HOSEA 8 - Biblia Ilagho Jiboie Kwa Wandu Wose

Mlungu kutanya Israeli kwa wundu ghotasa milimu

¹ BWANA waghamba, “Kabenyi tarumbeta! Wamaiza waawuyangia isangenyi japo sa indu! Wandu wapo wajichikanyire ilaghano nibonyere nawo, na kughilegha mafundisho ghapo.

² Hata ngera waniwanga ini Mlungu wawo, na kughamba wei awo ni wandu wapo winiichi,

³ wamerie kulegha mecha. Niko wawuyawingwa ni wamaiza wawo.

⁴ “Wandu wapo weekusaghuya wazuri wawo weni; wawikie wabaa nisewirumirie. Wakutoteshere weni kwa kuwusa feza na dhahabu rawo wikabonya milimu.

⁵ Naawuyazamilwa ni mlimu ghwa ngache ya dhahabu ghutaswagha ni wandu wa muzi ghwa Samaria, neeka na machu mabaa aighu yawo; ichadwa ngelo ing'ane wada ima witane nayo?

⁶ Ni wufundi ghwa Muisraeli umu ubonyere ugho mlimu ghuseko mlungu putu. Njau ya dhahabu yawuyataswa Samaria ichabarwa-barwa.

⁷ Wikawa mbeo, wichakuwida kiremba; mbuwa isewurushagha viro ndeinekagha vindo na hata vikava, vichajighwa ni waghenyi.

⁸ Israeli oofwanana na wandu wa iro mbari; ooka aghadi kwawo sa nyungu ibarikie.

⁹ Wandu wa Israeli waghendie cha Ashuru, sa punda wa isakenyi umaraa-mara uekeri, wakuwikie wandu wa mbari zima welipwa wipate kuwilindia.

¹⁰ Ela idana nichawikwanya chiaimweri nipate kuwikaba. Wichawoka kudaruma kwa kukorongwa ni mzuri wa Ashuru.

¹¹ “Hata ngera Israeli waaghie madhabahu nyingi refunyira vizongona kwa wundu ghwa kaung'a, ela sena iro madhabahu rawurie malalo ghebonyera kaung'a.

¹² Nawiandikie mafundisho ghisetalikagha; ela waawuyaghitala sa kilambo cha kighenyi.

¹³ Wadaboilwa ni kufunya vizongona kwapo, na kuja nyama raro; ela ini BWANA siboilwagha navo anduangi. Nichakumbuka kaung'a yawo na kuwikaba, nichawiwunja Misri.

¹⁴ “Wandu wa Israeli waaghie ngome, ela wamliwie Muumbi wawo. Wandu wa Juda waaghie mizi ya ngome, ela nichaduma modo aighu ya iyo mizi ghukore ngome na mizi yawo.”