyi.

¹⁶ Awo wafu wichakukuya meso wikishinika, nawo wichakotia, ‘Welee, uhu nuo mundu oreisughusireghe ndoe? Uo oresughusireghe mawuzuri?

¹⁷ Uhu nuo oreghubonyereghe wurumwengu kuwuya sa ikara, na kuinona mizi yaro; uo userewilekerieghe wafungwa wake wighale?’

¹⁸ Wazuri wose wa ndoenyi warikilo kwa ishima makaburinyi kwawo;

¹⁹ ela oho, ndekuwadie kaburi, kookumbwa shighadi sa kifu chifushiro; koofinikirwa na awo wibwaghilo kwa lufu, awo wiserie kondonyi kinenyi cha magho; karakara na mfu uwadirilo-wadirilo.

²⁰ Oho ndekuchaarikwa kwa ishima sa wazuri wazima, kwa kukaia kwajinonie isanga jako, na kuwibwagha wandu wako. “Marina gha kivalwa cha wawiwi jingi ghisekumbuko.

²¹ Kudeghenyi m'bwaghe wana wake kwa wundu ghwa wuwiwi ghwa weke ndee, wisechewuka na kujibonyera isanga nguma, na kuchura mizi yawo wurumwengunyi.”

Wulodi aighu ya Babuloni

²² BWANA wa majeshi waghamba, “Nichawuka aighu ya Babuloni, na kughunona ugho muzi putu hata usoweke mndungi oghorwa aho, hata mwana ungi, hata kivalwa chingi.

²³ Nichaghubonya ugho muzi ghuwuye malalo gha kiseseghede na kubuka vichi; nani nichaguinja kwa mfwagio ghototesha; ini BWANA wa majeshi naghamba.”

Wulodi aighu ya Waashuru

²⁴ BWANA Uwadie Ndighi Rose wabonya ighemi huwu, “Agho nighibonyere mpango ghichabonyeka, na makusudi ghapo ghichakatia.

²⁵ Nichawitotesha Waashuru andenyi ya isanga japo ja Israeli, na kuwiwadia-wadia aighu ya mighondi yapo; na ghongolo yawo ichafuma kwa wandu wapo, na msigo ghwawo ghuchainjika maweghenyi kwawo.

²⁶ Agha nigho makusudi ghapo nighiwikie kwa wundu ghwa ndoenyi kose; na huwu niko mkonu ghwapo ghokaba ghwaghorolwa kwa mbari rose.”

²⁷ BWANA wa majeshi wamerie kukusudia kubonya huwo, nani udimagha kughalua? Mkonu ghwake ghokaba ghoko ghughorokie; nani udimagha kughiria?

Wulodi aighu ya Wafilisti

²⁸ Mwaka ghuja Mzuri Ahazi orefueghe, malagho ghereredeloghe huwu,

²⁹ “Msakeboilwa inyo mmbose Wafilisti, mkikalikia wei ghuja mzata ghoremkabieghe ghoochika; kwa kukaia choka ichafunya choka iko na wusungu, nayo ichava choka iburukagha.

³⁰ Wavalwa wa imbiri wa mkiwa wichaja, na awo wisowagha wichalala banana; ela kivalwa chenyu inyo Wafilisti nichachibwagha kwa njala, na masighariko ghenyu nichawibwagha.

³¹ Lilenyi na kukema mchungu mkilola wutesia inyo mizi ya Wafilisti; mngilo ni wowa inyo mmbose, kwa kukaia teri yawoneka cha kaskazinyi sa mosi, teri ya masikari ghichagha ghisena wowa.”

³² Dichawitumbulia wada awo wadumwa wa iro mbari ra wandu? Dichawizera, “Mlungu wamerie kuimaziria Jerusalemu, na wandu wake witiririlo, wichakaia nicha andenyi yaro.”